Fluwa klikli nga Pɔlu klɛli Korɛntifuɛ mun’n 10:1-33

  • Izraɛlifuɛ’m be su ndɛ’n man afɔtuɛ (1-13)

  • Amuin sɔlɛ’n i su afɔtuɛ (14-22)

    • Zoova i tabli’n nin mmusu’m be tabli’n (21)

  • Like nga e le atin e yo’n nin e wiengu’m be akunndan bulɛ (23-33)

    • ‘Like kwlaa nga amún yó’n, an yo naan Ɲanmiɛn ɲan ɲrun’ (31)

10  Aniaan mun, n kunndɛ kɛ an si kɛ e nannan’m be trannin ɲanmiɛn ble’n i bo,+ yɛ be kwlaa be kpɛli jenvie’n.+  Yɛ kɛ be kwlaa be suli Moizi su mɔ ɲanmiɛn ble’n wo be ti su nglo, mɔ bé sín jenvie’n nun’n, ɔ ti kɛ batɛmun yɛ be yoli be sa.  Be kwlaa be dili aliɛ kunngba ng’ɔ fin Ɲanmiɛn’n.+  Asa ekun’n, nzue kunngba ng’ɔ fin Ɲanmiɛn’n yɛ be kwlaa be nɔnnin-ɔn.+ Afin be nɔnnin yɔbuɛ m’ɔ fin Ɲanmiɛn’n, m’ɔ suli be su’n, i nun nzue’n. Yɔbuɛ sɔ’n yɛle Klisi.+  Sanngɛ Ɲanmiɛn i klun w’a jɔman be nun sunman be wun. I sɔ’n ti’n, be wuli aawlɛ flɛnnɛn’n nun lɔ.+  Sa sɔ’m be juli naan e fa tu e wun fɔ naan e konvi w’a sɔman sa tɛtɛ mun kɛ be sa.+  Asa ekun’n, nán amun kaci amuin sɔfuɛ kɛ be nun wie’m be fa yoli’n sa. I sɔ yɛ be klɛli i Ɲanmiɛn ndɛ’n nun-ɔn. Be klɛli i kɛ: “Nvlefuɛ’m be trannin ase be dili like yɛ be nɔnnin nzan. I sin’n, be jasoli be kannin ngowa.”+  Asa kusu’n, nán e kunndɛ bla nin bian sukusuku, yɛ nán e yo i wunsu ɲannzuɛn sa mun* kɛ be nun wie’m be fa yoli’n sa. Afin kɛ be yoli sɔ’n, be nun akpiakpi ablaɔn-nin-nsan (23.000) be wuli le kunngba.+  Nán e sa Zoova* e nian+ kɛ nga be nun wie’m be fa sɛli i be niannin’n sa. Afin kɛ be yoli sɔ’n, wuo’m be kali be, kpɛkun be wuli.+ 10  Asa ekun’n, nán amun ijɔ amun konviabo kɛ be nun wie’m be fa yoli’n sa.+ Afin kɛ be yoli sɔ’n, like sacifuɛ’n nunnunnin be.+ 11  Sa sɔ’m be juli be su naan e fa tu e wun fɔ. Yɛ be klɛli ndɛ sɔ mun naan e mɔ e o mɛn’n* i awieliɛ blɛ nun’n, y’a yoman kɛ be sa.+ 12  I sɔ’n ti’n, maan sran ng’ɔ bu i kɛ w’a jran kpa’n, ɔ niɛn i wun su naan w’a tɔman.+ 13  Sa nga be tɔ amun su’n,* nán amun ngunmin amun su yɛ be tɔ-ɔ.+ Sanngɛ Ɲanmiɛn ti nanwlɛfuɛ. Ɔ su kplinman su kɛ sa ng’ɔ tɔ amun su’n, ɔ tra amun kpɛn.+ Sɛ sa tɔ amun su’n, ɔ́ fá ajalɛ naan amun a kwla jrɛn i ɲrun kekle.+ 14  I sɔ’n ti’n, min sran kpa mun, amun kpalo* amuin sɔlɛ’n i wafawafa’n kwlaa.+ 15  N su kan ndɛ n kle sran mɔ be bu sa sin’n. Ɔ maan amun bu ndɛ nga n kan’n i akunndan be nian. 16  ?Kɛ e srɛ suyralɛ klowa’n su’n, nán Klisi i mmoja’n i su ye’n i wie yɛ y’a ɲɛn i lɛ-ɔ?+ ?Kɛ e bubu kpanwun’n nun’n, nán Klisi i wunnɛn’n i su ye’n i wie yɛ y’a ɲɛn i lɛ-ɔ?+ 17  Kannzɛ kpanwun’n ti kunngba naan e sɔnnin’n, sanngɛ e ngba e ti kun.+ Afin e kwlaa e cɛcɛ kpanwun kunngba sɔ’n nun. 18  An bu Izraɛlifuɛ’m be liɛ’n i akunndan: ?Kɛ be di nnɛn nga be fa yili tɛ tɛ yiwlɛ’n su’n, ɔ timan kɛ be nin Ɲanmiɛn yɛ be su di like sa-ɔ?+ 19  ?Ɔ maan ń sé sɛ? ?Ń sé kɛ nnɛn nga be fa sɔ amuin’n ti like dan? ?Annzɛ amuin’n ti like dan? 20  Cɛcɛ, be timan like fi. Sanngɛ n se kɛ tɛ nga amuin sɔfuɛ’m be yi’n, be yi be man mmusu mun, nán Ɲanmiɛn yɛ be yi be mɛn i-ɔ.+ Yɛ n kunndɛman kɛ amun nin mmusu mun amun di.+ 21  Amun kwlá nɔnman Zoova* i klowa’n nun naan amun kunngba’n amun a nɔn mmusu’m be klowa’n nun. Amun kwlá tranman “Zoova* i tabli’n”+ i sin, naan amun kunngba’n amun a tran mmusu’m be tabli’n i sin. 22  ?Annzɛ ‘e su klɔklɔ Zoova* i ya’n’?+ ?E le wunmiɛn trɛ i? 23  E le atin e yo like kwlaa, sanngɛ nán like kwlaa yɛ ɔ yo sa ye-ɔ. E le atin e yo like kwlaa, sanngɛ nán like kwlaa yɛ ɔ wla sran fanngan-ɔn.+ 24  Nán maan sran fi bu i bɔbɔ i wun akunndan, sanngɛ maan ɔ bu i wiengu akunndan titi.+ 25  Nnɛn kwlaa nga be yo i atɛ gua bo’n, amun kwla di, nán an usausa nun, kɛ ɔ ko yo naan amun akunndan w’a sannganman’n ti. 26  Afin “asiɛ’n, ɔ nin i su ninnge’n kwlaa be ti Zoova* liɛ.”+ 27  Sɛ sran m’ɔ lafiman e Min’n su’n flɛ amun kɛ amun ko di like’n, naan amun klo kɛ amún kɔ́’n, like kwlaa ng’ɔ́ fá síe amun ɲrun’n, an di. Nán amun usausa nun naan sran fi i akunndan w’a sannganman. 28  Sanngɛ sɛ sran kun se amun kɛ: “Be fali like nga be sɔli amuin’n,” nán amun di naan sran ng’ɔ seli amun sɔ’n, ɔ nin sran uflɛ’m be akunndan’n w’a sannganman.+ 29  Nán amun bɔbɔ amun akunndan’n i ndɛ yɛ n kan-ɔn, sanngɛ sran uflɛ liɛ’n i ndɛ yɛ n kan-ɔn. Kannzɛ n le atin n yo like nga n klo’n, n kunndɛman kɛ ń yó sɔ, kɛ ɔ ko yo naan sran uflɛ w’a buman min fɔ i akunndan’n nun lɔ’n ti.+ 30  ?Sɛ ń dí aliɛ naan n la Ɲanmiɛn i ase’n, ngue ti yɛ sran uflɛ kán like nga ti yɛ n lali Ɲanmiɛn i ase’n i ndɛ tɛ-ɔ?+ 31  Ɔ maan sɛ amún dí like-o, sɛ amún nɔ́n nzan-o, sɛ amún yó like uflɛ-o, i kwlaa nga amún yó’n, an yo naan Ɲanmiɛn ɲan ɲrun.+ 32  An nian amun wun su naan amun a kaciman kɛ yɔbuɛ wie sa naan Zifu mun nin Glɛki mun, ɔ nin Ɲanmiɛn i asɔnun’n i nunfuɛ’m be ja w’a kplaman su.+ 33  I sɔ kusu yɛ n yo-ɔ. N mian min ɲin naan sa’n kwlaa nun’n, m’an yo like ng’ɔ yo sran’m be kwlaa be fɛ’n. Ɔ maan n buman min bɔbɔ min wun akunndan,+ sanngɛ n bu sran kpanngban be akunndan, kɛ ɔ ko yo naan b’a kwla fite nun’n ti.+

Ja ngua lɔ ndɛ mun

Nian Nd. A5 nun.
Annzɛ “Sa nga be sa amun nian’n.”
Glk., “wanndi.”
Nian Nd. A5 nun.
Nian Nd. A5 nun.
Nian Nd. A5 nun.
Nian Nd. A5 nun.