Zozie 3:1-17
-
Izraɛlifuɛ’m be su kpɛ Zurdɛn’n (1-17)
3 Zozie jasoli nglɛmun ndɛ kpa, kpɛkun ɔ nin Izraɛlifuɛ’m* be kwlaa be jasoli Sitimun+ lɛ be ɔli Zurdɛn’n i nuan lɔ. Be lali lɛ kɔnguɛ ka naan b’a kpɛ nzue’n.
2 Kɛ cɛn nsan sinnin’n, Izraɛlifuɛ’m be su kpɛn’m+ be sinsinnin nanmue’n nun,
3 be seli nvlefuɛ’m be kɛ: “Kɛ amun wun kɛ Ɲanmiɛn ɲrun jranfuɛ mɔ be ti Levifuɛ’n+ b’a sua Zoova i aenguɛ’n i alaka’n, amun jaso kan amun wo lɛ’n naan amun su alaka’n su.
4 Sanngɛ maan amun afiɛn’n ti nun kude akpi nɲɔn (2.000),* nán amun mɛntɛn i koko, kɛ ɔ ko yo naan amun a si atin nga amún fá su’n ti. Afin amun nin-a faman atin sɔ’n le.”
5 Zozie seli nvlefuɛ’m be kɛ: “Amun yo amun wun sanwun,+ afin ainman’n Zoova wá yó abonuan sa wie mun amun afiɛn.”+
6 I sin’n, Zozie seli Ɲanmiɛn ɲrun jranfuɛ’m be kɛ: “Amun fa aenguɛ’n i alaka’n+ naan amun dun mmua nvlefuɛ’m be ɲrun.” Ɔ maan be fali aenguɛ’n i alaka’n kpɛkun be dunnin mmua nvlefuɛ’m be ɲrun.
7 I sin’n, Zoova seli Zozie kɛ: “Kɛ ɔ fin andɛ’n ń má yó maan á ɲán ɲrun Izraɛlifuɛ’m be kwlaa be afiɛn.+ I liɛ’n, bé wá sí kɛ n jin ɔ sin+ kɛ nga n fa jrannin Moizi sin’n sa.+
8 Kan ndɛ nga kle Ɲanmiɛn ɲrun jranfuɛ nga be sua aenguɛ’n i alaka’n: ‘Sɛ amun ju Zurdɛn nzue’n i nuan lɛ’n, maan amun jra Zurdɛn nzue’n nun naan amun jran nun lɛ.’”+
9 Yɛ Zozie seli Izraɛlifuɛ’m be kɛ: “Amun wunnge wa naan amun tie amun Ɲanmiɛn Zoova i nuan ndɛ’n.”
10 I sin’n, Zozie seli kɛ: “Amún wá sí jrɛiin kɛ Ɲanmiɛn kun m’ɔ lafiman’n wo amun afiɛn,+ naan saan ɔ́ fúan Kanaanfuɛ mun, nin Ɛtifuɛ mun, nin Ivifuɛ mun, nin Perizifuɛ mun, nin Giigasifuɛ mun, nin Amɔɔfuɛ mun, nin Zebisifuɛ mun amun ɲrun.+
11 Amun nian! Asiɛ wunmuan’n i Min’n i aenguɛ’n i alaka’n wá dún mmua amun ɲrun Zurdɛn nzue’n nun.
12 Maan amun fa Izraɛli akpasua’m be nun yasua blu-nin-nɲɔn (12), amun fa akpasua kun nun yasua kun.+
13 Kpɛkun kɛ Ɲanmiɛn ɲrun jranfuɛ nga be sua Zoova m’ɔ ti asiɛ wunmuan’n i Min’n i Alaka’n be ja’n kán Zurdɛn nzue’n* cɛ’n, Zurdɛn nzue’n ɔ́ yáci sonjilɛ kpɛkun ɔ́ sí ce kɛ talɛ wie sa.”+
14 Ɔ maan kɛ nvlefuɛ’m be jasoli be tannin sua’m be nun’n, ka naan b’a kpɛ Zurdɛn nzue’n, Ɲanmiɛn ɲrun jranfuɛ nga be sua aenguɛ’n i alaka’n+ be dunnin mmua nvlefuɛ’m be ɲrun.
15 Kɛ be nga be suali Alaka’n be juli Zurdɛn’n i nuan lɛ’n, mɔ Ɲanmiɛn ɲrun jranfuɛ nga be suali Alaka’n be ja tiali nzue ng’ɔ o ce’n su’n nun cɛ’n (ninnge’m be kpɛlɛ blɛ nun’n Zurdɛn’n yi lele fu ce’n su),+
16 nzue’n yacili sonjilɛ. Ɔ sili ce kɛ talɛ sa mmua kpa lɔ, Adan klɔ m’ɔ o Zaatan klɔ’n i wun koko lɛ’n, i wun lɔ. Kɛ ɔ́ yó sɔ’n, nzue ng’ɔ sonji kɔ Araba Jenvie’n nun lɔ’n, mɔ yɛle Jenvie ng’ɔ ti Njin Nzue Klakla’n, ɔ yacili sonjilɛ. Nzue’n yacili sonjilɛ yɛ nvlefuɛ’m be kpɛli nzue’n Zeriko klɔ’n i ɲrun ndɛnman su lɛ.
17 Kɛ Ɲanmiɛn ɲrun jranfuɛ nga be sua Zoova i aenguɛ’n i alaka’n be jrannin Zurdɛn’n i afiɛn asiɛ kee’n su’n,+ Izraɛlifuɛ’m be kwlaa be sinnin asiɛ kee’n su,+ lele be kwlaa be wieli Zurdɛn’n i kpɛ.
