Zozie 14:1-15
14 Izraɛlifuɛ’m be aja like mɔ be fɛli i Kanaan mɛn’n nun’n yɛ be o yɛ: Eleazaa m’ɔ ti Ɲanmiɛn ɲrun jranfuɛ’n nin Zozie m’ɔ ti Nɛn i wa’n, ɔ nin Izraɛli akpasua’m be si’m be awlobo kpɛnngbɛn mun yɛ be fa mannin be naan ɔ yo be aja like-ɔ.+
2 Be tuli fɔtɔ naan b’a cɛcɛ lika’n nun+ b’a man akpasua ngwlan nin sin,+ kɛ nga Zoova seli Moizi kɛ be yo’n sa.
3 Afin Moizi mannin akpasua nɲɔn nin sin be lika liɛ Zurdɛn i bue kun lɔ,*+ yɛ w’a manman Levifuɛ’m be aja like wie.+
4 Zozɛfu i mma’m be ti akpasua nɲɔn,+ Manase nin Efraimun.+ B’a manman Levifuɛ’m be asiɛ, saan klɔ+ nga bé trán su’n, nin be nnɛn’m be didiwlɛ, ɔ nin be ninnge’m be siewlɛ yɛ be mannin be-ɔ.+
5 Ɔ maan Izraɛlifuɛ’m be cɛcɛli asiɛ’n nun kɛ nga Zoova kan kleli Moizi’n sa.
6 I sin’n, Zida yasua’m be ko wunnin Zozie wun Gilgali lɔ.+ Kpɛkun Kalɛbu+ m’ɔ ti Zefine m’ɔ ti Kenizifuɛ’n i wa’n seli i kɛ: “Ɔ bɔbɔ a si e nin wɔ e su ndɛ nga Zoova kan kleli+ Moizi m’ɔ ti Ɲanmiɛn i sran’n+ Kadɛsi-Baanea lɔ’n i kpa.+
7 Kɛ Zoova i sufuɛ Moizi sunmannin min Kadɛsi-Baanea lɛ kɛ n ko kpla mɛn’n n nian’n,+ nn n le afuɛ ablanan (40), yɛ kɛ n sali min sin’n n dili sa nga n wunnin i’n i nanwlɛ n kleli i.*+
8 Kannzɛ bɔbɔ min niaan nga e nin be e ɔli’n be yoli maan nvlefuɛ’m be sa sin bubuli be’n,* sanngɛ min liɛ’n n tuli min klun n fali min Ɲanmiɛn Zoova i ndɛ’n su.+
9 I sɔ’n ti’n, Moizi tali nda cɛn sɔ’n nun, ɔ seli kɛ: ‘Mɛn nga ɔ ja tiali nun’n, ɔ́ yó a nin ɔ mma mun amun aja like tititi, afin a tuli ɔ klun fali min Ɲanmiɛn Zoova i ndɛ’n su.’+
10 Kɛ nga Zoova fa kannin’n sa’n,+ w’a sasa min lele+ i afuɛ ablanan-nin-nnun (45) yɛ. Kɛ Zoova tá Moizi i nda sɔ’n, nn Izraɛlifuɛ’m be o aawlɛ flɛnnɛn’n nun lɔ.+ Andɛ nin andɛ’n n te o nguan nun, yɛ n le afuɛ ablaɔcuɛ-nin-nnun (85).
11 N te le wunmiɛn kɛ i nun mɔ Moizi sunmannin min’n sa. N te le wunmiɛn kɛ blɛ sɔ’n nun’n sa, n kwla fa kun alɛ, yɛ n kwla fa di junman uflɛ wie mun.
12 I sɔ’n ti’n, fa okaoka lika nga man min, kɛ nga Zoova tali nda cɛn sɔ’n nun’n sa. Kannzɛ a tili i cɛn sɔ’n nun kɛ Anakifuɛ’m+ be o lɔ’n, naan be klɔ’m be wun ti sisiwa kpa’n,+ sanngɛ Zoova jrán min sin,*+ yɛ ń fúan be* kɛ nga Zoova fa kannin’n sa.”+
13 Ɔ maan Zozie boli muae mannin Kalɛbu m’ɔ ti Zefine i wa’n, kpɛkun ɔ fali Ebrɔn mɛnnin i naan ɔ yo i aja like.+
14 I sɔ’n ti yɛ lele nin andɛ’n, Ebrɔn ti Kalɛbu m’ɔ ti Zefine m’ɔ ti Kenizifuɛ’n i wa’n i aja like’n niɔn. Afin ɔ tuli i klun fali Zoova m’ɔ ti Izraɛli Ɲanmiɛn’n i ndɛ’n su.+
15 Laa’n be flɛ Ebrɔn kɛ Kiriati-Aaba.+ (Anakifuɛ’m be nun’n, Aaba yɛ ɔ le ɲrun tra be kwlaa-ɔ.) Ɔ maan b’a kunman alɛ mɛn’n nun kun.+
Ja ngua lɔ ndɛ mun
^ Yɛle kɛ, wia afiliɛ lɔ.
^ Ebr., “n kannin ndɛ ng’ɔ o min awlɛn’n nun’n.”
^ Ebr., “nvlefuɛ’m be awlɛn’n kloli’n.”
^ Annzɛ “ń fɛ́n be bo ninnge mun.”
^ Annzɛ “atrɛkpa’n, ɔ́ jrán min sin.”
