Zozie 24:1-33

  • Zozie boli Izraɛlifuɛ’m be su ndɛ’n su (1-13)

  • Ɔ wlali be fanngan kɛ be su Zoova (14-24)

    • “N liɛ’n, e nin min awlobofuɛ mun é sú Zoova” (15)

  • Zozie nin Izraɛlifuɛ’m be trali aenguɛ (25-28)

  • Zozie wuli, kpɛkun be sieli i (29-31)

  • Be sieli Zozɛfu i owie mun Sisɛmun lɔ (32)

  • Eleazaa wuli, kpɛkun be sieli i (33)

24  I sin’n, Zozie yiali Izraɛli akpasua’m be kwlaa Sisɛmun lɔ. Ɔ flɛli Izraɛli kpɛnngbɛn mun, nin akpasua su kpɛn mun, nin jɔlɛ difuɛ mun, ɔ nin be ɲrun dinfuɛ mun,+ kpɛkun be ko jrannin Ɲanmiɛn Kpli i ɲrun lɛ. 2  Zozie seli nvlefuɛ’m be kwlaa kɛ: “Ndɛ nga Zoova m’ɔ ti Izraɛli Ɲanmiɛn’n kan’n yɛ: ‘Laa’n+ amun nannan’m+ be trannin Nzue’n* i bue kun lɔ, yɛ be sɔli amuin mun.+ Be nun kun yɛle Tera. Ɔ ti Abraamun nin Naɔɔ be si. 3  “‘Kɛ ɔ́ kɔ́ i ɲrun’n, n fali amun nannan Abraamun+ Nzue’n* i bue kun lɔ, kpɛkun n yoli maan ɔ wlanwlannin Kanaan mɛn wunmuan’n nun. Yɛ n mɛnnin i ba kpanngban.+ N yoli maan ɔ wuli Izaaki.+ 4  Izaaki kusu wuli Zakɔbu nin Ezau.+ I sin’n, n fali Seii Oka’n n mannin Ezau.+ Yɛ Zakɔbu nin i mma liɛ’m be ɔli Ezipti.+ 5  I sin’n, n sunmannin Moizi nin Aarɔn.+ Kpɛkun n fali ɲrɛnnɛn fanunfanun n yili i Eziptifuɛ’m be su,+ yɛ n fali amun n fiteli-ɔ. 6  Kɛ ń fá amun si mun Ezipti lɔ ń fíte’n,+ mɔ be juli jenvie’n i nuan lɛ’n, Eziptifuɛ’m be fali be alɛ kunlɛ kakaklolo mun, ɔ nin be nnɛn kpanngɔ su fufuɛ mun be suli amun si’m be su lele be juli Jenvie Ɔkwlɛ’n i nuan lɔ.+ 7  Amun si’m be kpan flɛli min Zoova.+ Ɔ maan n fali aosin n sieli amun nin Eziptifuɛ mun amun afiɛn. Kpɛkun n yoli maan jenvie’n bali ɔ wa katali be su,+ yɛ amun bɔbɔ amun ɲinma wunnin like nga n yoli i Ezipti lɔ’n.+ I sin’n, amun trannin aawlɛ flɛnnɛn’n nun lɔ afuɛ* kpanngban.+ 8  “‘N fali amun n ɔli Amɔɔfuɛ mɔ be tran Zurdɛn’n i bue kun lɔ’n* be mɛn’n nun. Yɛ be nin amun kunnin alɛ.+ Sanngɛ n fali be n wlali amun sa nun. Ɔ maan amun fali be mɛn’n. Kpɛkun n nunnunnin be sekeseke kpan amun ɲrun.+ 9  I sin’n, Zipɔɔ i wa Balaki m’ɔ ti Moabu famiɛn’n, ɔ jasoli kpɛkun ɔ fali alɛ wlali Izraɛlifuɛ’m be sin. Ɔ maan ɔ sunmannin Balaamun m’ɔ ti Beɔɔ i wa’n kɛ ɔ ko bo amun sannzan.+ 10  Sanngɛ m’an tieman Balaamun+ i nuan ndɛ’n. Ɔ maan ɔ boli muae mannin amun kpɛ sunman,+ yɛ n deli amun i sa nun.+ 11  “‘I sin’n, amun kpɛli Zurdɛn’n,+ kpɛkun amun bali Zeriko.+ Zeriko kpɛn mun* nin Amɔɔfuɛ mun, nin Perizifuɛ mun, nin Kanaanfuɛ mun, nin Ɛtifuɛ mun, nin Giigasifuɛ mun, nin Ivifuɛ mun, ɔ nin Zebisifuɛ’m be nin amun kunnin alɛ. Sanngɛ n fali be n wlali amun sa nun.+ 12  N fali awlabɔɛ* n yili be nga be o amun ɲrun’n be su, yɛ be wanndili amun ɲrun,+ kɛ nga Amɔɔfuɛ’m be famiɛn nɲɔn’m be fa wanndili amun ɲrun’n sa. Nán amun tokofi’n annzɛ amun ta’n ti yɛ i sɔ sa’n juli-ɔ.+ 13  N fali mɛn kun mɔ amun a fɛmɛn i wun’n, ɔ nin klɔ mɔ nán amun yɛ amun kplannin’n,+ n fa mannin amun naan amun tran nun. Viɲin nin olivie mɔ nán amun yɛ amun tali’n, amun su di be su mma mun.’+ 14  “I sɔ’n ti’n, maan amun sro Zoova, amun nin i be nanti seiin,* yɛ amun nin i be nanti klanman.*+ Amuin nga amun nannan’m be sɔli be Nzue’n* i bue kun lɔ’n nin Ezipti lɔ’n,+ amun yi be blo, yɛ amun su Zoova. 15  Sanngɛ sɛ Zoova i sulɛ’n yo amun tɛ’n, andɛ’n, amun kle like nga amún sú i’n.+ Sɛ amun nannan’m be amuin nga be sɔli be Nzue’n* i bue kun lɔ’n nin-o,+ annzɛ Amɔɔfuɛ mɔ amun wo be mɛn’n nun’n be amuin liɛ mun-o,+ amun kle kun. Sanngɛ n liɛ’n, e nin min awlobofuɛ mun é sú Zoova.” 16  Kɛ ɔ yoli sɔ’n, nvlefuɛ’m be tɛli i su kɛ: “Ɔ su kpɛnmɛn e klun le kɛ e yaci Zoova lɛ naan e sɔ amuin mun. 17  E Ɲanmiɛn Zoova yɛ ɔ fali e nin e si mun Ezipti mɛn’n nun lɔ fiteli-ɔ,+ ɔ fali e kanga sua’n nun fiteli.+ Ɔ yoli sa dandan mun e ɲin bo lɛ,+ kpɛkun ɔ sasali e atin’n kwlaa su. Yɛ nvle kwlaa nga e sinnin nun’n, ɔ sasali e be lika.+ 18  Zoova fuannin nvle nga be dun mmua trannin mɛn nga nun wa’n be kwlaa, i wie yɛle Amɔɔfuɛ mun. I sɔ’n ti’n, e kusu é sú Zoova wie, afin ɔ ti e Ɲanmiɛn.” 19  Zozie tɛli be su kɛ: “Amun su kwlá suman Zoova. Afin ɔ ti Ɲanmiɛn kun m’ɔ ti sanwun-ɔn,+ ɔ ti Ɲanmiɛn kun m’ɔ kunndɛ kɛ be su i kunngba cɛ-ɔ.+ Ɔ su yaciman amun fɔnlɛ mun* nin amun sa tɛ mun cɛman amun.+ 20  Sɛ amun yaci Zoova lɛ naan amun sɔ amuin mun’n, kannzɛ ɔ yoli sa kpakpa wie mun mannin amun’n, sanngɛ ɔ́ káci i sin sí amun.”+ 21  Nvlefuɛ’m be tɛli Zozie su kɛ: “Cɛcɛ! E liɛ’n Zoova yɛ é sú i-ɔ.”+ 22  Ɔ maan Zozie seli nvlefuɛ’m be kɛ: “Amun bɔbɔ amun ti amun lalofuɛ. Amun bɔbɔ amun klunklo su amun seli kɛ amún sú Zoova.”+ Be tɛli i su kɛ: “Ɛɛn, e ti e bɔbɔ e lalofuɛ.” 23  “Sɛ ɔ ti sɔ’n, amun yi amuin’m be blo naan amun fa amun awlɛn’n i kwlaa be su Zoova m’ɔ ti Izraɛli Ɲanmiɛn’n.” 24  Nvlefuɛ’m be seli Zozie kɛ: “É sú e Ɲanmiɛn Zoova, yɛ é tíe i nuan ndɛ’n.” 25  Ɔ maan cɛn sɔ’n nun’n, Zozie nin nvlefuɛ’m be trali aenguɛ, yɛ ɔ kpɛli mmla mannin be Sisɛmun lɔ. 26  I sin’n, Zozie klɛli ndɛ sɔ mun Ɲanmiɛn i Mmla fluwa’n+ nun, kpɛkun ɔ fali yɔbuɛ+ dan kun, ɔ fa tɛkɛli i waka dan ng’ɔ o Zoova i sua’n i wun lɛ’n i bo lɛ. 27  Zozie seli nvlefuɛ’m be kɛ: “Amun nian! Yɔbuɛ nga ti e lalofuɛ,+ afin ɔ tili ndɛ kwlaa nga Zoova kan kleli e’n. Ɔ́ wá káci amun lalofuɛ, i liɛ’n amun su seman kɛ amun siman amun Ɲanmiɛn’n.” 28  Kɛ ɔ yoli sɔ’n, Zozie seli nvlefuɛ’m be kɛ be wɔ, sran kun ɔli i lika liɛ’n nun.+ 29  I sin’n, Nɛn i wa Zozie m’ɔ ti Zoova i sufuɛ’n ɔ wuli. Kɛ ɔ́ wú’n, nn ɔ le afuɛ ya kun blu (110).+ 30  Be sieli i i lika ng’ɔ o Timnati-Sera+ lɔ’n nun, Efraimun okaoka lika’n nun lɔ, Gaasi Oka’n i nglo lɔ lika’n nun. 31  Zozie blɛ su’n, ɔ nin kpɛnngbɛn nga kɛ Zozie wuli’n be kali lɛ’n be blɛ su’n, Izraɛlifuɛ’m be suli Zoova titi. Kpɛnngbɛn sɔ’m be wunnin sa nga Zoova yo mannin Izraɛlifuɛ mun’n.+ 32  Zozɛfu i owie+ nga Izraɛlifuɛ’m be fɛli i Ezipti lɔ bali’n, be sieli i Sisɛmun lɔ. Be sieli i lika nga Zakɔbu toli i Sisɛmun i si Amɔɔ i mma’m+ be sa nun’n i nun lɔ. Ɔ toli lika sɔ’n sika mma ya kun (100),+ yɛ ɔ kacili Zozɛfu i mma’m be aja like.+ 33  Eleazaa m’ɔ ti Aarɔn i wa’n kusu wuli wie.+ Be sieli i kpɔlɛ nga be fa mɛnnin i wa Fineasi’n+ i su lɔ, Efraimun okaoka lika’n nun lɔ.

Ja ngua lɔ ndɛ mun

^ Yɛle kɛ, Efrati.
^ Yɛle kɛ, Efrati.
^ Ebr., “cɛn.”
^ Yɛle kɛ, wia afiliɛ lɔ.
^ Be kwla se ekun kɛ “be nga be le asiɛ’n.”
^ Be kwla se ekun kɛ “N yoli maan be nga be o amun ɲrun’n be wawɛ’n tɔli blo”, “be akunndan’n sanngannin.”
^ Annzɛ “nán sa fi tran amun wun.”
^ Annzɛ “nanwlɛ su.”
^ Yɛle kɛ, Efrati.
^ Yɛle kɛ, Efrati.
^ Annzɛ “ɲin kekle’n.”

Copyrights for this publication