Ruth 1:1-22
1 Yana ha mga adlaw han an mga hukom+ nagpadapat hin hustisya,* nagkaada gutom ha tuna; ngan usa nga lalaki an binaya ha Bethlehem+ ha Juda basi umukoy sugad nga dayo ha tuna* han Moab,+ hiya upod an iya asawa ngan an iya duha nga anak nga lalaki.
2 An ngaran han lalaki amo hi Elimelec,* an ngaran han iya asawa amo hi Noemi,* ngan an ngaran han iya duha nga anak nga lalaki amo hira Malon* ngan Kilion.* Mga taga-Efrata hira tikang ha Bethlehem ha Juda. Ngan inabot hira ha tuna han Moab ngan inukoy didto.
3 Paglabay hin pipira ka panahon, hi Elimelec nga bana ni Noemi namatay, ngan nahibilin hiya upod an iya duha nga anak nga lalaki.
4 Ha urhi, an mga lalaki nag-asawa hin Moabita nga mga babaye; an ngaran han usa amo hi Orpa, ngan an ngaran han usa pa amo hi Ruth.+ Inukoy hira didto hin mga napulo ka tuig.
5 Katapos, an iya duha nga anak nga hira Malon ngan Kilion namatay liwat, salit waray na hiya mga anak ngan bana.
6 Tungod hito nagtikang hiya pagbiyahe upod an iya mga umagad nga babaye basi umuli tikang ha tuna han Moab, kay ha Moab nakabati hiya nga gintagan ni Jehova hin atensyon an iya katawohan pinaagi ha paghatag ha ira hin pagkaon.*
7 Upod an iya duha nga umagad nga babaye, iya ginbayaan an lugar nga iya gin-ukyan. Samtang naglalakat hira ha dalan basi bumalik ha tuna han Juda,
8 hi Noemi nagsiring ha iya duha nga umagad nga babaye: “Lakat, uli na kamo, an tagsa ha iyo ha balay han iyo nanay. Hinaot magpakita hi Jehova hin maunungon nga gugma ha iyo,+ sugad la nga iyo ito iginpakita ha mga lalaki nga nagkamatay na ngan ha akon.
9 Hinaot itugot ni* Jehova nga an tagsa ha iyo makabiling hin kasigurohan* ha balay han iyo bana.”+ Katapos, iya hira ginharokan, ngan nanangis hira hin makusog.
10 Nagsiniring hira ha iya: “Diri, kondi maupod kami ha imo ngadto ha imo katawohan.”
11 Kondi hi Noemi nagsiring: “Panguli na kamo, mga anak ko. Kay ano nga maupod kamo ha akon? Puydi pa ba ako mag-anak hin mga lalaki nga magigin iyo mga bana?+
12 Uli na kamo, mga anak ko. Lakat na, kay lagas na gud ako basi mag-asawa pa. Kon pananglitan may paglaom pa ako nga makabiling hin bana yana nga gab-i ngan mag-anak liwat hin mga lalaki,
13 maghihinulat ba kamo ha ira tubtob nga dumaku hira? Diri na la ba kamo mag-aasawa utro tungod ha ira? Ayaw, mga anak ko, duro an akon kasubo* para ha iyo, kay an kamot ni Jehova kinontra ha akon.”+
14 Nanangis utro hira hin makusog, ngan katapos hito ginharokan ni Orpa an iya ugangan ngan binaya. Kondi hi Ruth nagpabilin kaupod ni Noemi.
15 Salit hi Noemi nagsiring: “Kitaa! An imo balo nga hipag binalik na ha iya katawohan ngan ha iya mga dios. Uli na upod han imo hipag.”
16 Kondi hi Ruth nagsiring: “Ayaw ako paghangyoa nga bumaya ha imo, nga tumalikod tikang ha pag-upod ha imo; kay kon diin ka makadto, makadto ako, ngan kon diin ka magpapalabay han gab-i, didto ako magpapalabay han gab-i. An imo katawohan magigin akon katawohan, ngan an imo Dios, akon Dios.+
17 Kon diin ka mamamatay, didto ako mamamatay, ngan didto ako iglulubong. Magpahinabo unta hi Jehova hin sunod-sunod nga sirot ha akon kon may bisan ano nga magbulag ha akon tikang ha imo labot han kamatayon.”
18 Han nakita ni Noemi nga nagpipirit hi Ruth pag-upod ha iya, inundang* hiya ha pagkinombinse ha iya.
19 Ngan hira nga duha nagpadayon ha ira pagbiyahe tubtob nga inabot hira ha Bethlehem.+ Pag-abot gud nira ha Bethlehem, an bug-os nga syudad nagkarigumok tungod ha ira, ngan an kababayin-an nasiring: “Hi Noemi ba ini?”
20 Nasiring hiya ha kababayin-an: “Ayaw ako tawaga nga Noemi.* Tawaga ako nga Mara,* kay ginpaantos gud ako* han Makagarahum-ha-ngatanan.+
21 Puno ako han linarga dinhi, kondi ginpabalik ako ni Jehova nga waray dara. Kay ano nga gintatawag niyo ako nga Noemi, nga hi Jehova man an nagkontra ha akon ngan an Makagarahum-ha-ngatanan an nagpahinabo hin karaotan ha akon?”+
22 Sugad hini an pag-uli ni Noemi tikang ha tuna han Moab,+ upod an iya Moabita nga umagad nga hi Ruth. Inabot hira ha Bethlehem ha tinikangan han pangani han sebada.+
Mga footnote
^ Lit., “naghukom.”
^ O “rehiyon.”
^ Nangangahulogan nga “Hadi an Akon Dios.”
^ Nangangahulogan nga “An Akon Pagkamakalilipay.”
^ Posible nga tikang ha Hebreo nga pulong nga nangangahulogan nga “magin maluya; magkasakit.”
^ Nangangahulogan nga “Usa nga Napapakyas; Usa nga Hirani Na an Kataposan.”
^ Lit., “tinapay.”
^ O “maghatag hin regalo hi.”
^ Lit., “lugar nga mapapahuwayan.”
^ Lit., “kapait.”
^ Ha iba nga lugar, “tinuko.”
^ Nangangahulogan nga “An Akon Pagkamakalilipay.”
^ Nangangahulogan nga “Mapait.”
^ Lit., “kay ginhimo ito nga mapait gud para ha akon.”
