Esther 1:1-22
1 Yana ha mga adlaw ni Ahasuero,* karuyag sidngon, an Ahasuero nga nagmando ha 127 nga probinsya*+ tikang ha India tubtob ha Etiopia,*
2 hito nga mga adlaw han hi Hadi Ahasuero nagmamando tikang ha balwarte* han Susan,*+
3 ha ikatulo ka tuig han iya paghadi, nag-andam hiya hin panagtawo para ha ngatanan niya nga prinsipe ngan mga surugoon. An kasundalohan han Persia+ ngan Media,+ an mga dungganon, ngan an mga prinsipe han mga probinsya* nakada ha iya atubangan,
4 ngan ha sulod hin damu ka adlaw, 180 ka adlaw, iya iginpakita ha ira an bahandi han iya mahimayaon nga ginhadian ngan an iya pagkadungganon ngan an iya pagkaharangdon.
5 Ngan han natapos na ini nga mga adlaw, an hadi nag-andam hin panagtawo ha sulod hin pito ka adlaw para ha ngatanan nga katawohan nga nakadto ha balwarte* han Susan,* tikang ha prominente tubtob ha ordinaryo nga mga tawo, ha bungsaran han garden ha palasyo han hadi.
6 Gindekorasyonan ito hin mga kurtina nga lino, de-kalidad nga koton, ngan tela nga asul, nga iginbitay gamit an mga pisi nga hinimo ha maopay nga klase hin tela ngan ha de-lana nga tela nga purpura nga iginhigot ha silber nga mga surosingsing nga nakataod ha marmol nga mga harigi. May-ada liwat bulawan ngan silber nga mga higdaan dida ha salóg nga hinimo ha bato nga porpido, ha marmol, ha perlas, ngan ha itom nga marmol.
7 May iginserbi nga bino ha bulawan nga mga kopa;* waray kapariho an tagsa nga kopa, ngan damu gud an bino han hadi, uyon ha akos itagana han hadi.
8 Waray bisan usa nga ginpirit* pag-inom; ito an surundon hito nga okasyon, kay ginhikay han hadi ngan han mga opisyal han iya palasyo nga an kada tagsa magbuhat han iya karuyag.
9 Hi Rayna Vasti+ nag-andam liwat hin panagtawo para ha kababayin-an didto ha balay* ni Hadi Ahasuero.
10 Ha ikapito ka adlaw, han an kasingkasing han hadi malipayon tungod han bino, iya ginsidngan hira Mehuman, Bizta, Harbona,+ Bigta, Abagta, Zetar, ngan Carkas, an pito nga opisyal ha palasyo nga personal nga mga kabulig ni Hadi Ahasuero,
11 nga dad-on ha atubangan han hadi hi Rayna Vasti, nga sul-ot an panrayna nga belo,* basi ipakita an iya kahusay ha mga katawohan ngan ha mga prinsipe, kay mahusay gud hiya.
12 Kondi hi Rayna Vasti padayon nga nagdumiri pagsugot ha sugo han hadi nga iginpasumat pinaagi han mga opisyal ha palasyo. Tungod hito nasina gud an hadi, ngan an iya kapungot naglaga ha sulod niya.
13 Katapos, an hadi nakiistorya ha maaramon nga kalalakin-an nga may hilarom nga pagsabot ha naglabay nga mga panhitabo* (kay ha sugad hini nga paagi nakakaabot ha ngatanan nga eksperto ha balaud ngan mga kaso an mga butang may kalabotan ha hadi,
14 ngan adton pinakaduok ha iya amo hira Carsena, Setar, Admata, Tarsis, Meres, Marsena, ngan Memucan, nga pito nga prinsipe+ han Persia ngan Media, nga nakakadaop ha hadi ngan may-ada pinakahigtaas nga mga posisyon ha ginhadian).
15 An hadi nagpakiana: “Sumala ha balaud, ano an sadang buhaton kan Rayna Vasti kay waray hiya sumugot ha sugo ni Hadi Ahasuero nga iginpasumat pinaagi han mga opisyal ha palasyo?”
16 Hi Memucan binaton ha atubangan han hadi ngan han mga prinsipe: “Diri la ha hadi nakabuhat hin sayop hi Rayna Vasti,+ kondi pati ha ngatanan nga prinsipe ngan ha ngatanan nga mga katawohan ha ngatanan nga probinsya* ni Hadi Ahasuero.
17 Kay an ginbuhat han rayna mahibabaroan han ngatanan nga asawa, ngan ira tatamayon an ira mga bana ngan masiring, ‘Hi Hadi Ahasuero nagsiring nga dad-on hi Rayna Vasti ha iya atubangan, pero nagdumiri hiya pagkadto.’
18 Hini mismo nga adlaw an mga prinsesa han Persia ngan Media nga nahibaro han ginbuhat han rayna makikiistorya mahitungod hini ha ngatanan nga prinsipe han hadi, nga magriresulta hin duro nga pagtamay ngan kasina.
19 Kon baga hin maopay ha hadi, magpagawas unta hin sugo nga tikang ha iya, ngan ipasurat unta ito upod han mga balaud han Persia ngan Media, nga diri puydi bag-uhon,+ nga hi Vasti diri na gud makakakanhi utro ha atubangan ni Hadi Ahasuero; ngan an iya posisyon sugad nga rayna ihatag unta han hadi ha usa nga babaye nga mas maopay kay ha iya.
20 Ngan kon an sugo han hadi mabatian ha ngatanan nga bahin han iya haluag nga ginhadian, an ngatanan nga asawa magpapasidungog ha ira mga bana, tikang ha prominente tubtob ha ordinaryo nga mga tawo.”
21 Ini nga suhestyon naruyagan han hadi ngan han mga prinsipe, ngan ginbuhat han hadi an ginsiring ni Memucan.
22 Salit nagpadara hiya hin mga surat ngadto ha ngatanan nga probinsya han hadi,*+ ha tagsa nga probinsya* uyon ha ira kalugaringon nga estilo han pagsurat ngan ha tagsa nga katawohan uyon ha ira kalugaringon nga yinaknan, nga an tagsa nga bana sadang magin agaron* ha iya kalugaringon nga panimalay ngan magyakan ha yinaknan han iya kalugaringon nga katawohan.
Mga footnote
^ Ginhuhunahuna nga hi Xerxes I, an anak ni Dario nga Bantogan (Dario Hystaspis).
^ O “sakop nga mga distrito.”
^ O “Cus.”
^ O “palasyo; kuta.”
^ O “Susa.”
^ O “sakop nga mga distrito.”
^ O “palasyo; kuta.”
^ O “Susa.”
^ O “mga surudlan.”
^ O “ginlimitahan.”
^ O “palasyo.”
^ O “nga putos ha ulo.”
^ O “ha mga pamaagi.” Lit., “ha mga panahon.”
^ O “sakop nga mga distrito.”
^ Lit., “nga sakop nga mga distrito han hadi.”
^ O “sakop nga distrito.”
^ O “prinsipe.”
