Isaia 40:1-31
40 “Fakamafanafana atu, fakamafanafana atu oku tino,” ko pati a te otou Atua.+
2 “Faipati atu ki te loto o Ielusalema,Kae folafola atu ki ei me i tena galuega ne ‵tau o fai ko oti ne fakataunu,Ana mea ‵se ko oti katoa ne ‵togi.+
Ko oti ne maua ne ia se fakasalaga kātoa* mō ana agasala katoa, mai i te lima o Ieova.”+
3 E isi se leo o se tino e kalaga i te koga lavaki:
“Fakaavanoa* te auala o Ieova!+
Fai te auala lasi ke ‵tonu+ i loto i te toafa mō te ‵tou Atua.+
4 Fai ke fakama‵luga aka a vanu katoa,Kae ke fakama‵lalo a mauga ‵lasi mo mauga fo‵liki katoa.
A te laukele ponapona e ‵tau o fakalaugatasi,Kae ko te laukele fatufatua ke fai pelā me se vanu laugatasi.+
5 A te ‵malu o Ieova ka fakaasi atu,+Kae ko tino katoa ka lavea fakatasi ne latou,+Me ko oti ne faipati mai a te gutu o Ieova.”
6 Fakalogo! E fai mai se tino: “Kalaga atu!”
E fesili atu te suā tino: “Se a te mea e kalaga atu ne au?”
“A tino katoa ne mouku lanu launiu.
A te lotou a‵lofa fakamaoni katoa e fai pelā mo pula o te fatoaga.+
7 A te mouku lanu launiu e pakupaku,A te pulalakau e magemage,+Me ne ‵pusi atu a te mānava o Ieova ki luga i ei.+
E tonu, a tino ne mouku lanu launiu eiloa.
8 A te mouku lanu launiu e pakupaku,A te pulalakau e magemage,Kae ko te muna a te ‵tou Atua e tumau ki te se-gata-mai.”+
9 Fano ki luga i se mauga maluga,A koe e te fafine e aumai ne ia te tala ‵lei ki Siona.+
Fakamaluga aka tou leo mo te malosi,A koe e te fafine e aumai ne ia te tala ‵lei ki Ielusalema.
Fakamaluga aka tou leo, kae sa mataku.
Faka‵pula atu ki fakai o Iuta: “Tenei te otou Atua.”+
10 Kiloke! A te Aliki Sili ko Ieova ka vau mo te malosi,Kae ko tena lima ka pule mō ia.+
Kiloke! A tena taui tenā e nofo mo ia,Kae ko te ‵togi telā e ‵togi atu ne ia e tuku i ana mua.+
11 E pelā me se tausi mamoe ka tausi ne ia ana lafu mamoe.+
Ka fakamaopoopo mai ne ia a mamoe ki tena lima,Kae ka sau aka ne ia latou i ana fatafata.
Ka takitaki faka‵lei ne ia a latou kolā koi faū olotou tama.+
12 Ko oi ne fua ne ia a vai ki te alofilima o tena lima+Kae fua ne ia a te lagi ki te aga o tena lima?*
Ko oi ne ‵luku mai ne ia a ‵pefu o te lalolagi ki loto i se mea fua+Io me fua aka a mauga ki te fua mea ‵mafaMo tamā mauga ki te fua fakatautau?
13 Ko oi ne fua ne ia* te agaga o Ieova,Kae ko oi e mafai o fakatonu a ia e pelā me ko tena tino fakatonutonu?+
14 Ko oi ne fesili atu a ia ki ei ke maua te malamalama,Io me ko oi ne akoako atu ki a ia a te auala o te fai mea tonu,Io me akoako a ia ki te iloaga,Io me fakaasi atu ki a ia a te auala o te malamalama tonu?+
15 Kiloke! A atufenua e pelā me se motiga vai mai i se paketi,Kae e fai latou e pelā me se ‵pefu manifinifi i luga i fua fakatau‵tau.+
Kiloke! E sau aka ne ia a fenua fo‵liki e pelā me se ‵pefu manifinifi.
16 Ke oko ki lakau o Lepanona e se lava ke fai ei ke ka faeloa se afi,*Kae ko ana manu o te vao e se lava ke ofo atu e pelā me se taulaga ‵sunu.
17 A atufenua katoa e fai pelā me ne mea e seai i ana mua;+E kilo atu a ia ki ei e pelā me ne mea sē aoga, e pelā me ne mea sē ‵tonu.+
18 Ko oi e mafai o faka‵pau ne koe ki ei a te Atua?+
Se a te mea e tai ‵pau mo ia e mafai o tuku ne koe ki ana tafa?+
19 E faite ne se tufuga faite mea se tupua,E ufi ne te tino faite mea ki fiti a te mea tenā ki te aulo,+Kae teuteu ne ia ki filifili siliva.
20 E filifili ne ia se lakau mo fai tena tusaga,+Se lakau telā ka se pala.
E salasala a ia ki se tufuga apoKe fakatoka se tupua faite telā ka se mafai o siga.+
21 E a, e se iloa ne koe?
E a, e seki logo koe?
E a, e seki fakailoa atu ki a koe mai i te kamataga eiloa?
E a, e seki malamalama koe mai i te taimi ne fakatoka ei a fakavae o te lalolagi?+
22 A te Atua e nofo i luga i te lalolagi pukupuku,+Kae ko tino e ‵nofo i ei e fai pelā me ne sikusikulauniu.
E ‵fola ne ia te lagi e pelā me se laugatu manifinifi,Kae fakamafola ne ia e pelā me se faleie ke ‵nofo latou i ei.+
23 E fakaseaoga ne ia te pulega a ofisa ma‵lugaKae fai a famasino* o te lalolagi e pelā me se mea sē tonu.
24 E seki ‵toki aka eiloa latou,E seki ‵toki aka eiloa,A olotou tafito e seki ‵mau olotou aka i te laukele,Kae e agi atu te matagi ki a latou kae paku‵paku,Kae e agina latou kea‵tea ne te matagi e pelā me ne kausaito.+
25 “Ko oi te tino e mafai o fakatusa ne koutou au ki ei kae fai ke ‵pau māua?” ko pati a te Atua Tapu.
26 “Kilo aka ou mata ki te lagi ke lavea ne koe.
Ko oi ne faite ne ia a mea konei?+
Ko te Atua telā ne aumai ne ia te lotou kautau e ‵tusa mo te lotou aofaki;E kalaga atu a ia ki a latou katoa i olotou igoa.+
Ona ko te lasi o tena malosi mo te fakaofoofogia o tena ‵mana,+
E seai se mea i mea konā e galo.
27 Kaia e fai mai ei koe, e Iakopo, kae kaia e folafola mai ei koe, e Isalaelu,‘A toku auala e ‵funa mai i a Ieova,Kae e se maua ne au te fakamasinoga tonu mai i te Atua’?+
28 E a, e se iloa ne koe? E a, e seki logo koe?
A Ieova, te Atua telā ne faite ne ia a mea katoa i te lalolagi, ko te Atua ki te se-gata-mai.+
E se mafai a ia o fi‵ta io me vāivāi.+
A tena malamalama e se mafai o sukesukegina.+
29 E tuku atu ne ia te malosi ki te tino vāivāiKae fakakatoatoa ne ia te malosi o tino kolā ko se lava te malosi.+
30 A tama‵liki tāgata ka fi‵ta kae vāi‵vai,Kae ko tamataene ka pakū kae ‵siga,
31 Kae ko tino kolā e fakamoe‵moe ki a Ieova ka toe ma‵losi.
Ka eva latou i kapakau e pelā me ne aeto.+
Ka ‵tele latou kae e se vāi‵vai;Ka sa‵sale latou kae e se fi‵ta.”+
Fakamatalaga mai lalo
^ Io me “maua fakalua.”
^ Io me “Fakatoka.”
^ Ko te ‵mao o te mata o te matikao lima matua mo te matikao lima foliki māfai e ‵tala te lima. Onoono ki te MF E14.
^ Io me kāti, “e malamalama i.”
^ Io me “e se mafai o lava a fafie e maua i ei.”
^ Io me “pule.”