Isaia 29:1-24
29 “Kalofa eiloa i a Alielu,* Alielu, te fakai ne nofo i ei a Tavita!+
Tumau eiloa i tausaga katoa;Ke tumau faeloa te faiga o ‵kaiga fia‵fia.+
2 Ka aumai ne au te puapuaga ki Alielu,+Kae ka fanoanoa kae ‵tagi fanoanoa a tino i ei,+Kae ka fai tou fafine ki a au e pelā me se koga e ‵sunu ei a taulaga ki te Atua.+
3 Ka nofo au i feitu katoa o ‵teke atu ki a koe,Kae ka taofi fakapagota ne au koe i loto i ‵pui lakauKae faka‵tu aka a ‵pui e fakatamilo i a koe.+
4 A koe ka tuku ifo ke malalo;Mai te laukele ka faipati mai koe,Kae ko pati e fai mai ne koe ka se manino ‵lei ona ko te ‵pefu.
A tou leo ka vau mai te laukele+E pelā me se leo o se tino e fesokotaki mo agaga,Kae ko au pati ka ‵tagi mai te ‵pefu.
5 A te potukau o ou fili* ka fai pelā me se pauta ne faka‵ma,+A te potukau o pule fakasaua ka fai pelā me ne kaiga o saito e agi i te matagi.+
Kae ka tupu fakavave fua a te mea tenā.+
6 A Ieova o kautau ka saga tonu mai ki a koeFakatasi mo fa‵tili mo mafuie mo te logoa,Fakatasi mo se matagi malosi mo se afā mo ulaga o se afi ‵ka.”+
7 Kae ko te potukau o fenua katoa kolā e taua atu ki a Alielu+—Ko latou katoa kolā e taua atu ki tou fafine,Ko taoa ma‵losi e ‵teke atu ki tou fafine,Mo latou kolā e aumai ne latou te puapuaga ki tou fafine—Ka fai pelā me se moemiti, se fakaasiga i te po.
8 Ao, ka pelā eiloa me se tino fiakai e moemiti i a ia e kai,Kae e ala aka mo te fiakai,Kae e pelā me se tino fiainu e moemiti i a ia e inu,Kae e ala aka mo te fi‵ta mo te fiainu.
Ka penā eiloa te mea ka tupu ki te potukau o fenua katoaKolā e taua mai ki te Mauga o Siona.+
9 Ke ‵poi kae ofo;+Ke faka‵kivi otou mata kae ke ‵kivi eiloa.+
E ko‵nā latou, kae e se ona ko te uaina;E takasē‵se latou, kae e se ona ko meainu ma‵losi.
10 Me ko oti ne tuku atu ne Ieova a te agaga o te moe palapala ki a koutou;+Ko oti ne ‵pono ne ia otou mata, e pelofeta,+Kae ko oti ne ufi ne ia otou ulu, e tino fakamatala fakaasiga.+
11 A fakaasiga katoa e fai pelā me ne pati i se tusi ne faka‵mau faka‵lei ki a koutou.+ Kafai e tuku atu ki se tino telā e iloa ne ia o faitau, kae fai atu: “Fakamolemole faitau ki luga te mea tenei,” ka fai mai a ia: “E se mafai ne au, me ko oti ne faka‵mau faka‵lei.”
12 Kae kafai e tuku atu ne latou te tusi ki se tino telā e se iloa ne ia o faitau, kae fai atu: “Fakamolemole faitau ki luga te mea tenei,” ka fai mai a ia: “E se iloa ne au o faitau.”
13 Muna a Ieova: “A tino konei e fakapili‵pili mai ki a au i olotou gutuKae e āva mai latou ki a au i olotou laugutu,+Kae ko olotou loto e ‵mao ‵ki mai i a au;Kae e fakavae te lotou ma‵taku ki luga i fakatonuga a tāgata kolā ne akoako atu ki a latou.+
14 Tela la, ko au te Atua telā ka toe fai ne ia a mea fakaofoofogia ki tino konei,+Ko te fia o mea fakaofoofogia;Kae ka fakaseai atu te poto o olotou tāgata ‵poto,Kae ka ‵funa foki te malamalama o olotou tāgata ‵poto.”+
15 Kalofa eiloa i a latou kolā e taumafai malosi o ‵funa olotou palani* mai i a Ieova.+
E fai olotou faifaiga i se koga pouli,Kae fai aka: “Ko oi e lavea ne ia tatou?
Ko oi e iloa ne ia a mea e uiga ki a tatou?”+
16 Ko oti ne ‵fuli faka‵kotua ne koe a mea!
E a, e ‵tau o ‵pau a te tino faite mea ki kele mo te kele?+
E a, e ‵tau o fai atu penei se mea ne faite ki te tino ne faite ne ia te mea tenā:“Ne seki faite ne ia au”?+
Kae e a, e mafai o fai atu penei se mea ne faite ki te tino ne faite ne ia te mea tenā:
“E seai sena malamalama”?+
17 I se taimi toetoe fua, ka ‵fuli ei a Lepanona ki se vao lakau kaina,+Kae ko te vao lakau kaina tenā ka fai pelā me se vao lakau lasi.+
18 I te aso tenā, a tino taliga ‵tuli ka ‵logo i pati i te tusi,Kae mai i te pouli mo te pouli tagataga ka lavea ei ne tino ‵kivi a mea.+
19 A tino agamalu ka fia‵fia malosi i a Ieova,Kae ko tino ma‵tiva ka fia‵fia i te Atua Tapu o Isalaelu.+
20 Me i tino pule fakasaua ka se toe ai,A te tino faipati fakamatamata ka oko mai tena gataga,Kae ko latou katoa kolā e matapula‵pula o fai a mea ma‵sei ka fakaseai,+
21 A tino pati ‵loi e fai ne latou a nisi tino ke agasala,Kolā e fakatakato ne latou se malei mō te tino e leoleo i te mataloa o te ‵pui o te fakai,+Kae e auala i kinauga sē aoga e fakafiti ne ia a te fakamasinoga tonu o te tino amiotonu.+
22 Tela la, konei a pati a Ieova, telā ne fakasao ne ia a Apelaamo,+ ne fai ki te kāiga o Iakopo:
“A Iakopo ka se toe masiasi,Kae ka se toe fakalau ‵kena ana mata.*+
23 Me kafai e lavea ne ia ana tama‵liki,Kolā ko galuega o oku lima, i te va o latou,+Ka faka‵malu ne latou toku igoa;Ao, ka faka‵malu ne latou te Atua Tapu o Iakopo,Kae ka ‵tu latou mo te ofo i te Atua o Isalaelu.+
24 A latou kolā e fai amioga ma‵sei i olotou loto ka maua ne latou te malamalama,Kae ko latou kolā e fameo ka talia ne latou a pati fakatonutonu.”
Fakamatalaga mai lalo
^ Kāti e fakauiga ki “Te Koga e ‵Sunu ei a Taulaga ki te Atua,” kāti e fakasino atu ki Ielusalema.
^ Epelu, “tino fakaa‵tea.”
^ Io me “pati fakatonutonu.”
^ Mai te mavale mo te fanoanoa.
