Isaia 33:1-24

  • Te fakamasinoga mo te fakamoemoega mō tino amio‵tonu (1-24)

    • A Ieova ko te Famasino, Tino Fai Tulafono mo te Tupu (22)

    • Ka seai se tino e fai aka: “Au ko masaki” (24)

33  Kalofa eiloa i a koe,* ko koe te tino fakamasei mea telā e seki fakamaseigina;+Ko koe te tino faitogafiti telā e seki fakatogafitigina! Kafai ko oti ne fakamasei ne koe a mea, ko fakaseai ei koe.+ Kafai ko oti ne fai ne koe au togafiti, ko fakatogafiti ei koe.   Ieova, talia mai matou.+ E fakamoe‵moe eiloa matou ki a koe. Ke fai koe mo fai te motou lima*+ i tafataeao katoa,Ao, ko te motou fakaolataga i te taimi o te puapuaga.+   A tino ka ‵tele ma lagona ne latou te leo o te ‵numi valevale. Ka salalau valevale a atufenua māfai e tu aka koe.+   E pelā mo seakelise fe‵kai māfai ko maopoopo, ka fakamaopoopo mai penā otou mea ne maua i te taua;A tino ka fakatau ‵tele ki luga i ei e pelā me ne mumuga seakelise.   A Ieova ka fakamaluga aka,Me e nofo a ia i te koga maluga i luga. Ka faka‵fonu ne ia a Siona ki te fakamasinoga tonu mo te amiotonu.   Ko ia e faka‵mautakitaki ne ia otou aso;Mo te lasi o te fakaolataga,+ te poto, te iloaga mo te mataku ki a Ieova+​—Tenei tena koloa.   Kiloke! A olotou tāgata ‵mafi e ‵tagi i auala;A avefekau o te filemu e ‵tagi mautuutu.   A auala ‵lasi ko seai ne tino i ei;Ko seai ne tino e faima‵laga i tamā auala. Ko oti ne ofa ne ia* te feagaiga;Ko oti ne ‵teke atu a ia ki fakai;E seai se āva e fakaasi atu ne ia ki te tagata.+   E fanoanoa* te laukele kae gasolo o magemage. A Lepanona ko masiasi;+ ko pala. A Salona ko fai pelā me se toafa,Kae ko Pasana mo Kalamelu e lūlū kea‵tea a lā laulakau.+ 10  “Nei la, ka tu aka au,” ko pati a Ieova,“Nei la, ka fakamaluga aka au ne au eiloa;+Nei la, ka fakaeke au ne au eiloa. 11  Ne faka‵fua mai ne koutou a mouku malō kae fa‵nau mai a kausaito. Ka fakaseai koutou ne otou mafaufauga* e pelā me se afi.+ 12  Kae ko tino ka fai pelā me ne lase ‵ka. E pelā me ne lakau tala‵tala ko ‵kati ki lalo, ka ula aka latou i te afi.+ 13  A koutou kolā e ‵mao, faka‵logo mai ki te mea ka fai ne au! Kae ko koutou kolā e ‵pili mai, fai ke iloa ne koutou toku malosi! 14  A tino agasala i Siona ko ma‵taku;+A aposetate* ko pole‵pole: ‘Ko oi te tino i a tatou e mafai o ola i te koga e isi se afi ‵ka ulaula i ei?+ Ko oi te tino i a tatou e mafai o ola fakatasi mo te afi ‵ka telā e se mafai o tamate?’ 15  Ko te tino telā e tumau i te sasale i te amiotonu,+Telā e faipati ki te fai mea tonu,+Telā e ‵teke ki te sē fakamaoni, mo te mauaga o mea i auala sē ‵tonu,Telā e se talia ne ana lima se ‵togi fakakolekole kae e se puke atu ki ei,+Telā e ‵pono ana taliga ki faipatiga e fai ki te fakamaligiga o toto,Kae telā e ‵pono ana mata ke ‵kalo kea‵tea mai te kilo atu ki te mea masei 16  —Ka nofo a ia i koga ma‵luga;A tena lafiga tokagamalie ka tu i luga i kaupapa ma‵losi,Ka fakatoka atu eiloa ana meakai,Kae ka se mafai o palele ana vai.”+ 17  Ka lavea ne ou mata se tupu gali;Ka lavea ne ia se fenua ‵mao. 18  Ka masaua ne koe i tou loto a te mea fakamataku: “Tefea te failautusi? Tefea te tino ne fua ne ia te lafoga?+ Tefea te tino ne lau ne ia a taoa?” 19  Ka se toe lavea ne koe se fenua fakamatamata,Se fenua telā e faigata ke malamalama i te lotou ‵gana,Telā e se mafai o malamalama koutou i te lotou ‵gana ‵tagi fakaa‵tea.+ 20  Kilo atu ki Siona, te fakai o ‵tou ‵kaiga fia‵fia!+ Ka lavea eiloa ne ou mata a Ielusalema e pelā me se koga ‵nofo tokagamalie,Se faleie telā e se mafai o fakagasue.+ A pine o ana faleie ka se ‵futi eiloa ke ‵to,Kae ka seai eiloa ne ana lōpu e ‵motu. 21  I konā ka fai ei a te Atua Maluga ko Ieova,E pelā me se koga o vaitafe ki a tatou, e pelā me ne alavai lauefa,Ko koga kolā e seai ne fuavaka e olo i eiKae seai ne vaka ‵lasi e olo i loto i ei. 22  Me i a Ieova ko te ‵tou Famasino,+A Ieova ko te ‵tou Tino Fai Tulafono,+A Ieova ko te ‵tou Tupu;+A ia ko te Atua telā ka faka‵sao ne ia tatou.+ 23  A otou lōpu ka tau‵tau ifo ki lalo;E se mafai o taofi aka ne latou a te tila io me ‵fola ke mafola te la o te vaka. I te taimi tenā, ka vaevae aka ei a mea e uke kolā ne maua mai i te taua;Ke oko ki tino ‵pili, ka uke olotou mea e maua mai i mea ne ‵fao.+ 24  Kae ka seai se tino e fai aka: “Au ko masaki.”+ A tino kolā e ‵nofo i te fenua ka fakamagalogina olotou mea ‵se.+

Fakamatalaga mai lalo

E fakasino atu ki Asulia.
Io me “malosi.”
E fakasino atu ki te fili.
Io me kāti, “malō.”
Epelu, “agaga.”
Io me “tino ‵teke.”