Isaia 21:1-17

  • Se fekau ‵mafa e uiga ki te koga lavaki o te tai (1-10)

    • Ne kilokilo faka‵lei mai luga i te faleleoleo maluga (8)

    • “A Papelonia ko pakū!” (9)

  • Se fekau ‵mafa e uiga ki Tuma mo te koga laugatasi i te toafa (11-17)

    • “Te leoleo, e a, te po?” (11)

21  Se fekau ‵mafa e uiga ki te koga lavaki o te tai:*+ E vau e pelā me se matagi malosi telā e agi mai i saute,Mai i te koga lavaki, mai i se fenua fakamataku.+   E isi se fakaasiga faigata ne fakailoa mai ki a au: A te tino faitogafiti ko fai ana togafiti,Kae ko te tino fakamasei mea ko fai ana fakamaseiga. Fanaka ki luga, e Elama! Nikoi atu, e Metai!+ Ka fakagata ne au te mānava fi‵ta ne fakamāfua ne tou fafine.+   Tenā te pogai ko mafatia malosi ei au.*+ Ko oko mai ki a au te ‵mae,E pelā me se fafine ko fanau. Au ko tō puapuaga ke fakalogo ki se mea;Au ko tō fakalavelave ke kilo atu ki se mea.   A toku loto ko vāivāi; au ko polepole i te mataku. A te afiafi ne olioli au ki ei ko fai ei au ke polepole.   Fakatoka te taipola kae fakatoka a nofoga! ‵Kai kae inu!+ ‵Tu ki luga, koutou e pelenise, ‵mili* aka te talita!   Me konei a pati ne fai mai ne Ieova ki a au: “Fano, fai se leoleo ke tu kae ko mea kolā e lavea ne ia ke lipoti mai.”   Kae ne lavea ne ia se kaliota tau fakatasi mo se avā solofanua,Se kaliota tau mo asini,Se kaliota tau mo kamela. Ne kilokilo faka‵lei atu a ia kae saga tonu atu ki ei.   Tenā ne kalaga atu ei a ia e pelā me se leona: “I luga i te faleleoleo maluga, e Ieova, e tu faeloa au i ei i te ao, Kae e nofo faeloa au i toku koga leoleo i po katoa.+   ‵Kilo atu ki mea konā e ‵mai: Ko tāgata i se kaliota tau mo se avā solofanua!”+ Tenā ne faipati aka ei a ia, ana muna: “Ko pakū tou fafine! A Papelonia ko pakū!+ A tupua faite katoa o ana atua ko oti ne foafoa likiliki i te laukele!”+ 10  Oku tino kolā ko oti ne lakalaka e pelā me ne saito,Ko mea e maua* mai i taku koga solo saito,+Ko oti ne lipoti atu ne au ki a koe a mea ne lagona ne au mai i a Ieova o kautau, te Atua o Isalaelu. 11  Se fekau ‵mafa e uiga ki Tuma:* E isi se tino e kalaga mai ki a au mai i Seila:+ “Te leoleo, e a, te po? Te leoleo, e a, te po?” 12  Muna a te leoleo: “A te tafataeao ka oko mai, e pelā foki te po. Kafai e fesili mai koutou, fesili mai. Toe ‵foki mai!” 13  Se fekau ‵mafa e uiga ki te koga laugatasi i te toafa: I te vao i te koga laugatasi i te toafa ka ‵moe ei koutou i te po,E te kau faima‵laga o Titana.+ 14  Aumai a vai ke fakafetaui atu ki te tino telā e fiainu,Koutou e tino o te fenua o Teema,+Kae aumai ne falaoa ma te tino telā ko tele kea‵tea. 15  Me ne ‵tele kea‵tea latou mai i pelu, mai te pelu telā ko tapale ki tua,Mai i te kausana telā ko ofe, kae mai te fakamataku o te taua. 16  Me konei eiloa a pati ne fai mai ne Ieova ki a au: “I loto i te tausaga e tasi, e pelā mo tausaga o se tino galue ‵togi,* a te ‵malu kātoa o Ketala+ ka gata atu. 17  A te kau sana matasana o Ketala kolā ka ‵toe mai e mu‵tana fua, me konā pati ne fai ne Ieova te Atua o Isalaelu.”

Fakamatalaga mai lalo

Kāti e fakasino ki te kogā koga o Papelonia i aso mua.
Epelu, “oku kautega ko ‵mae malosi.”
Io me “faū.”
Epelu, “tama tagata.”
Tena uiga “Nofo Filemu.”
Io me “e lau faka‵lei e pelā me se tino galue ‵togi”; telā ko te tausaga kātoa e tasi.