Isaia 36:1-22

  • Ko ulu mālō atu a Sanelivi ki Iuta (1-3)

  • Ko fakaitaita ne te tagata ave ipu uaina a Ieova (4-22)

36  I te 14 tausaga o te pulega a te Tupu ko Hesekia, ne fanatu a Sanelivi te tupu o Asulia+ o taua ki fakai katoa o Iuta kolā e ‵pui faka‵lei kae ne puke ne ia.+  Tenā ne uga atu ei ne te tupu o Asulia a te tagata ave ipu uaina*+ fakatasi mo se kautau lasi mai Lakisa+ ki te Tupu ko Hesekia i Ielusalema. Ne ‵tu latou i tafa o te alavai o te vai mai luga,+ telā e tu i tafa o te auala lasi o te laukele o te tagata ‵ta gatu.+  Tenā ne o‵mai ei ki a ia a Eliakimo+ te tama tagata a Hilikia, telā e pule atu ki te kaufale,* Sepina+ te failautusi, mo Ioaha te tama tagata a Asafo te tino fakamau fakamatalaga.  Ne fai atu a te tagata ave ipu uaina ki a latou: “Fakamolemole fai ki a Hesekia, ‘Konei a pati a te tupu sili, te tupu o Asulia ne fai mai: “Se a te pogai o tou loto talitonu?+  E fai mai koe, ‘E isi saku aofaga mo toku malosi ke taua atu,’ kae ko pati konei ne pati fua sē aoga. Ko oi e talitonu koe ki ei, ko mafai ei ne koe o ‵teke mai ki a au?+  Kiloke! A koe e talitonu ki te ‵lago mai o te mouku loa tenei ko palapala ko Aikupito, telā kafai e fakapale ki ei se tagata e sulufia tena alofilima, ko pu ei. Tenā eiloa te mea e fai ne te Falao, te tupu o Aikupito, ki tino katoa kolā e tali‵tonu ki a ia.+  Kae kafai e fai mai koe ki a au, ‘A matou e tali‵tonu ki a Ieova te motou Atua,’ e a, e se i a ia a koga ma‵luga mo fatafaitaulaga kolā ne tapale kea‵tea ne Hesekia,+ kae fai atu a ia ki Iuta mo Ielusalema, ‘E ‵tau mo koutou o ifo ki lalo i te fatafaitaulaga tenei’?”’+  Nei la, fakamolemole, ke fai atu ne koe te peti tenei ki toku aliki te tupu o Asulia:+ Ka tuku atu ne au e 2,000 solofanua māfai e mafai ne koe o ‵sala a tino faka‵tele solofanua e lava ke faka‵tele a solofanua konā.  E mafai pefea o ‵tuli ne koe se kovana e tokotasi telā ko te ‵toe tino sē taulia i tavini a toku aliki, kae talitonu koe ki Aikupito ki ana kaliota mo tāgata faka‵tele solofanua? 10  E a, e se ko te taliaga a Ieova ne vau ei au o taua kae fakamasei te fenua tenei? Ko Ieova eiloa ne fai mai ki a au, ‘Fano o taua ki te fenua tenei kae fakamasei atu.’” 11  I konā loa, fai atu ei a Eliakimo mo Sepina+ mo Ioaha ki te tagata ave ipu uaina:+ “Fakamolemole, faipati mai ki au tavini i te ‵gana Alamaika,*+ me i a matou e malamalama i ei; sa faipati mai ki a matou i te ‵gana a tino Iutaia i te mea ma lagona ne tino i luga i te ‵pui.”+ 12  Kae ne fai atu te tagata ave ipu uaina: “E mata, ne uga mai au ne toku aliki ke fai atu fua a pati konei ki te otou aliki mo koutou? E mata, e se ‵tau foki o fai atu ki tāgata konā e saga‵saga mai i luga i te ‵pui, ko latou kolā ka ‵kai ki olotou fekau kae inu ki olotou mimi fakatasi mo koutou?” 13  Tenā ne tu aka ei a te tagata ave ipu uaina kae kalaga atu i se leo maluga i te ‵gana a tino Iutaia,+ ana muna: “Faka‵logo mai ki pati a te tupu sili, te tupu o Asulia.+ 14  Konei a pati a te tupu ne fai mai, ‘Sa talia ne koutou ke fakaloiloi koutou ne Hesekia, me e se mafai o faka‵sao ne ia koutou.+ 15  Kae sa talia ke fai koutou ne Hesekia ke tali‵tonu ki a Ieova+ i ana pati: “Ka faka‵sao eiloa tatou ne Ieova, kae ka se tuku atu a te fakai tenei ki lima o te tupu o Asulia.” 16  Sa faka‵logo ki a Hesekia, me konei a pati ne fai mai ne te tupu o Asulia: “Fai ke maua se va filemu mo au kae talia ke takavale* koutou, kae ko koutou taki tokotasi ka ‵kai ki otou vine mo otou mati kae inu ki vai mai i otou vaikeli eiloa, 17  ke oko ki te taimi e vau ei au o ave koutou ki se fenua e ‵pau mo te otou fenua,+ se fenua o saito mo uaina ‵fou, se fenua o falaoa mo togavine. 18  Ke mo a ma takitaki ‵se koutou ne Hesekia i ana pati, ‘Ka faka‵sao tatou ne Ieova.’ E mata, kai faka‵sao aka eiloa ne se atua o atufenua a te lotou fenua mai i lima o te tupu o Asulia?+ 19  Kofea a atua o Hamata mo Apaata?+ Kofea a atua o Sefavaima?+ E mata, ko oti ne faka‵sao ne latou a Samalia mai i oku lima?+ 20  Ko oi mai i atua katoa o fenua konei ko oti ne fakasao ne ia te lotou fenua mai oku lima, ko te mea ke fakasao ne Ieova a Ielusalema mai i oku lima?”’”+ 21  Kae ne ‵nofo filemu eiloa latou kae seai se pati e fai atu ki a ia, me tenei te fakatonuga a te tupu, “E seai eiloa se otou tali e fai atu ki a ia.”+ 22  Kae ko Eliakimo te tama tagata a Hilikia, telā e pule i te kaufale,* Sepina+ te failautusi, mo Ioaha te tama tagata a Asafo te tino fakamau fakamatalaga ne olo atu ki a Hesekia mo olotou gatu ko oti ne saesae kae fai atu ki a ia a pati a te tagata ave ipu uaina.

Fakamatalaga mai lalo

Io me “te Lavesaki.”
Io me “palesi.”
Io me “Sulia.”
Epelu, “Fai se fakamanuiaga fakatasi mo au kae vau ki tua i a au.”
Io me “palesi.”