Isaia 45:1-25
45 Konei a pati a Ieova ne fai mai ki tena tino fakaekegina, ki a Kulesa,+Telā i o ia te lima fakaatamai ne puke au ki ei+Ke fakatakavale a atufenua i ana mua,+Ke ave kea‵tea a meatau a tupu,Ke ‵tala i ana mua a mataloa kolā e taki lua olotou feitu,Ko te mea ke se ‵pono a mataloa o ‵pui o te fakai:
2 “Au ka fano i ou mua,+Kae ka fakalaugatasi ne au a tamā mauga.
A mataloa kopa ka ofa likiliki ne au,Kae ko fiti faka‵lava ka ‵kati ne au ki lalo.+
3 Ka tuku atu ne au ki a koe a koloa i te pouligaMo koloa ‵funa i koga ne ‵funa i ei,+Ko te mea ke iloa ne koe i a au ko Ieova,Ko te Atua o Isalaelu, telā e kalaga atu ki a koe i tou igoa.+
4 Ona ko taku tavini ko Iakopo mo Isalaelu taku tino filifilia,Ko kalaga atu au ki a koe i tou igoa.
Ko tuku atu ne au ki a koe se igoa fakaaloalogina, faitalia me ne seki iloa ne koe au.
5 Au ko Ieova, kae e seai aka foki se isi tino.
E seai aka foki se isi Atua kae na ko au.+
Ka fakamalosi ne au koe, faitalia me ne seki iloa ne koe au,
6 Ko te mea ke iloa ne tinoMai te saega o te la ke oko ki te taimi e tō ei*Me e seai se tino i oku tafa.+
Au ko Ieova, kae e seai aka foki se isi tino.+
7 E faite ne au te mainaga+ kae faite foki ne au te pouliga,+E fai ne au ke maua te filemu+ kae kamata ne au a fakalavelave;+Au, Ieova, e fai ne au a mea katoa konei.
8 A koutou e lagi, ke faka‵to ifo a vaiua mai luga;+Fai ke ‵ligi ifo ne kaumana a te amiotonu.
Fai ke matala a te lalolagi kae ke fua malosi mai i ei te fakaolataga,Kae fai ke sae aka i ei a te amiotonu i te taimi eiloa e tasi.+
Au, Ieova, ne faite ne au a te mea tenā.”
9 Kalofa eiloa i te tino e fakataufai* ki te Atua telā ne faite ne ia a ia,Me i a ia se mea fua ne faite ki te keleI tafa o nisi mea ne faite ki te kele kolā e ta‵tela i te laukele!
E mata, e ‵tau o fai atu a te kele ki te Tino faite mea ki kele: “Se a te mea e faite ne koe?”+
Io me e a, e ‵tau o fai atu tau mea ne faite: “E seai ne ana lima”?*
10 Kalofa eiloa i te tino e fai atu ki se tamana: “A koe ko te tamana o oi?”
Kae ki se fafine: “Se a te mea ne fanau mai ne koe?”
11 Konei a pati a Ieova te Atua Tapu o Isalaelu,+ te Atua telā ne faite ne ia a ia:
“E a, ka fakafesili ne koe au e uiga ki mea ka oko maiKae fakatonu mai au e uiga ki aku tama tāgata+ mo galuega a oku lima?
12 Ne faite ne au te lalolagi+ kae faite foki a te tagata ke nofo i ei.+
Ne ‵fola ne au a te lagi ki oku lima eiloa,+Kae tuku atu aku fakatonuga ki olotou kautau katoa.”+
13 “Ne puti aka ne au se tagata i te amiotonu,+Kae ka fai ne au ana auala katoa ke ‵tonu.
Ko ia te tino ka faite ne ia toku fakai+Kae fakasaoloto oku tino ne ave fakapagota+ e aunoa mo se ‵togi io me se ‵togi fakakolekole,”+ ko pati a Ieova o kautau.
14 Konei a pati a Ieova ne fai mai:
“A te maumea* o Aikupito mo koloa* o Aitiope mo tino Sapeana, ne tāgata ‵loa,Ka o‵mai ki a koe kae ka fai mo ou tino.
Ka sa‵sale latou i ou tua mo seni pikifao.
Ka o‵mai latou kae ifo ki lalo i a koe.+
Ka ‵talo latou ki a koe kae fai atu, ‘E tonu eiloa i te Atua e fakatasi mo koe,+Kae e seai aka foki se isi tino; e seai aka foki se isi Atua.’”
15 E tonu, a koe ko te Atua telā e ‵funa faeloa ou auala,Te Atua o Isalaelu, te Fakaola.+
16 A latou katoa ka ma‵vale kae fakamasiasigina;A tino faite tupua ka olo katoa mo te masiasi.+
17 Kae ko Isalaelu ka fakasao ne Ieova ki te fakaolataga se-gata-mai.+
A koe ka se mavale io me masiasi ki te se-gata-mai.+
18 Me konei a pati ne fai mai ne Ieova,Te Mafuaga o te lagi,+ te Atua tonu,
Te Atua telā ne fakafoliga ne ia te lalolagi, te Atua telā ne faite ne ia kae faka‵mautakitaki ne ia,+Telā ne seki faite fua ne ia ke se aoga, kae ne faite ke ‵nofo i ei a tino:+
“Au ko Ieova, kae seai se isi tino aka.
19 Au ne seki faipati i se koga ‵funa,+ i se fenua pouli;Au ne seki fai atu ki te tama* a Iakopo,‘‵Sala mai ki a au mo te sē aoga.’
Au ko Ieova, telā e faipati ki te amiotonu kae folafola atu te fai mea tonu.+
20 Maopoopo fakatasi kae ‵mai.
Fakapili‵pili fakatasi mai, koutou e tino ne ‵sao mai atufenua.+
E se iloa ne latou se mea, a latou kolā e tauave ne latou a tupua faiteKae ‵talo ki se atua telā e se mafai o faka‵sao latou.+
21 Fai te otou lipoti, kae avaka te otou tagi.
Fai ke fono fakatasi latou mo te ‵kau fakatasi.
Ko oi ne ‵valo mai ne ia a te mea tenei mai aso mua eiloaKae folafola atu ne ia mai i taimi ko ‵teka?
E a, e se ko au, Ieova?
E seai aka foki se isi Atua kae na ko au;Se Atua amiotonu kae se Fakaola,+ e seai se isi tino i oku tafa.+
22 ‵Fuli mai ki a au ke ‵sao koutou,+ e te lalolagi kātoa,Me i a au ko te Atua, kae seai aka foki se isi tino.+
23 Au ne tauto ki a au eiloa;Ko oti ne tō ki tua a te pati mai toku gutu i te amiotonu,
Kae ka se toe foki mai:+
A tulivae katoa ka to‵tuli ifo ki a au,A gutu katoa ka tau‵to i te fakamaoni+
24 Kae fai atu, ‘E tonu, e maua i a Ieova a te tinā amiotonu mo te malosi.
A latou katoa kolā e kaitāua malosi ki a ia ka o‵mai ki ana mua mo te ma‵vale.
25 Ka fakamaoni aka ne tama* katoa a Isalaelu, e auala i a Ieova, i a latou e ‵tonu,+Kae e auala i a ia ka fai‵pati fakamata‵mata latou.’”
Fakamatalaga mai lalo
^ Io me “Mai saegala ki togala.”
^ Io me “kinau.”
^ Io me kāti, “Io me e a, e ‵tau o fai atu te kele: ‘A tau mea ne faite e seai ne ana kau’?”
^ Io me kāti, “tino ga‵lue ‵mafa.”
^ Io me kāti, “tino fai pisinisi.”
^ Epelu, “fanau.”
^ Epelu, “fanau.”
