Isaia 8:1-22
8 Ne fai mai a Ieova ki a au: “Puke se laupapa+ lasi kae tusi i luga i ei ki se mea tusitusi masani, ‘Maeli-sala-asa-pasa.’*
2 Kae ke tusi ne au se fakamaoniga* e auala i molimau fakamaoni, ko Ulia+ te faitaulaga mo Sakalia te tama tagata a Iepelekia.”
3 Tenā ne ‵moe ei au mo te pelofeta fafine,* kae ne faitama a ia kae fakamuli ne fanau mai ne ia se tamaliki tagata.+ Tenā ne fai mai ei a Ieova ki a au: “Fakaigoa a ia ki a Maeli-sala-asa-pasa,
4 me koi tuai o iloa ne te tamaliki tagata o kalaga atu, ‘Toku tamana! mo ‘Toku mātua!’ kae ko oti ne ave kea‵tea a mea tāua o Tamaseko mo mea a Samalia ne maua i te taua, i mua o te tupu o Asulia.”+
5 Ne toe faipati mai a Ieova ki a au:
6 “Ona ko tino konei ne ‵teke ne latou a vai o te Sailoa* kolā e ‵tafe mo te filemu+Kae ne fia‵fia latou ki a Lesina mo te tama tagata a Lemalia,+
7 Tela la, kiloke! Ka aumai ne Ieova ke taua atu ki a latouA vai ‵lasi kae ma‵losi o te Vaitafe,*Te tupu o Asulia+ mo tena ‵malu kātoa.
Ka vau a ia ki luga i ana takelepapa katoaKae fai ke lofia ana vaitafe katoa
8 Kae ualolo atu latou ki loto i Iuta.
Ka fai a ia e pelā mo vai kolā e lofia kae ‵tafe atu i loto i ei ke oko eiloa ki te ua;+Ana kapakau kolā e ‵fola ka ‵fonu i ei a te lauefa o tou laukele,E Emanuelu!”*+
9 Fakapa‵kia atu, koutou e tino, kae ka ofa likiliki koutou.
Faka‵logo mai, koutou mai fenua ‵mao o te lalolagi!
Fakatoka mō te taua, kae ka ofa likiliki koutou!+
Fakatoka mō te taua, kae ka ofa likiliki koutou!
10 Fakatoka se palani, kae ka fakaseaogagina!
Faipati atu so se mea e manako koe ki ei, kae ka se manuia eiloa,Me i te Atua e ‵nofo mo matou!*+
11 Fakatasi mo tena lima malosi i luga i a au, konei a pati ne fai mai ne Ieova ki a au ke fakaeteete au ma tautali i tua o tino konei:
12 “E se ‵tau o taku ne koutou me se aofaga faitogafiti a te mea e taku ne tino konei me se aofaga faitogafiti!
Sa ma‵taku ki te mea e ma‵taku latou ki ei;Sa pole‵pole i te mea tenā.
13 A Ieova o kautau—ko ia te Atua e ‵tau o ‵kilo koutou ki ei me e tapu,+Ko ia te Atua e ‵tau o ma‵taku koutou ki ei,Kae ko ia te Atua e ‵tau o fai ne ia koutou ke pole‵pole.”+
14 Ka fai a ia mo fai se koga tapuaki,Kae pelā me se fatu ke ‵lave i eiKae pelā me se kaupapa ke siga i luga i ei+Ki te avā kāiga o Isalaelu,E pelā me se matasele mo se maleiKi tino e ‵nofo i Ielusalema.
15 E tokouke i a latou ka ‵siga kae pa‵kū kae fati‵fati;Ka maleigina latou kae ‵poa aka.
16 Pelu aka te fakamaoniga tusia;Fakamailoga te tulafono* i mua o oku soko!
17 Ka nofo fakatalitali au ki a Ieova,+ telā e ‵funa ana mata mai te kāiga o Iakopo,+ kae ka fakamoemoe au ki a ia.
18 Kiloke! Ko au mo tama‵liki kolā ne tuku mai ne Ieova ki a au+ e pelā me ne fakailoga+ mo vavega i Isalaelu mai i a Ieova o kautau, telā e nofo i te Mauga o Siona.
19 Kae kafai e fai atu latou ki a koe: “Fesili atu ki tino fesokotaki mo agaga io me ko tino fakamatala mea ‵tupu i aso mai mua kolā e tagi‵tagi kae musu‵musu,” e a, e se ko te lotou Atua e ‵tau o fesili atu ki ei a tino? E a, e ‵tau o fesili atu latou ki tino ‵mate e uiga ki tino ola?+
20 I lō te fai penā, e ‵tau o fesili atu latou ki te tulafono mo te fakamaoniga tusia!
Kafai e se fai‵pati latou e ‵tusa mo te muna tenei, e seai se mainaga i a latou.+
21 Kae ko tino taki tokotasi ka olo atu i loto i te fenua kae ka puapuaga kae fia‵kai;+ kae ona ko te mea e fia‵kai kae kaitāua malosi latou, ka fetū ne latou te lotou tupu mo te lotou Atua māfai e ‵kilo aka ki luga.
22 Tenā ko ‵kilo atu ei latou ki te lalolagi kae lavea fua ne latou a puapuaga mo te pouliga, te faigata o malamalama mo taimi faiga‵ta, te pouli mo te seai o se mainaga.
Fakamatalaga mai lalo
^ Kāti e fakauiga ki te “Fakavave ki Mea ne ‵Toe i te Taua, Ke Vau Fakavave ki Mea ne Kaisoa.”
^ Io me “ne molimau aka; fakamaoni aka.”
^ Telā ko te avaga a Isaia.
^ A te Sailoa se alavai e ‵tafe ei a vai.
^ Telā ko te Eufilate.
^ Onoono ki te Isa 7:14.
^ A te pati Epelu mō “Te Atua e ‵nofo mo matou” ko te Emanuelu. Onoono ki te Isa 7:14; 8:8.
^ Io me “fakatonuga.”
