Fanatu ki te fakasologa

Fanatu ki te fakasologa o mataupu

Pati Fakatomua

A te Tusi Tapu ko te auala e fesokotaki mai ei a te Atua ki a tatou katoa. E ‵tau mo tatou o suke‵suke ki ei ke iloa faka‵lei ne tatou a te Tino telā ne aumai ne ia. (Ioane 17:3; 2 Timoteo 3:16) E fakaasi mai ne Ieova te Atua i loto i ei a tena fuafuaga mō tino mo te lotou koga ‵nofo ko te lalolagi.—Kenese 3:15; Fakaasiga 21:3, 4.

E seai aka foki se tusi e lasi atu tena aoga ki olaga o tino e pelā mo te tusi tenei. E fakamalosi tatou ne te Tusi Tapu ke fakaasi atu a uiga o Ieova kolā ko te alofa, te alofa fakamagalo mo te alofa atafai. E tuku mai i ei a te fakamoemoega telā e fesoasoani atu ki tino ke kufaki i toe logo‵maega faiga‵ta. Kae e fakaasi faka‵sau mai i ei a vaega o te lalolagi tenei kolā e se fetaui mo te loto ‵lei katoatoa o te Atua.—Salamo 119:105; Epelu 4:12; 1 Ioane 2:15-17.

Ne tusi muamua eiloa a te Tusi Tapu i te ‵gana Epelu, Alamaika, mo te ‵gana Eleni, kae ko oti nei ne ‵fuli te Tusi Tapu kātoa io me se vaega i ei, ki ‵gana e nofo ki te 2,600. Ko te ‵toe tusi lauiloa eiloa i te uke o ‵gana ne ‵fuli ki ei mo te uke o ‵kopi ne tufatufa atu. E seai eiloa se mea e tatō i ei. E fai mai te valoaga i te Tusi Tapu: “Kae ko te tala ‵lei tenei o te Malo [ko te mataupu fakavae i te Tusi Tapu] ka talai atu ki te lalolagi nofoaki kātoa mo fai se molimau ki atufenua katoa, ko oko mai ei te gataga.”—Mataio 24:14.

Ona ko te tāua o te fekau i te Tusi Tapu, a te motou fakamoemoega ko te faiga o se ‵fuliga telā e se fakamaoni fua ki tusitusiga mua kae e manino ‵lei foki kae faigofie ke faitau ki ei. A mataupu i te Mataupu Fakaopoopo ko “Te Auala e ‵Fuli ei te Tusi Tapu,” “Vaega o te Lōmiga Tenei,” mo “Te Auala ne Oko Mai ei te Tusi Tapu ki a Tatou” e fakamatala mai i ei a nisi auala i mea tau ‵fulitusi kolā ne fakaaoga, e pelā foki mo nisi fakamatalaga ki mea e maua i loto i te lōmiga tenei.

A tino kolā e a‵lofa ki a Ieova te Atua kae tapuaki atu ki a ia e ma‵nako ki se ‵fuliga telā e tonu kae mainagofie i te Muna a te Atua. (1 Timoteo 2:4) Ke fakataunu aka te manakoga tenā, ne fai ei ne matou ke mafai o maua te lōmiga tenei i te ‵gana Tuvalu, e ‵tusa mo te motou manakoga ke ‵fuli Te ‵Fuliga o te Lalolagi Fou ki ‵gana e uke e mafai o ‵fuli ki ei. E fakamoe‵moe eiloa matou kae ‵talo foki ke mafai o aoga ki a koe, e te tino faitau pele, a te lōmiga tenei o te Tusi Tapu i te taimi e taumafai ei koe o “‵sala atu . . . ki te Atua, . . . kae ka maua eiloa . . . a ia.”—Galuega 17:27.

Komiti ‵Fuli o te Tusi Tapu o te Lalolagi Fou

Aokuso 2013