Isaia 7:1-25
7 I aso o Aasa+ te tama tagata a Iotama te tama tagata a Usia, te tupu o Iuta, ne o‵mai a te tupu o Sulia ko Lesina mo Peka+ te tama tagata a Lemalia te tupu o Isalaelu o taua atu ki Ielusalema, kae ne seki mafai ne ia* o fakatakavale.+
2 Ne avatu se lipoti ki te kāiga o Tavita: “A Sulia ko ‵kau fakatasi mo Efalaima.”
Kae ne kamata o polepole a te loto o Aasa mo loto o ana tino, e pelā eiloa mo lakau o te vao e gasue‵sue i te matagi.
3 Tenā ne fai atu ei a Ieova ki a Isaia: “Fakamolemole, fano o fakafetaui ki a Aasa, ko koe mo tau tama tagata ko Sia-iasupa,*+ i te mata o te alavai o te vai mai luga+ i tafa o te auala lasi o te laukele o te tagata ‵ta gatu.
4 E ‵tau mo koe o fai atu ki a ia, ‘Fakaeteete kae nofo filemu. Sa mataku, kae sa loto vāivāi ona ko tafito e lua konei koi au eiloa, ona ko te lasi o te kaitaua o Lesina mo Sulia mo te tama tagata a Lemalia.+
5 Me i a Sulia fakatasi mo Efalaima mo te tama tagata a Lemalia ko oti ne fai te lotou togafiti o fakapakia koe, olotou muna:
6 “‵Tou olo o taua atu ki Iuta kae saesae* kae fakatakavale* ke fai mō tatou, kae ke fakasopo aka ne tatou te tama tagata a Tapele mo fai tena tupu.”+
7 “‘Konei a pati a te Aliki Sili ko Ieova ne fai mai:
“Ka se manuia te lotou togafiti,Kae ka se taunu eiloa.”
8 Me i te ulu o Sulia ko Tamaseko,Kae ko te ulu o Tamaseko ko Lesina.
I loto i tausaga e 65Ka tuki pala katoatoa atu ei a Efalaima kae ka se toe fai mo fai se fenua.+
9 A te ulu o Efalaima ko Samalia,+Kae ko te ulu o Samalia ko te tama tagata a Lemalia,+Ka se ‵mautakitaki eiloa koutou,Seiloga ke ‵mautakitaki te otou fakatuanaki.”’”
10 Ne toe faipati atu a Ieova ki a Aasa:
11 “Fakamolemole atu ki a Ieova tou Atua ke tuku mai se fakailoga;+ faitalia me ‵poko e pelā mo te Tanuga* io me maluga e pelā mo te lagi.”
12 Kae ne fai mai a Aasa: “Ka se fakamolemole atu au io me ka tofotofo aka ne au a Ieova.”
13 Tenā ne fai atu ei a Isaia: “Fakamolemole, fakalogo mai, e te kāiga o Tavita. E a, e se lava eiloa koutou i te tofotofoga o te kufaki o tāgata? E a, e ‵tau foki mo koutou o tofotofo te kufaki o te Atua?+
14 Tela la, ko Ieova eiloa ka tuku atu ne ia se fakailoga: Kiloke! Ka faitama te tamafine kae ka fanau mai ne ia se tamaliki tagata,+ kae ka fakaigoa ne ia tou tagata ki a Emanuelu.*+
15 Ka kai a ia ki pata mo hani i te taimi ko iloa ei ne ia o ‵teke atu ki te masei kae filifili te ‵lei.
16 Me koi tuai o iloa ne te tamaliki tagata o ‵teke te masei kae filifili te ‵lei, a te laukele o tupu e tokolua kolā e mataku koe ki ei ka tuku tiaki katoatoa atu.+
17 Ka aumai ne Ieova ki a koe mo ou tino mo te kāiga o tou tamana se taimi telā e seki oko aka eiloa koutou ki ei talu mai te aso ne ‵vae kea‵tea ei a Efalaima mai i Iuta,+ me ka aumai ne Ia te tupu o Asulia.+
18 “I te aso tenā ka ‵fio a Ieova ki lago mai vaitafe ‵mao o te Naila o Aikupito e pelā foki mo lagofufu i te fenua o Asulia,
19 kae ka ‵mai a manu katoa konā o ‵nofo i vanu ‵poko, i vasia o kaupapa, i lakau tala‵tala katoa mo koga katoa kolā e isi ne vai i ei.
20 “I te aso tenā, ka fakaaoga ne Ieova se ‵vele ne ‵togi mai i te kogā koga o te Vaitafe,* e auala i te tupu o Asulia,+ ke ‵vele ki ei a ulu mo fulu i vae, kae ka ‵fulu kea‵tea foki i ei a talafa.
21 “I te aso tenā ka fakaolaola ne se tagata se tamā pulumakau mai te lafu mo mamoe e lua.
22 Kae ona ko te uke o susu, ka kai a ia ki pata, me i tino katoa e ‵toe mai i te fenua ka ‵kai ki pata mo hani.
23 “I te aso tenā i so se koga telā ne isi ei ne vine e 1,000 kolā e ‵togi ki tupe siliva e 1,000, ka ‵tu fua i ei a vao lakau talatala mo mouku ma‵sei.
24 Ka olo a tāgata ki konā mo kausana mo matasana, me i te fenua kātoa ka fai mo fai se vao lakau talatala mo mouku ma‵sei.
25 Kae ko mauga katoa kolā ne masani o fakamalū ki te mea fakamalū laukele, ka se fakapilipili eiloa koe ki ei ona ko vao lakau talatala mo mouku ma‵sei; ka fai a koga konā mo koga e kai‵kai ei a pulumakau kae se laukele e lakalaka ne mamoe.”
Fakamatalaga mai lalo
^ Io me kāti, “lāua.”
^ Tena uiga “Se ‵Toega Fua ka Toe ‵Foki Mai.”
^ Io me “fakamatakutaku.”
^ Io me “fai se pūga i ana ‵pui.” Epelu, “fai ke mavaelua.”
^ Tena uiga “Ko Nofo i a Tatou te Atua.”
^ Telā ko te Eufilate.
