Isaia 49:1-26
49 Faka‵logo mai ki a au, koutou e fenua fo‵liki,Kae ‵saga tonu mai, koutou e atufenua ‵mao.+
A Ieova ne kalagagina ne ia au kae koi tuai au o fanau.*+
Mai te taimi ne nofo ei au i te moegatama o toku mātua ne takutaku ne ia toku igoa.
2 Ne fai ne ia toku gutu e pelā me se pelu mata ‵kai;Ne faka‵muni ne ia au i te malūga o tena lima.+
Ne fai ne ia au e pelā me se matasana ne fakamata ke ‵kai;Ne ‵funa aka ne ia au i tena taga tuku matasana.
3 Ana muna ki a au: “A koe ko taku tavini, e Isalaelu,+Ka fakaasi atu ne au toku gali+ e auala i a koe.”
4 Kae ne fai atu au: “Au ne galue malosi mō te seai.
Ne fakaaoga ne au toku malosi mō se mea sē tonu, kae seki taunu.
Kae se mea tonu me e fakamasino au ne Ieova,*Kae ko toku ‵togi* e nofo mo te Atua.”+
5 Kae nei la a Ieova, te Atua telā ne faite ne ia au mai te moegatama e pelā me ko tena tavini,Ne fai mai ke fakafoki mai ne au a Iakopo ki a ia,Ko te mea ke mafai o fakamaopoopo mai a Isalaelu ki a ia.+
Ka faka‵malugina au i mua o Ieova,Kae ko toku Atua ka fai mo fai toku malosi.
6 Kae ne fai mai a ia: “E se gata fua i te fai o koe mo fai taku taviniKe faka‵tu aka a matakāiga o IakopoKae ke toe faka‵foki mai a tino Isalaelu kolā ne ‵sao.
Ko oti foki ne tuku atu ne au a koe e pelā me se mainaga ki atufenua,+Ko te mea ke oko atu a toku fakaolataga ki koga ‵mao o te lalolagi.”+
7 Konei a pati a Ieova, te Atua telā ne toe ‵togi mai ne ia a Isalaelu, ko tena Atua Tapu,+ ne fai ki te tino telā e takalialiagina,+ te tino telā e takalia‵lia ki ei te atufenua, ko te tavini a takitaki:
“A tupu ka lavea ne latou kae ‵tu aka,Kae ko pelenise ka ifo ki laloOna ko Ieova, telā e fakamaoni,+Te Atua Tapu o Isalaelu, telā ne filifili ne ia koe.”+
8 Konei a pati a Ieova ne fai mai:
“Ne tali atu au ki a koe i se taimi ‵lei,+Kae ne fesoasoani atu au ki a koe i te aso o te fakaolataga;+Ne puipui faeloa ne au koe ke tuku atu koe e pelā me se feagaiga mō tino,+Ke toe fai faka‵lei a te laukele,Ke fai ei ke toe maua ne latou te lotou tofi telā ne fakamaseigina,+
9 Ke fai atu ki pagota, ‘O‵mai ki tua!’+
Kae ki a latou kolā e ‵nofo i te pouliga,+ ‘Faka‵sae mai otou foliga!’
Ka kai‵kai latou i tafa o auala,A auala ma‵sei katoa* ka fai mo koga e kai‵kai ei latou.
10 A latou ka se fia‵kai eiloa, io me fiainu,+Io me ka tigaina latou i te ‵vela io me ko te la.+
Me i te Atua telā e alofa fakamagalo ki a latou ka takitaki ne ia latou,+Kae ka takitaki ne ia latou i tafa o vaipuna.+
11 Ka fai ne au oku mauga katoa e pelā me se auala,Kae ko oku auala ‵lasi ka fakama‵luga aka.+
12 Kiloke! Ko o‵mai a latou mai koga ‵mao,+Kae kiloke! e o‵mai latou mai i te feitu ki mātū mo te feitu ki togala,Kae ko latou konei e o‵mai i te fenua o Sainima.”+
13 Ka‵laga mo te fia‵fia, koutou e te lagi, kae fiafia, e te lalolagi.+
A mauga ke fia‵fia i te ‵tagi fiafia.+
Me ko oti ne fakamafanafana ne Ieova ana tino,+Kae e fakaasi atu ne ia te alofa fakamagalo ki ana tino puapuagatia.+
14 Kae ne fai atu faeloa a Siona, penei:
“Ko oti ne tiakina au ne Ieova,+ kae ko Ieova ko puli i a ia au.”+
15 E a, e mafai ne se fafine o puli i a ia tena tamaliki koi faūIo me se alofa ki te tamaliki o tena moegatama?
Faitalia me e mafai o puli i fāfine konei, kae e se mafai eiloa o puli koe i a au.+
16 Kiloke! Ko oti ne tā ne au tou igoa i toku alofilima.
A ‵pui o koe e ‵tu faeloa i oku mua.
17 Au tama tāgata ko ‵foki fakavave mai.
A latou kolā ne ofa kae fakamasei ne latou koe ka olo kea‵tea mai i a koe.
18 Kilo aka ou mata kae onoono atu ki ou tafa.
Ko maopoopo fakatasi katoa latou.+
Ko o‵mai latou ki a koe.
“E pelā eiloa mo au e ola,” ko te folafolaga a Ieova,“Ka fakapei ne koe ki luga i a koe a latou katoa, e pelā me ne mea fakagali‵gali,Kae ka fusi ne koe a latou ki luga i a koe e pelā mo te mea e fai ne se fafine ka fakaipoipo.
19 E tiga eiloa ne fakamasei kae fakaseai ou koga kae ko tou laukele ko masei valevale,+Nei la, ka fai pelā me se koga itia mō latou kolā e ‵nofo i ei,+Kae ko latou kolā ne folo ne latou koe+ ka ‵nofo i koga ‵mao.+
20 A tama tāgata kolā ne fa‵nau mai tua o te ‵mateatuga o au tama ka fai atu ki ou taliga,‘A te koga tenei ko tō itia mō oku.
Fakaavanoa se koga mō oku ke nofo i ei.’+
21 Kae ka fai aka koe i tou loto,‘Ko oi a te tamana o tama‵liki konei ne tuku mai ki a au,Me i a au se fafine e seai ne aku tama‵liki kae e se afu,Ne ave kae puke fakapagota?
Ko oi ne puti aka ne ia a latou konei?+
Kiloke! Au ne tuku eiloa ke nofo tokotasi,+Kae ne o‵mai i fea a latou konei?’”+
22 Konei a pati a te Aliki Sili ko Ieova ne fai mai:
“Kiloke! Ka sisi aka toku lima ki atufenua,Kae ka fakatu aka taku fakailoga ki tino.+
Ka aumai ne latou au tama tāgata i olotou limaKae sau au tama fāfine i olotou tuauma.+
23 A tupu ka fai mo tino tausi o koutou,+Kae ko olotou pulinisese ko otou nesi.
Ka ifo latou ki lalo i a koe mo olotou mata e ‵fuli ki te laukele+Kae aleale a ‵pefu i otou vae,+Kae ka iloa ei ne koutou i a au ko Ieova;A latou kolā e fakamoe‵moe ki a au ka se masiasi.”+
24 E a, e mafai o puke mai a latou kolā ko oti ne puke fakapagota mai i se tagata mafi,Io me e a, e mafai o faka‵sao aka a tino ne puke fakapagota ne se pule fakasaua?
25 Kae konei a pati ne fai mai ne Ieova:
“Ka ave kea‵tea eiloa a pagota a se tagata mafi,+Kae ka ‵sao foki a latou kolā ne puke fakapagota ne se pule fakasaua.+
Ka ‵teke ne au a latou kolā e ‵teke atu ki a koe,+Kae ka faka‵sao ne au a tama ‵tonu a koe.
26 Ka fai ne au a latou kolā e fai fakamasei ne latou koe ke ‵kai eiloa ki olotou ‵kano,Kae e pelā mo te uaina magalo, ka ko‵nā latou i olotou toto eiloa.
Kae ko tino katoa ka iloa ne latou i a au ko Ieova,+Ko te otou Fakaola+ mo te Atua telā ne toe ‵togi mai ne ia koe,+Te Atua Malosi o Iakopo.”+
Fakamatalaga mai lalo
^ Epelu, “mai te moegatama.”
^ Io me “Ka fai ne Ieova te fakamasinoga tonu mō au.”
^ Io me “taui.”
^ Io me kāti, “tamā mauga e seai ne lakau i ei.”
