Ç’të bëj nëse prindërit e mi po divorcohen?
Ja ç’mund të bësh
Fol për shqetësimet e tua. Bëjua të ditur prindërve sa i trishtuar ose i pështjelluar je. Mbase do të mund të të shpjegojnë çfarë po ndodh dhe kështu ta pakësosh ankthin.
Nëse prindërit nuk arrijnë të të japin mbështetjen e duhur, mund t’i hapesh një miku të pjekur.—Proverbat 17:17.
Mbi të gjitha, Ati yt qiellor, ‘Dëgjuesi i lutjes’ është i gatshëm të të dëgjojë. (Psalmi 65:2) Zbrazja zemrën atij, ‘sepse ai interesohet për ty’.—1 Pjetrit 5:7.
Çfarë nuk duhet të bësh?
Mos mbaj mëri. «Prindërit e mi ishin egoistë,—thotë Danieli, prindërit e të cilit u ndanë kur ishte shtatë vjeç.—Ata s’e vrisnin shumë mendjen për ne dhe për ndikimin e veprimeve të tyre te ne.»
Ç’pasoja do të kishte Danieli nëse nuk do ta frenonte zemërimin dhe do të mbante mëri?—E dhënë: Lexo Proverbat 29:22.
Pse mund të jetë mirë për Danielin që të përpiqet t’i falë prindërit për lëndimin që i kanë shkaktuar?—E dhënë: Lexo Efesianëve 4:31, 32.
Mos u sill në një mënyrë që i shkakton probleme vetes. «Isha i mërzitur dhe i dëshpëruar pas divorcit të prindërve,—kujton Deni.—Fillova të kisha probleme në shkollë dhe ngela në klasë një vit. Pas kësaj . . . u bëra si klouni i klasës dhe futesha në shumë sherre.»
Sipas teje, çfarë po përpiqej të arrinte Deni duke u bërë klouni i klasës ose duke u futur në sherre?
Si mund t’i ndihmojë parimi te Galatasve 6:7 njerëzit si Deni që të mos sillen në një mënyrë që i shkaktojnë probleme vetes?
Dëmtimet emocionale kërkojnë kohë që të shërohen. Por, ndërsa jeta jote fillon të rikthehet në normalitet, edhe ti do të fillosh të ndihesh sërish si më parë.