Josue 5:1-15
5 Sanen nadngelan na amin ya arari na saray Amoreo+ diad sagur a pagpag* na Jordan, tan amin ya arari na saray Canaanita+ a walad abay na dayat, a pinaekat nen Jehova iray danum na Jordan diad arapan na saray Israelita ya anggad akabaliw ira, kinmapuy so linawa ra,*+ tan naandi so inkakpel da* lapud saray Israelita.+
2 Diad saman et oniay inkuan nen Jehova ed si Josue: “Manggawa ka na saray kutsilyo a gawad bato tan segat mo+ iray lalaki na Israel, diad komaduan pankanawnawa.”
3 Kanian nanggaway Josue na saray kutsilyo a gawad bato tan sinegat to ray lalaki na Israel diad Gibeat-haaralot.*+
4 Saya so rason no akin a sinegat ira nen Josue: Amin a lalaki ed saray totoon tinmaynan ed Ehipto, amin a sundalo,* et inatey legan na pambiabiahe rad kalawakan kayari ran tinmaynan ed Ehipto.+
5 Amin a totoon tinmaynan ed Ehipto et asegat, balet amin a niyanak legan na pambiabiahe ra ed kalawakan et ag-asegat kayari ran tinmaynan ed Ehipto.
6 Ta 40 taon+ a nanakar ed kalawakan iray Israelita anggad naupot so interon nasyon, salanti, saray sundalo a tinmaynan ed Ehipto ya agtinmulok ed boses nen Jehova.+ Insamba nen Jehova ed sikara ya agdan balot nanengneng so dalin+ ya iter nen Jehova ed sikatayo, unong ya insipan tod saray inmuunan atateng da,+ sakey a dalin a manag-agus so gatas tan dilo.+
7 Kanian inyakar to ray ananak da ed sayan dalin imbes a sikara.+ Saraya so sinegat nen Josue; ta agda ra sinegat legan na pambiabiahe ra.
8 Sanen asegat da la so interon nasyon, nansiansia ra ed kawalaan da ed kampo ya anggad inmabig ira.
9 Insan inkuan nen Jehova ed si Josue: “Natan et inekal* kod sikayo so panamabanday na Ehipto.” Kanian satan a pasen et inngaran a Gilgal*+ anggad sayan agew.
10 Nantultuloy a nankampo ed Gilgal iray Israelita, tan sinelebraan da so Paskua ed labi na koma-14 ya agew na bulan,+ diad saray patar a desierto na Jerico.
11 Tan diad mismon agew kayari na Paskua et angan ira na bunga na dalin, andi-lebaduran tinapay+ tan insanglil ya ilik.
12 Tan anggapo lay mana diad tinmumbok ya agew kayari ran angan na pigaran bunga na dalin; say bunga ed dalin na Canaan so kinan na saray Israelita ed saman a taon+ lapud anggapo lay mana.+
13 Sanen si Josue et walad pasen ya asingger ed Jerico, walay anengneng ton sakey a lakin+ manalalagey ed arapan to a walay sankabembenan ton espada.+ Inmasingger si Josue tan intepet to: “Wala kad dapag mi odino ed saray kalaban mi?”
14 Oniay inyebat to: “Andi, noagta sinmabi ak bilang prinsipe* na armada nen Jehova.”+ Diad saman et tinmalimukor tan dinmakmomo si Josue tan inkuan tod sikato: “Antoy ibaga na katawan ko ed lingkor to?”
15 Oniay inyebat na prinsipe na armada nen Jehova ed si Josue: “Ekal mo iray sandalyas mo, ta masanton pasen so akaalageyan mo.” Tampol itan a ginawa nen Josue.+
Paimanod leksab
^ Literal, “diad pagpag a paarap ed dayat.”
^ Literal, “atunaw so puso ra.”
^ Literal, “tan anggapo lay espiritu ed sikara.”
^ Kabaliksan toy “Pukdol na Saray Katat na Kayarian.”
^ Odino “lalakin wala lad edad a mansundalo.”
^ Say Hebreon salita parad “inekal” (literal, “impatulin”) et mikonektaan ed ngaran a “Gilgal.”
^ Kabaliksan toy “Ontutulin; Impatulin.”
^ Odino “pangulo.”
