Ti Umuna a Samuel 8:1-22

  • Agkiddaw ti Israel iti ari (1-9)

  • Pakdaaran ni Samuel dagiti umili (10-18)

  • Patgan ni Jehova ti kiddaw a maaddaanda iti ari (19-22)

8  Idi lakayen ni Samuel, dinutokanna dagiti annakna kas ukom iti Israel.  Joel ti nagan ti inauna ken Abias+ met ti maikadua. Agserserbida idi nga ukom idiay Beer-sheba.  Ngem dida sinurot ti ulidan ni amada; kaykayatda ti agbalin a naagum iti material a gunggona,+ immawatda kadagiti pasuksok,+ ken nakillo ti panangukomda.+  Idi agangay, naguummong ti amin a panglakayen iti Israel sada napan ken Samuel idiay Rama.  Kinunada: “Kitaem! Lumakaykan, ngem saan a sursuroten dagiti annakmo ti ulidanmo. Mangpilika iti agserbi nga ari ken ukommi a kas iti amin a dadduma a nasion.”+  Ngem saan a naragsakan* ni Samuel idi kinunada: “Ikkannakami iti ari a mangukom kadakami.” Kalpasanna, nagkararag ni Samuel ken Jehova,  ket kinuna ni Jehova kenkuana: “Ipangagmo ti amin nga ibagbaga kenka dagiti umili; ta saan a sika ti linaksidda, no di ket siak ti linaksidda a kas arida.+  Manipud idi inruarko ida idiay Egipto, ar-aramidenda pay laeng agingga ita nga aldaw ti kas iti ar-aramidenda idi; tinallikudandak+ ken nagserbida kadagiti sabali a dios,+ ket kasta ti ar-aramidenda kenka.  Ipangagmo ida. Ngem masapul a sipapasnek a pakdaaram ida; ibagam a ti ari a mangituray kadakuada ket addanto karbenganna a mangipatungpal iti kayatna.” 10  Impakaammo ngarud ni Samuel kadagiti agkidkiddaw kenkuana iti ari ti amin nga imbaga ni Jehova. 11  Kinuna ni Samuel: “Daytoyto ti karbengan nga ipatungpal ti ari a mangituray kadakayo:+ Alaennanto dagiti annakyo a lallaki+ nga agpataray kadagiti karuahena+ ken agbalin a kumakabaliona,+ ken dadduma ti agtaray nga umun-una ngem kadagiti karuahena. 12  Mangdutokto kadagiti agserbi kenkuana a panguluen kadagiti rinibu+ ken panguluen iti saglilimapulo,+ ket pagbalinenna ti dadduma a paraarado,+ paraani,+ ken paraaramid kadagiti armasna a pakigubat ken alikamen dagiti karuahena.+ 13  Alaennanto dagiti annakyo a babbai a pagbalinenna a paraaramid kadagiti bangbanglo, kosinera, ken panadera.+ 14  Alaennanto dagiti kasayaatan kadagiti talonyo, kaubasanyo, ken kaolibuanyo,+ ket itednanto dagita kadagiti adipenna. 15  Alaennanto ti apagkapullo iti maapityo kadagiti talon ken kaubasanyo, ket itedna dayta kadagiti opisial iti palasio ken kadagiti adipenna. 16  Alaennanto dagiti adipenyo a lallaki ken babbai, dagiti kasayaatan a bakayo, ken dagiti asnoyo, ket usarennanto ida nga agtrabaho para kenkuana.+ 17  Alaennanto ti apagkapullo kadagiti karnero ken kaldingyo,+ ket agbalinkayto nga ad-adipenna. 18  Dumtengto ti aldaw nga umkiskayo gapu iti ari a piniliyo,+ ngem saannakayto a sungbatan ni Jehova iti dayta nga aldaw.” 19  Nupay kasta, saan nga inkankano dagiti umili ti imbaga ni Samuel kadakuada, ket kinunada: “Saan, kayatmi nga adda ari a mangituray kadakami. 20  Iti kasta, agbalinkamto a kas iti amin a dadduma a nasion, ket ti arimi ti mangukom ken mangidaulo ken makilaban kadagiti pannakigubatmi.” 21  Kalpasan a nangngeg ni Samuel ti amin nga imbaga dagiti umili; inulitna dagita ken Jehova. 22  Kinuna ni Jehova ken Samuel: “Ipangagmo ida, ket mangdutokka iti ari nga agturay kadakuada.”+ Isu a kinuna ni Samuel kadagiti tattao ti Israel: “Agawidkayon kadagiti siudadyo.”

Footnotes

Lit., “dakes kadagiti mata.”