Ti Umuna a Samuel 10:1-27

  • Nadutokan ni Saul nga agbalin nga ari (1-16)

  • Naiparang ni Saul kadagiti umili (17-27)

10  Innala ni Samuel ti pagkargaan iti lana ket imbukbokna dayta iti ulo ni Saul.+ Inagkanna ket kinunana: “Saan kadi a pinilinaka ni Jehova a kas lider+ ti tattaona?*+  Inton makapanawka ditoy ita nga aldaw, makakitakanto iti dua a lallaki iti asideg ti tanem ni Raquel+ iti teritoria ni Benjamin idiay Zelza, ket ibagadanto kenka, ‘Nasarakanen dagiti asno a sapsapulem. Saanen a dagiti asno+ ti pakadanagan ni amam no di ket sikan ta kunana: “Ania ngatan ti napasamak iti anakko?”’  Ituloymonto ti magna agingga a makadanonka iti dakkel a kayo idiay Tabor. Makasabatkanto sadiay iti tallo a lallaki a mapmapan idiay Bethel+ tapno agdaydayaw iti pudno a Dios. Maysa kadakuada ti agub-ubba iti tallo nga urbon a kalding, tallo a tinapay ti awit ti maikadua, ken agaw-awit iti dakkel a karamba a napno iti arak ti maikatlo.  Komustaendakanto ken ikkandaka iti dua a tinapay, ket masapul nga awatem dagita.  Kalpasanna, madanonmonto ti turod ti pudno a Dios, nga ayan ti kampo dagiti Filisteo. Inton sumrekka iti siudad, makasabatkanto iti maysa a grupo dagiti propeta a naggapu iti nangato a disso a sarsarunuenda dagiti agtoktokar iti dekuerdas nga instrumento, pandereta, plauta, ken arpa, bayat nga agipadpadtoda.  Pabilgennakanto ti espiritu ni Jehova,+ ket agipadtokanto a kas kadakuada ken agbalinka a kasla sabali a tao.+  Inton mapasamak dagitoy a pagilasinan, aramidem ti aniaman a kayatmo, gapu ta adda kenka ti pudno a Dios.  Umun-unaka ngem siak a mapan idiay Gilgal,+ ket sumarunoakto kenka tapno mangidatonak kadagiti daton a mapuoran ken daton a pakikappia. Urayennak iti pito nga aldaw agingga iti iyaayko, ket ibagakto kenka ti masapul nga aramidem.”  Apaman a nagpakada ken Samuel, binaliwan ti Dios ti puso ni Saul a kas man la sabalin a tao, ket napasamak kenkuana amin dagitoy a pagilasinan iti dayta nga aldaw. 10  Isu a napanda iti turod, ket nasabatda ti maysa a grupo dagiti propeta. Dagus a pinabileg ti espiritu ti Dios,+ ket nangrugi nga agipadto+ a kas kadakuada. 11  Idi nakita ti amin a makaam-ammo kenkuana nga agipadpadto a kas kadagiti propeta, kinunada iti maysa ken maysa: “Ania ti napasamak iti anak ni Kis? Propeta met kadin ni Saul?” 12  Kinuna ti maysa a lalaki sadiay: “Ngem asino ti amada?” Isu a nagbalin a pagsasaoda:* “Propeta met kadin ni Saul?”+ 13  Idi nalpas a nagipadto, napan iti nangato a disso. 14  Kalpasanna, dinamag ti kabsat ti ama ni Saul kenkuana ken iti katulonganna: “Napnapananyo?” Insungbat ni Saul: “Sinapsapulmi dagiti asno.+ Ngem idi saanmi a nabirokan, napankami ken Samuel.” 15  Dinamag ti angkel ni Saul: “Ania ti imbaga kenka ni Samuel? Pangngaasim ta ibagam kaniak.” 16  Kinuna ni Saul: “Imbagana a nasarakanen dagiti asno.” Ngem saan nga inestoria ni Saul ti imbaga ni Samuel maipapan iti panagarina. 17  Pinaayaban ni Samuel dagiti tattao tapno aguummongda iti imatang ni Jehova idiay Mizpa+ 18  ket kinunana kadagiti Israelita: “Daytoy ti kinuna ni Jehova a Dios ti Israel, ‘Siak ti nangiruar iti Israel idiay Egipto ken nangisalakan kadakayo kadagiti Egipcio+ ken iti amin a pagarian a nangirurumen kadakayo. 19  Ngem ita, linaksidyo ti Diosyo+ a nangisalakan idi kadakayo iti amin a napasaranyo a didigra ken rigat, ket kinunayo: “Saan, masapul a mangpilika iti ari a mangituray kadakami.” Ita, agtakderkayo iti imatang ni Jehova sigun kadagiti tribuyo ken pamiliayo.’”* 20  Gapuna, pinaasideg ni Samuel ti amin a tribu ti Israel,+ ket ti tribu ni Benjamin ti napili.+ 21  Kalpasanna, pinaasidegna ti tribu ni Benjamin sigun kadagiti pamiliana, ket napili ti pamilia dagiti Matrita. Kamaudiananna, napili ni Saul nga anak ni Kis.+ Ngem idi sapulenda, saanda a masarakan. 22  Isu nga insaludsodda ken Jehova:+ “Immay kadin ditoy ti lalaki?” Kinuna ni Jehova: “Adda idiay nga aglemlemmeng kadagiti gargaret.” 23  Isu a nagtatarayda ket napanda innala sadiay. Idi nagtakder iti tengnga dagiti umili, isu ti katayagan ket pagat-abagana laeng amin ida.+ 24  Kinuna ni Samuel iti amin nga umili: “Makitayo kadi ti pinili ni Jehova,+ nga awan kadagiti umili ti kas kenkuana?” Ket impukkaw dagiti tattao: “Agbiag ti ari!” 25  Imbaga ni Samuel kadagiti umili ti maipapan iti karbengan dagiti ari+ ken insuratna dayta iti maysa a libro ket indulinna iti tabernakulo ni Jehova. Kalpasanna, pinagawiden ni Samuel ti amin nga umili. 26  Nagawid met ni Saul iti balayna idiay Gibea ket kinadua dagiti mannakigubat a tinignay ni Jehova ti puspusoda. 27  Ngem adda dagiti dakes a tattao a nangibaga: “Kasano a maisalakannatayo daytoy a tao?”+ Isu nga inumsida ken saanda nga inikkan iti aniaman a sagut.+ Ngem awan ti aniaman nga imbagbagana maipapan iti dayta.*

Footnotes

Wenno “tawidna.”
Wenno “proverbioda.”
Lit., “rinibuyo.”
Lit., “Ngem nagbalin a kasla umel.”