Ti Umuna a Samuel 15:1-35

  • Sumukir ni Saul ken dina patayen ni Agag (1-9)

  • Babalawen ni Samuel ni Saul (10-23)

    • “Nasaysayaat ti agtulnog ngem ti agdaton” (22)

  • Nailaksid ni Saul kas ari (24-29)

  • Patayen ni Samuel ni Agag (30-35)

15  Kinuna ni Samuel ken Saul: “Imbaonnak ni Jehova a mangdutok kenka kas ari iti ilina nga Israel;+ denggem ita ti ibaga ni Jehova.+  Daytoy ti kinuna ni Jehova a panguluen dagiti armada, ‘Singirek dagiti Amalekita gapu iti inaramidda iti Israel idi binusorda ida bayat ti panagdaliasatda a naggapu idiay Egipto.+  Inka papatayen dagiti Amalekita+ ken dadaelem ida+ agraman ti amin nga adda kadakuada. Awan ti ibatim* kadakuada; patayem amin ida,+ lallaki agraman babbai, ubbing agraman agsussuso, baka agraman karnero, kamelio agraman asno.’”+  Pinaayaban ni Saul dagiti tattao ket binilangna ida idiay Telaim: Adda 200,000 a soldado ken 10,000 a mannakigubat ti Juda.+  Dimmarup ni Saul agingga iti siudad ti Amalek ket nagtambang iti tanap.*  Kinuna ni Saul kadagiti Keneo:+ “Panawanyo dagiti Amalekita, tapno saankayo a mairaman iti panangdadaelko amin kadakuada,+ gapu ta impakitayo ti napudno nga ayat iti amin nga Israelita+ idi pimmanawda idiay Egipto.” Gapuna, pimmanaw dagiti Keneo iti ayan dagiti Amalekita.  Kalpasan dayta, pinapatay ni Saul dagiti Amalekita+ manipud Havila+ agingga idiay Sur,+ nga asideg iti Egipto.  Tiniliwna ni Agag+ nga ari ti Amalek, ngem pinapatayna ti amin a dadduma pay nga Amalekita iti tadem ti espada.+  Ngem saan a pinatay* ni Saul ken dagiti soldadona ni Agag, agraman dagiti kasayaatan a baka, karnero, ken kalding, dagiti nalukmeg nga animal, kalakian a karnero, ken aniaman a nasayaat.+ Saanda a pinatay dagita. Dagiti laeng saan a nasayaat ken awan serserbina ti dinadaelda. 10  Kinuna ni Jehova ken Samuel: 11  “Maladingitanak iti panangisaadko ken Saul kas ari, ta sinukirnak ken saan a nagtulnog kadagiti bilinko.”+ Napalalo ti liday ni Samuel isu a nagpatnag a nagsangsangit ken Jehova.+ 12  Kabigatanna, nasapa a bimmangon ni Samuel tapno makasaritana ni Saul. Ngem naipadamag ken Samuel: “Napan ni Saul idiay Carmelo,+ tapno mangipatakder iti monumento para iti bagina.+ Kalpasanna, simmalog a napan idiay Gilgal.” 13  Kinuna ni Saul ken Samuel idi nagkitadan: “Bendisionannaka koma ni Jehova. Tinungpalko ti imbilin ni Jehova.” 14  Ngem insaludsod ni Samuel: “Ania ngarud dagiti mangmangngegko nga uni dagiti karnero, kalding, ken baka?”+ 15  Insungbat ni Saul: “Naggapu dagita kadagiti Amalekita, ngem saan a pinatay* dagiti soldado dagiti kasayaatan a karnero, kalding, ken baka tapno maidaton ken Jehova a Diosmo; ngem pinataymi dagiti nabati.” 16  Kinuna ni Samuel: “Agtalnaka! Denggem ti imbaga kaniak ni Jehova idi rabii.”+ Isu a kinuna ni Saul: “Agsaoka!” 17  Kinuna ni Samuel: “Saan kadi nga imbilangmo ti bagim a nanumo+ idi naisaadka a panguluen dagiti tribu ti Israel ken idi dinutokannaka ni Jehova kas ari ti Israel?+ 18  Idi agangay, adda impaaramid kenka ni Jehova ken imbilinna, ‘Patayem amin a managbasol nga Amalekita.+ Gubatem ida agingga a mapapataymo amin ida.’+ 19  Ngem apay a saanka a nagtulnog ken Jehova? Inalistuam ketdi ti nagala kadagiti kukua dagiti kabusor+ ket inaramidmo ti dakes iti imatang ni Jehova!” 20  Kinuna ni Saul ken ni Samuel: “Ngem nagtulnogak ken Jehova! Napanak iti nangibaonan kaniak ni Jehova, ken inyawidko ni Agag nga ari ti Amalek, ken pinapatayko dagiti Amalekita.+ 21  Ngem nangilasin dagiti tattaok kadagiti karnero ken baka manipud iti naalada, ti kasayaatan kadagiti rumbeng a madadael, tapno idatonda ken Jehova a Diosmo idiay Gilgal.”+ 22  Kinuna ni Samuel: “Ania ti ad-adda a pakaragsakan ni Jehova: Ti mangipaay kadagiti daton a mapuoran+ wenno ti agtulnog ken Jehova? Daytoy ti sigurado: Nasaysayaat ti agtulnog ngem ti agdaton,+ ken ti dumngeg a naimbag ngem iti taba+ dagiti karnero; 23  ta ti panagsukir+ ket kas kadagsen ti basol a panagbuyon,+ ken ti kinatangsit ket kas iti kadagsen ti basol a panagsalamangka ken idolatria.* Gapu ta linaksidmo ti bilin ni Jehova,+ inlaksidnaka kas ari.”+ 24  Kalpasanna, kinuna ni Saul ken Samuel: “Nagbasolak, ta saanko a tinungpal ti bilin ni Jehova ken dagiti imbagam, gapu ta nagbutengak kadagiti tattao ket impangagko ti imbagada. 25  Ngem pangngaasim ta pakawanem ti basolko, ket kumuyogka kaniak nga agsubli tapno makapagdayawak ken Jehova.”+ 26  Ngem kinuna ni Samuel ken Saul: “Saanakto a kumuyog kenka nga agsubli, ta linaksidmo ti bilin ni Jehova, ket inlaksidnaka ni Jehova iti panagtultuloymo kas ari ti Israel.”+ 27  Idi pumanawen ni Samuel, ginammatan ni Saul ti gayadan ti awan manggasna a bado ni Samuel ngem naikkat dayta. 28  Gapu iti dayta, kinuna kenkuana ni Samuel: “Inikkat itan ni Jehova kenka ti panagturay iti Israel, ket itednanto iti padam a tao a nasaysayaat ngem sika.+ 29  Malaksid iti dayta, ti Katan-okan iti Israel+ ket saan nga agulbod+ ken saanna a balbaliwan ti panunotna,* ta Isu ket saan a tao nga agbaliw ti panunotna.”*+ 30  Kinuna ni Saul: “Nagbasolak. Ngem pangngaasim ta padayawannak iti sango dagiti panglakayen dagiti kailiak ken iti sango ti Israel. Kumuyogka kaniak nga agsubli, ket agdaydayawakto ken Jehova a Diosmo.”+ 31  Isu a kimmuyog ni Samuel ken Saul, ket nagdaydayaw ni Saul ken Jehova. 32  Ket kinuna ni Samuel: “Iyasidegyo kaniak ni Agag nga ari ti Amalek.” Saan idi a sibubulos ti rikna* ni Agag nga immasideg ken Samuel, ta kinunana iti bagina: ‘Sigurado nga awanen ti pangta* a mapapatayak.’ 33  Ngem kinuna ni Samuel: “No kasano a dagiti inna ket naulila kadagiti annak gapu iti espadam, kasta met a ni nanangmo ti kalilidayanto iti amin a maulila nga inna.” Gapuna, tinagbatagbat ni Samuel ni Agag iti imatang ni Jehova idiay Gilgal.+ 34  Kalpasanna, napan ni Samuel idiay Rama, ket nagawid ni Saul iti balayna idiay Gibea. 35  Nagladladingit ni Samuel gapu ken Saul, isu a manipud idin agingga iti ipapatayna, saanen a nakita ni Samuel ni Saul.+ Ket naladingitan ni Jehova iti panangisaadna ken Saul kas ari ti Israel.+

Footnotes

Wenno “kaasiam.”
Karayan a maaddaan laeng iti danum no panagtutudo.
Wenno “kinaasian.”
Wenno “kinaasian.”
Lit., “terafim nga estatua,” kayatna a sawen, didiosen ti pamilia; idolo.
Wenno “agbabawi.”
Wenno “agbabawi.”
Wenno mabalin nga, “Agkompiansa.”
Lit., “kinapait.”