Ti Umuna a Samuel 13:1-23

  • Mangpili ni Saul iti armada (1-4)

  • Ti nadarasudos nga aramiden ni Saul (5-9)

  • Babalawen ni Samuel ni Saul (10-14)

  • Awan armas dagiti Israelita (15-23)

13  Agtawen ni Saul iti . . .* idi nagbalin nga ari,+ ket dua a tawen a nagturay iti Israel.  Nangpili ni Saul iti 3,000 a lallaki manipud iti Israel; 2,000 kadagita ti naikuyog ken Saul idiay Mikmas ken iti kabambantayan ti Bethel ken 1,000 ti naikuyog ken Jonatan+ idiay Gibea+ ti Benjamin. Pinagawidna ti dadduma pay nga umili iti bukodda a tolda.  Kalpasanna, dinadael ni Jonatan ti kampo dagiti Filisteo+ nga adda idiay Geba,+ ket nadamag dayta dagiti Filisteo. Imbilin ni Saul a mapuyotan ti tangguyob+ iti intero nga Israel, ket kinunana: “Dumngeg koma dagiti Hebreo!”  Nangngeg ti intero nga Israel ti damag: “Dinadael ni Saul ti kampo dagiti Filisteo, ket pagpupungtotanen dagiti Filisteo ti Israel.” Isu a naibilin kadagiti tattao a surotenda ni Saul idiay Gilgal.+  Naguummong met dagiti Filisteo tapno gubatenda ti Israel. Addaanda iti 30,000 a karuahe a pakigubat ken 6,000 a kumakabalio, ken soldado a kas iti kaadu ti darat iti igid ti baybay;+ ket simmang-at ken nagkampoda idiay Mikmas iti daya ti Bet-aven.+  Marigrigatan dagiti Israelita iti napeggad a kasasaadda isu a naglemmengda kadagiti kueba,+ abut, dadakkel a bato, uneg ti daga, ken bubon.  Bimmallasiw pay ketdi iti Jordan ti dadduma a Hebreo sada napan idiay Gad ken Gilead.+ Ngem adda pay laeng idi ni Saul idiay Gilgal, ket napalalo ti buteng ti amin a tattao a sumursurot kenkuana.  Pito nga aldaw nga inur-uray ni Saul ti imbaga* ni Samuel nga isasangpetna, ngem saan a napan ni Samuel idiay Gilgal, isu a ni Saul ket pampanawanen dagiti tattao.  Kamaudiananna, kinuna ni Saul: “Iyegyo kaniak ti daton a mapuoran ken dagiti daton a pakikappia.” Ket indatonna ti daton a mapuoran.+ 10  Ngem apaman a nalpasna nga indaton ti daton a mapuoran, simmangpet ni Samuel. Isu a sinabat ni Saul ken kinablaawanna. 11  Kinuna ni Samuel: “Ania daytoy nga inaramidmo?” Insungbat ni Saul: “Nakitak a pampanawandakon dagiti umili,+ ken saanka nga immay iti imbagam nga isasangpetmo, ken aguummongen dagiti Filisteo idiay Mikmas.+ 12  Isu a kinunak iti bagik, ‘Um-umayen dagiti Filisteo a mangraut kaniak ditoy Gilgal, ket diak pay nagpakaasi ken* Jehova.’ Isu a nariknak a masapul nga idatonko ti daton a mapuoran.” 13  Gapu iti dayta, kinuna ni Samuel ken Saul: “Minamaag ti inaramidmo. Saanmo a tinungpal ti imbilin kenka ni Jehova a Diosmo,+ ta no tinungpalmo koma, agnanayon a pagturayen koma ni Jehova ti pagariam iti Israel. 14  Ngem ita, saanen nga agpaut ti pagariam.+ Mangbirokto ni Jehova iti makaay-ayo iti pusona,+ ket isaadto ni Jehova a kas lider ti ilina,+ ta saanmo a tinungpal ti imbilin kenka ni Jehova.”+ 15  Kalpasanna, pimmanaw ni Samuel idiay Gilgal ket napan idiay Gibea ti Benjamin. Binilang ni Saul dagiti tattao; agarup 600 a lallaki ti nabati pay a kaduana.+ 16  Ni Saul ken ni Jonatan nga anakna ken dagiti tattao a nabati a kaduada ket nagtalinaed idiay Geba+ ti Benjamin. Nagkampo met dagiti Filisteo idiay Mikmas.+ 17  Rimmuar ti tallo a grupo dagiti soldado iti kampo dagiti Filisteo. Napan ti maysa a grupo iti dalan nga agturong iti Ofra, agingga iti Sual; 18  napan ti sabali a grupo iti dalan nga agturong iti Bet-horon;+ ket napan ti maikatlo a grupo iti dalan nga agturong iti pagpatinggaan ti teritoria a pakatannawagan iti tanap ti Zeboim nga agpalet-ang. 19  Awan idi ti mammanday iti intero nga Israel, ta kinuna dagiti Filisteo: “Tapno saan a makaaramid dagiti Hebreo iti espada wenno pika.” 20  Masapul idi a mapan ti amin nga Israelita iti lugar dagiti Filisteo tapno ipaasada dagiti arado, gabion, wasay, wenno kumpayda. 21  Maysa a pim* ti bayad idi ti panagpaasa kadagiti arado, gabion, tallo ti ngipenna nga alikamen, wasay, ken panagpatarimaan iti tirad a pagabug kadagiti baka. 22  Ket idi aldaw ti gubat, awan ti espada wenno pika nga armas ti asinoman a naikuyog kada Saul ken Jonatan;+ ni laeng Saul ken ni Jonatan nga anakna ti adda armasna. 23  Adda grupo ti soldado iti kampo dagiti Filisteo a napan iti dalan iti rangkis ti Mikmas.+

Footnotes

Ti numero ket awan iti Hebreo a teksto.
Wenno “inkeddeng.”
Wenno “pinalukneng ti rupa ni.”
Nagkauna a pagtimbang nga agarup 0.67 siklo. Kitaem ti App. B14.