Ti Umuna a Samuel 4:1-22

  • Alaen dagiti Filisteo ti Lakasa (1-11)

  • Matay ni Eli ken dagiti annakna a lallaki (12-22)

4  Imbaga ni Samuel iti intero nga Israel ti mensahe a naipakaammo kenkuana. Napan ginubat ti Israel dagiti Filisteo. Nagkampoda iti asideg ti Ebenezer, ket nagkampo met dagiti Filisteo idiay Afek.  Dinarup dagiti soldado a Filisteo ti armada ti Israel, ngem nakaro ti linnaban isu nga inabak dagiti Filisteo ti Israel. Pinapatayda ti agarup 4,000 a soldado iti paggugubatan.  Idi nagsubli dagiti soldado iti kampo, kinuna dagiti panglakayen iti Israel: “Apay nga impalubos ni Jehova a maabaktayo* ita babaen kadagiti Filisteo?+ Intay alaen ti lakasa ti tulag ni Jehova idiay Shilo,+ tapno adda kadatayo ket isalakannatayo kadagiti kabusortayo.”  Isu a nangibaon dagiti tattao iti lallaki a mapan idiay Shilo tapno awitenda ti lakasa ti tulag ni Jehova a panguluen dagiti armada, nga agtugtugaw iti trono iti ngatuen* dagiti kerubin.+ Kimmuyog ti dua nga annak ni Eli a da Hofni ken Finehas+ kadagiti nangawit iti lakasa ti tulag ti pudno a Dios.  Apaman a naisangpet ti lakasa ti tulag ni Jehova iti kampo, nakapigpigsa ti panagriaw dagiti Israelita nga uray la nagunggon ti daga.  Kinuna dagiti Filisteo idi mangngegda ti panagriaw: “Apay a nakapigpigsa ti ariwawa iti kampo dagiti Hebreo?” Idi agangay, naammuanda a naipan idiay kampo ti Lakasa ni Jehova.  Nagbuteng dagiti Filisteo, ta imbagada: “Simmangpet ti Dios idiay kampoda!”+ Isu a kinunada: “Nalpastayon! Ita pay la a napasamak daytoy kadatayo!  Nalpastayon! Asino ti mangisalakanto kadatayo iti dayta a mannakabalin a Dios? Isu ti Dios a nangpapatay kadagiti Egipcio babaen ti amin a kita ti didigra idiay let-ang.+  Tumuredkayo ken ipakitayo a malalakikayo, dakayo a Filisteo, tapno saanyo a pagserbian dagiti Hebreo a kas ti panagserbida kadakayo.+ Lumabankayo a kas kadagiti pudno a lallaki!” 10  Nakigubat dagiti Filisteo ket naabak ti Israel,+ isu a nagtaray ti tunggal maysa a nagawid iti toldana. Nagadu ti napapatay; ket iti armada ti Israel, 30,000 a soldado ti napapatay. 11  Ti Lakasa ti Dios ket innala met dagiti kabusor. Agpada a natay ti dua nga annak ni Eli a da Hofni ken Finehas.+ 12  Iti dayta nga aldaw, adda lalaki iti tribu ni Benjamin a naggapu iti paggugubatan ken nagtartaray a napan idiay Shilo a napisang ti badona ken adda rugit iti ulona.+ 13  Idi nakadanon, agtugtugaw ni Eli iti tugaw iti igid ti kalsada nga agur-uray, gapu ta madanagan unay iti Lakasa ti pudno a Dios.+ Simrek ti lalaki iti siudad tapno agipadamag, ket nangrugi a nagsangit ti intero a siudad. 14  Idi nangngeg ni Eli ti panagsasangit, dinamagna: “Ania ti kaipapanan daytoy mangmangngegko a panagiikkis?” Nagdardaras ti lalaki a napan ken Eli ket imbagana ti damag. 15  (Agtawen idin ni Eli iti 98, ken saanen a makakita.)+ 16  Kinuna ti lalaki ken Eli: “Naggapuak iti paggugubatan. Nagtartarayak nga immay ditoy ita nga aldaw.” Dinamag ni Eli: “Ania ti napasamak, anakko?” 17  Insungbat ti lalaki nga agipadpadamag: “Immatras ti Israel kadagiti Filisteo gapu ta naabakda ken adu ti natay kadakuada.+ Natay met ti dua nga annakmo a da Hofni ken Finehas+ ken innala dagiti kabusor ti Lakasa ti pudno a Dios.”+ 18  Apaman a nangngegna ti maipapan iti Lakasa ti pudno a Dios, naliad iti tugawna nga adda iti abay ti ridaw, ket natukkol ti tengngedna isu a natay gapu ta lakayen ken nadagsen. Nagserbi a kas ukom iti Israel iti 40 a tawen. 19  Ti manugang ni Eli nga asawa ni Finehas ket masikog idi ken dandanin aganak. Idi nangngegna ti damag nga innala dagiti kabusor ti Lakasa ti pudno a Dios ken natay ti katuganganna a ni Eli ken ti asawana, naglusdoy ket dagus a nagpasikal ken naganak. 20  Idi matmatayen, kinuna dagiti babbai a nakatakder iti abayna: “Dika madanagan. Lalaki ti inyanakmo.” Saan a simmungbat ken saanna ida nga inkankano. 21  Ngem pinanagananna ti ubing iti Ikabod,*+ ket kinunana: “Naipanaw ti dayag ti Israel,”+ a tumuktukoy iti panangala dagiti kabusor iti Lakasa ti pudno a Dios ken ti pannakatay ti katuganganna a lalaki ken ti asawana.+ 22  Kinuna ti babai: “Naipanawen ti dayag ti Israel, gapu ta innala dagiti kabusor ti Lakasa ti pudno a Dios.”+

Footnotes

Lit., “Apay nga inabaknatayo ni Jehova?”
Wenno mabalin a, “nagbaetan.”
Kaipapananna, “Sadino ti Ayan ti Dayag?”