Ti Umuna a Samuel 6:1-21
-
Isubli dagiti Filisteo ti Lakasa iti Israel (1-21)
6 Pito a bulan idi nga adda ti Lakasa+ ni Jehova kadagiti teritoria dagiti Filisteo.
2 Inayaban dagiti Filisteo dagiti papadi ken mammuyon+ ket dinamagda: “Ania ti aramidenmi iti Lakasa ni Jehova? Ibagayo koma no kasano a maisublimi iti dati nga ayanna.”
3 Insungbatda: “No isubliyo ti lakasa ti tulag ni Jehova a Dios ti Israel, pakuyoganyo dayta iti daton. Masapul nga isubliyo a mapakuyogan iti daton gapu iti biddut.+ Sakayto la umimbag no aramidenyo dayta ket maipakaammonto kadakayo no apay a dusdusaennakayo.”
4 Isu a dinamag dagiti Filisteo: “Ania a daton gapu iti biddut ti masapul nga ipakuyogmi inton isublimi?” Kinunada: “Sigun iti bilang dagiti mangiturturay kadagiti Filisteo,+ mangipatulodkayo iti lima a balitok nga almoranas ken lima a balitok a bao, ta kasta ti mapaspasaranyo amin ken dagiti mangiturturay kadakayo.
5 Masapul a mangaramidkayo kadagiti balitok nga almoranas ken balitok a bao+ a mangparparigat kadakayo iti lugaryo, ken masapul nga idaydayawyo ti Dios ti Israel. Bareng palag-anennanto ti pannusana kadakayo ken iti diosyo ken iti lugaryo.+
6 Apay a patangkenenyo ti pusoyo a kas kadagiti Egipcio ken ni Faraon?+ Idi nakaro ti panangdusa ti Dios kadakuada,+ kapilitan a pinapanawda dagiti Israelita.+
7 Mangisaganakayo iti baro a kareson ken dua nga agpaspasuso a baka a di pay nasangolan. Ipakoyo dagiti baka iti kareson ngem diyo ipasurot dagiti urbonda.
8 Alaenyo ti Lakasa ni Jehova ket ikabilyo dayta iti kareson. Ikahonyo dagiti balitok a banag nga ipakuyogyo kas daton gapu iti biddut ken ikabilyo dayta iti abayna.+ Kalpasanna, baybay-anyon a mapan
9 ngem siputanyo: No sumang-at dayta iti dalan nga agturong idiay Bet-semes+ a dati nga ayanna, kaipapananna a ti Dios ti Israel ti nangyeg iti daytoy a nakaro a didigra kadatayo. Ngem no saan, maammuantayto a saan nga isu ti mangdusdusa kadatayo no di ket naiparparna laeng.”
10 Tinungpal dayta dagiti Filisteo. Nangalada iti dua nga agpaspasuso a baka ken impakoda ida iti kareson, ket impupokda dagiti urbon a baka.
11 Kalpasanna, inkargada ti Lakasa ni Jehova iti rabaw ti kareson agraman ti kahon a naglaon kadagiti balitok a bao ken almoranas.
12 Dineretso dagiti baka ti dalan nga agturong iti Bet-semes.+ Saanda a simmiasi iti dalan bayat nga agem-emmakda a magmagna. Kabayatanna, sinursurot ida dagiti mangiturturay kadagiti Filisteo agingga iti pagpatinggaan ti teritoria ti Bet-semes.
13 Dagiti umili ti Bet-semes ket madama idi nga agan-ani iti trigo iti tanap.* Idi tumaliawda, nakitada ti Lakasa, ket kasta unay ti ragsakda a nakakita iti dayta.
14 Nakadanon ti kareson iti talon ni Josue a Bet-semita ket nagsardeng iti asideg ti dakkel a bato. Isu a binalsigda ti kareson ken pinagsungrodda kadagiti baka+ nga indatagda ken Jehova kas daton a mapuoran.
15 Binagkat dagiti Levita+ ti Lakasa ni Jehova ken ti kahon a naglaon kadagiti balitok a banag, ket inkabilda dagita iti rabaw ti dakkel a bato. Iti dayta nga aldaw, nagidatag dagiti tattao ti Bet-semes+ kadagiti daton a mapuoran ken dadduma pay a daton para ken Jehova.
16 Idi nakita dayta dagiti lima a mangiturturay kadagiti Filisteo, nagsublida idiay Ekron iti dayta met la nga aldaw.
17 Dagitoy dagiti balitok nga almoranas nga indatag dagiti Filisteo para ken Jehova kas daton gapu iti biddut:+ maysa iti Asdod,+ maysa iti Gaza, maysa iti Askelon, maysa iti Gat,+ ken maysa iti Ekron.+
18 Ti bilang dagiti balitok a bao ket kapada ti bilang ti amin a siudad dagiti Filisteo a sakup ti lima a mangiturturay kadagiti Filisteo, a pakairamanan ti amin a napaderan a siudad ken ili iti ruar ti siudad.
Ket ti dakkel a bato a nangiparabawanda iti Lakasa ni Jehova ti nagserbi a saksi agingga iti daytoy nga aldaw iti talon ni Josue a Bet-semita.
19 Ngem pinapatay ti Dios dagiti tattao ti Bet-semes gapu ta kinitada ti Lakasa ni Jehova. Pinatayna ti 50,070* a tattao, ket nagladingit dagiti umili gapu ta adu kadakuada ti pinapatay ni Jehova.+
20 Dinamag dagiti tattao ti Bet-semes: “Siasinonto ti makaasideg ken Jehova, daytoy a nasantuan a Dios,+ ken saan kadi a mabalin a pumanawen kadatayo ket sabali laengen ti papananna?”+
21 Isu a nangibaonda kadagiti mapan idiay Kiriat-jearim+ tapno ibagada kadagiti umili: “Insublin dagiti Filisteo ti Lakasa ni Jehova. Umayyo alaenen.”+
