Ti Umuna a Samuel 26:1-25

  • Saan latta manen a patayen ni David ni Saul (1-25)

    • Raemen ni David ti dinutokan ni Jehova (11)

26  Idi agangay, immay dagiti lallaki a taga-Zif+ ken Saul idiay Gibea+ ket kinunada: “Ammoyo kadi nga aglemlemmeng ni David iti turod ti Hakila iti sango ti Jesimon?”*+  Isu a simmalog ni Saul iti let-ang ti Zif a kaduana ti 3,000 a napili a lallaki ti Israel tapno sapulenda ni David idiay let-ang ti Zif.+  Nagkampo ni Saul iti turod ti Hakila, iti sango ti Jesimon, iti igid ti dalan. Agnanaed idi ni David idiay let-ang, ket nadamagna a simmangpet ni Saul iti let-ang a mangsapsapul kenkuana.  Nangibaon ngarud ni David kadagiti espia tapno ammuenda no agpayso nga immay ni Saul.  Idi agangay, napan ni David iti nagkampuan ni Saul, ket nakitana ti pagid-iddaan ni Saul, ken ni Abner+ nga anak ni Ner a pangulo ti armadana. Matmaturog ni Saul iti uneg ti kampo agraman ti amin a soldadona a nagkampo iti intero nga aglikmutna.  Dinamag ni David ken Ahimelec a Heteo+ ken ni Abisai+ nga anak ni Zeruia,+ ti kabsat ni Joab: “Siasino ti sumurot kaniak a mapan iti kampo ni Saul?” Insungbat ni Abisai: “Siak.”  Iti rabii, napan da David ken Abisai iti ayan dagiti soldado, ket nakitada a matmaturog ni Saul iti uneg ti kampo a nakatugkel ti pikana iti uluananna. Nakaidda ni Abner ken dagiti soldado iti intero nga aglikmutna.  Kinuna ni Abisai ken David: “Insuko itan ti Dios kenka ti kabusormo.+ Isu a pangngaasim ta palubosannak nga iduyokko kenkuana ti pika a sumalput agingga iti daga uray maminsan laeng, ket diakton piduaen.”  Ngem kinuna ni David ken Abisai: “Saanmo a dangdangran, ta asino ti saan a madusa+ no dangranna ti dinutokan ni Jehova?”+ 10  Intuloy ni David: “Isapatak iti nagan ti sibibiag a Dios a ni Jehova, ni Jehova a mismo ti mangpapatayto kenkuana,+ wenno addanto aldaw+ a matay, wenno mapan makigubat ket mapapatay.+ 11  Gapu iti panagraemko ken Jehova, diak maitured a patayen ti dinutokan ni Jehova!+ Isu a pangngaasim ta alaem ti pika iti uluananna ken ti pagkargaan iti danum, ket intan.” 12  Innala ngarud ni David ti pika ken ti pagkargaan iti inumen iti uluanan ni Saul, sada pimmanaw. Awan ti nakakita+ wenno nakadlaw wenno nariing. Naimas amin ti turogda ta pinaturog ida ni Jehova. 13  Bimmallasiw ni David iti sabali a bangir ket nagtakder iti tuktok ti bantay nga adayo ti baetna kadakuada. 14  Pinukkawan ni David dagiti soldado ken ni Abner+ nga anak ni Ner: “Mangngegnak kadi, Abner?” Simmungbat ni Abner: “Asinoka a mangpukpukkaw iti ari?” 15  Kinuna ni David ken Abner: “Kunak man no naturedka a lalaki? Ken saan kadi nga awan kapadam iti Israel? Apay ngarud a saanmo a binantayan ti apom nga ari? Ta immay ti maysa kadagiti soldado tapno patayenna ti apom nga ari.+ 16  Saan a nasayaat ti inaramidmo. Isapatak iti nagan ti sibibiag a Dios a ni Jehova, a maikarika a matay, ta saanmo a binantayan ti apom, ti dinutokan ni Jehova.+ Kitaem ti aglawlawmo! Ayanna ti pika ti ari ken ti pagkargaan iti danum+ iti uluananna?” 17  Nailasin ni Saul ti timek ni David ket kinunana: “Sika kadi dayta, anakko a David?”+ Insungbat ni David: “Wen, apo ari.” 18  Innayonna: “Apay a kamkamatem daytoy adipenmo,+ ta ania aya ti inaramidko, ken ania ti basolko?+ 19  O apo ari, pangngaasim ta denggem daytoy adipenmo: No ni Jehova ti nangtignay kenka a bumusor kaniak, awatenna* koma ti datonko a bukbukel. Ngem no dagiti tattao ti nangsugsog kenka,+ mailunodda iti imatang ni Jehova, ta pinagtalawdak ita nga aldaw manipud iti pannakikaykaysak iti tawid ni Jehova.+ Ibagbagada, ‘Mapanka agserbi kadagiti sabali a dios!’ 20  Dinak koma ngarud papatayen iti lugar nga adayo iti imatang ni Jehova, ta maymaysa la a timel+ ti birbiroken ti ari ti Israel, a kas man la mangkamkamat iti atap a billit iti kabambantayan.” 21  Kinuna ni Saul: “Nagbasolak.+ Agawidkan, anakko a David, ta saankanton a dangran, gapu ta imbilangmo a napateg ti biagko*+ ita nga aldaw. Wen, nagtignayak a simamaag ken nakaaramidak iti nakaro a kamali.” 22  Kinuna ni David: “Adda ditoy ti pika ti ari. Mangibaonka koma iti taom nga umay mangala. 23  Gunggonaanto ni Jehova ti asinoman gapu iti kinalinteg+ ken kinamatalekna, ta inyawatnaka kaniak ni Jehova ita nga aldaw ngem diak maitured a dangran ti dinutokan ni Jehova.+ 24  Kitaem! No kasano nga imbilangko ti biagmo* a napateg ita nga aldaw, kasta met koma ti kapateg ti biagko* iti imatang ni Jehova, ket isalakannak koma iti amin a pakarigatak.”+ 25  Kinuna ni Saul ken David: “Bendisionannaka koma ti Dios, anakko a David. Sigurado a mangaramidkanto kadagiti naindaklan a bambanag ket agballigikanto.”+ Kalpasanna, pimmanawen ni David, ket nagawid metten ni Saul.+

Footnotes

Wenno mabalin a, “ti desierto; ti let-ang.”
Lit., “angotenna.”
Wenno “kararuak.”
Wenno “kararuam.”
Wenno “kararuak.”