Ti Umuna a Samuel 19:1-24

  • Agtultuloy a guraen ni Saul ni David (1-13)

  • Itarayan ni David ni Saul (14-24)

19  Idi agangay, imbaga ni Saul ken Jonatan nga anakna ken iti amin nga adipenna a kayatna a patayen ni David.+  Ngem ipatpateg unay ni Jonatan ni David,+ isu nga imbagana ken David: “Kayatnaka a patayen ni amak. Pangngaasim ta agan-annadka inton bigat, ken masapul nga aglemmengka ken dika agpakpakita.  Kumuyogakto ken amak a mapan iti away nga ayanmo. Kasaritakto maipapan kenka, ket aniaman ti maammuak, ipakaammokto kenka.”+  Pinadpadayawan ni Jonatan ni David+ ken Saul nga amana. Kinunana kenkuana: “Saan koma nga agbasol ti ari iti adipenna a ni David, ta saan a nagbasol kenka ken para iti pagimbagam ti amin nga inaramidna.  Insebbana ti biagna* idi pinatayna ti Filisteo,+ tapno ipaay ni Jehova ti dakkel a balligi* iti intero nga Israel. Nakitam dayta, ket napalalo ti ragsakmo. Isu nga apay a kayatmo a patayen ni David nga awan gapgapuna idinto ta awan basolna kenka?”+  Dimngeg ni Saul iti imbaga ni Jonatan, ket insapatana: “Isapatak iti nagan ti sibibiag a Dios a ni Jehova, saankonto a patayen.”  Kalpasanna, inayaban ni Jonatan ni David ket imbagana amin dagita kenkuana. Isu nga impan ni Jonatan ni David ken Saul, ket nagtultuloy a nagserbi kenkuana kas iti dati.+  Idi agangay, bimtak manen ti gubat, ket napan nakigubat ni David kadagiti Filisteo. Nagadu ti pinatayna kadakuada isu a nagtatarayda a pimmanaw.  Ket impalubos ni Jehova a mariribuk ti panunot ni Saul+ idi agtugtugaw iti balayna a nakaiggem iti pika bayat nga agtoktokar ni David iti arpa.+ 10  Pinadas ni Saul a puntaan ni David iti pika a sumalput iti diding, ngem nalisianna, isu a ti diding ti napuntaan iti pika. Nagtalaw ni David iti dayta a rabii. 11  Idi agangay, nangibaon ni Saul kadagiti lallaki a mapan agsiim iti balay ni David tapno patayenda iti kabigatanna,+ ngem kinuna ti asawa ni David a ni Mical: “No saanka pay la nga agtalaw ita a rabii, bangkaykanton inton bigat.” 12  Dagus a pinaulog ni Mical ni David iti tawa tapno alisto a makalibas. 13  Innala ni Mical ti terafim nga estatua* ken impaiddana iti kama, ket nangikabil iti lupot a naaramid iti dutdot ti kalding iti uluanan, sana pinarabawan dayta iti bado. 14  Nangibaon ni Saul kadagiti lallaki a mangala ken David, ngem kinuna ni Mical: “Agsakit ni David.” 15  Imbaon manen ni Saul dagiti lallaki a mapanda kitaen ni David, a kinunana: “Iyegyo kaniak a nakaidda iti kamana tapno mapatayko.”+ 16  Idi simrek dagiti imbaonna, nakitada ti terafim nga estatua* iti kama ken ti lupot a naaramid iti dutdot ti kalding iti uluananna. 17  Kinuna ni Saul ken Mical: “Apay nga inallilawnak ken impalubosmo a makalibas ti kabusorko?”+ Insungbat ni Mical ken Saul: “Imbagana ngamin kaniak, ‘Palubosannak, ta no saan, patayenka!’” 18  Nagtalaw ni David ket napan ken Samuel idiay Rama.+ Imbagana ti amin nga inaramid kenkuana ni Saul. Kalpasanna, pimmanawda a dua ken Samuel, ket nagnaedda idiay Naiot.+ 19  Idi agangay, naipadamag ken Saul: “Adda ni David idiay Naiot sadi Rama.” 20  Dagus a nangibaon ni Saul kadagiti lallaki a mangtiliw ken David. Idi nakitada nga agipadpadto dagiti lallakay a propeta, ket nakatakder ni Samuel a mangidadaulo kadakuada, naadda ti espiritu ti Dios kadagiti imbaon ni Saul, ket nangrugida a nagtignay a kas kadagiti propeta. 21  Idi imbagada dayta ken Saul, dagus a nangibaon kadagiti sabali a lallaki, ket nangrugida met a nagtignay a kas propeta. Isu a nangibaon manen ni Saul iti maikatlo a grupo, ket nangrugida met a nagtignay a kasla propeta. 22  Idi kuan, napan met ni Saul sadi Rama. Idi nakadanon iti dakkel a pagurnongan iti danum idiay Secu, dinamagna: “Sadino ti ayan da Samuel ken David?” Insungbatda: “Addada idiay Naiot+ sadi Rama.” 23  Bayat a mapmapan ni Saul idiay Naiot sadi Rama, naadda met kenkuana ti espiritu ti Dios, ket nagtignay a kas propeta bayat a magmagna agingga a nakadanon idiay Naiot sadi Rama. 24  Inuksobna pay dagiti badona ket nagtignay met a kas propeta iti sango ni Samuel, sa nagidda a nakaussob iti agmalem ken agpatnag. Isu nga ibagbagada: “Propeta met kadi ni Saul?”+

Footnotes

Wenno “Inkabilna ti kararuana iti imana.”
Wenno “pannakaisalakan.”
Wenno “didiosen ti pamilia; idolo.”
Wenno “didiosen ti pamilia; idolo.”