Ti Umuna a Samuel 7:1-17

  • Ti Lakasa idiay Kiriat-jearim (1)

  • Iparegta ni Samuel: ‘Ni laeng Jehova ti pagserbianyo’ (2-6)

  • Panagballigi ti Israel idiay Mizpa (7-14)

  • Agserbi ni Samuel kas ukom iti Israel (15-17)

7  Gapuna, immay innala dagiti tattao ti Kiriat-jearim ti Lakasa ni Jehova ket impanda iti balay ni Abinadab+ iti turod. Dinutokanda* ti anakna a ni Eleazar a mangbantay iti Lakasa ni Jehova.  Agdagup iti 20 a tawen ti kabayag ti panagtalinaed ti Lakasa idiay Kiriat-jearim. Kabayatanna, nagpatulong* ti amin nga Israelita ken Jehova.+  Kinuna ni Samuel iti amin nga Israelita: “No naimpusuan ti panagsubliyo ken Jehova,+ ikkatenyo dagiti didiosen dagiti sabali a nasion+ ken dagiti rebulto ni Astoret,+ ken ni laeng Jehova ti pangipaayanyo iti naimpusuan a panagdayaw ken panagserbiyo,+ ket ispalennakayto manipud iti ima dagiti Filisteo.”+  Iti kasta, inikkat dagiti Israelita dagiti rebulto ni Baal ken ni Astoret ket ni laeng Jehova ti nagserbianda.+  Kalpasanna, kinuna ni Samuel: “Ibagayo iti amin nga Israelita nga aguummongda idiay Mizpa,+ ket sadiay nga ikararagankayto ken Jehova.”+  Isu a naguummongda amin idiay Mizpa. Nagsakdoda iti danum sada imbukbok iti imatang ni Jehova ket nagayunarda* iti dayta nga aldaw.+ Kinunada sadiay: “Nagbasolkami ken Jehova.”+ Idiay Mizpa a nangrugi a nagserbi ni Samuel a kas ukom+ dagiti Israelita.  Idi nadamag dagiti Filisteo a naguummong dagiti Israelita idiay Mizpa, nagrubbuat dagiti mangiturturay kadagiti Filisteo+ tapno rautenda ida. Naammuan dayta dagiti Israelita isu a nagbutengda kadagiti Filisteo.  Kinuna dagiti Israelita ken Samuel: “Dimo isardeng ti agkararag ken Jehova a Diostayo tapno tulongan+ ken isalakannatayo iti ima dagiti Filisteo.”  Kalpasanna, nangala ni Samuel iti agsussuso nga urbon a karnero sa indatagna ken Jehova kas sibubukel a daton a mapuoran;+ ket kiniddaw ni Samuel ken Jehova a tulonganna ti Israel, ket sinungbatan ni Jehova.+ 10  Bayat nga idatdaton ni Samuel ti daton a mapuoran, intultuloy dagiti Filisteo a dinarup ti Israel. Ngem iti dayta nga aldaw, nangpataud ni Jehova iti napigsa a gurruod+ iti ayan dagiti Filisteo, ket riniribukna ida+ isu a naabakda iti imatang ti Israel.+ 11  Pimmanaw dagiti lallaki nga Israelita idiay Mizpa ket pinapatayda dagiti Filisteo bayat a kamkamatenda ida agingga idiay abagatan ti Bet-car. 12  Kalpasanna, nangala ni Samuel iti maysa a bato+ ket inkabilna iti nagbaetan ti Mizpa ken Jesana ket pinanagananna dayta iti Ebenezer,* ta kinunana: “Tultulongannatayo ni Jehova agingga ita.”+ 13  Naabak dagiti Filisteo isu a saandan a napnapan iti teritoria ti Israel;+ ket kanayon a linapdan ni Jehova ti iraraut dagiti Filisteo bayat a sibibiag ni Samuel.+ 14  Naisubli met kadagiti Israelita dagiti siudad nga innala dagiti Filisteo, manipud Ekron agingga idiay Gat. Napasubli dagiti Israelita ti teritoriada nga innala idi dagiti Filisteo. Nagkappia met dagiti Israelita ken dagiti Amoreo.+ 15  Nagserbi ni Samuel kas ukom ti Israel iti unos ti panagbiagna.+ 16  Tinawen a napan idiay Bethel,+ Gilgal,+ ken Mizpa,+ ket nagserbi kas ukom ti Israel kadagita a lugar. 17  Ngem agawid met la no kua idiay Rama,+ ta idiay ti ayan ti balayna, ket nagserbi met sadiay kas ukom ti Israel. Nangibangon sadiay iti altar para ken Jehova.+

Footnotes

Lit., “Pinagbalinda a nasantuan.”
Wenno “immasug.”
Kitaem ti Glosario, “Panagayunar.”
Kaipapananna, “Bato ti Tulong.”