Ti Umuna a Samuel 1:1-28

  • Ni Elkana ken dagiti asawana (1-8)

  • Ikararag ti awan anakna a ni Hanna a maaddaan iti anak a lalaki (9-18)

  • Nayanak ni Samuel ket naited ken Jehova (19-28)

1  Adda idi maysa a lalaki nga Efraimita idiay Ramataim-zofim*+ iti kabambantayan ti Efraim.+ Elkana+ ti naganna. Isu ket anak ni Jeroham, apoko ni Elihu, apoko iti tumeng ni Tohu, ken apoko iti dapan ni Zuf.  Dua ti asawana, da Hanna ken Penina. Adda annak ni Penina ngem awan annak ni Hanna.  Manipud iti siudadna, tinawen a mapan ni Elkana idiay Shilo+ tapno agdaydayaw* ken agdaton ken ni Jehova a panguluen dagiti armada. Sadiay nga agserserbi ti dua nga annak ni Eli a da Hofni ken Finehas+ kas papadi ni Jehova.+  Iti maysa nga aldaw a nagdaton ni Elkana, inikkanna ni Penina nga asawana iti bingay agraman ti amin nga annakna a lallaki ken babbai,+  ngem inikkanna ni Hanna iti espesial a bingay gapu ta isu ti ay-ayatenna; ngem ni Jehova saanna nga inikkan ni Hanna iti annak.*  Gapu ta saan nga inikkan ni Jehova ni Hanna iti annak, kanayon nga in-insultuen ti karibalna nga asawa tapno masaktan.  Kasta ti ar-aramiden ni Penina iti kada tawen; kada mapan ni Hanna iti balay ni Jehova,+ kasta unay ti pananginsultona nga uray la agsangsangit ken saan a mangan ni Hanna.  Ngem kinuna ni Elkana nga asawana: “Hanna, apay nga agsangsangitka, ken apay a saanka a mangan, ken apay a nakalidlidayka?* Uray ta addaak ditoy. Saan kadi a nasaysayaat dayta ngem iti 10 nga annak a lallaki?”  Idi addada idiay Shilo, timmakder ni Hanna apaman a nalpasda a nangan ken imminum. Iti daydi a tiempo, agtugtugaw ti padi a ni Eli iti tugaw nga adda iti asideg ti hamba iti pagserkan ti templo*+ ni Jehova. 10  Nasaem unay ti rikna ni Hanna isu a nagkararag ken Jehova+ ket nagsangit iti napalalo. 11  Inkarina: “O Jehova a panguluen dagiti armada, no kitaem ti pannakaparigat daytoy adipenmo ken lagipennak ken saanmo a lipaten daytoy adipenmo ken ikkannak iti anak a lalaki,+ itedkonto kenka, Jehova, tapno agserbi kenka iti unos ti panagbiagna, ken dinanto pulos papukisan ti buokna.”+ 12  Bayat ti napaut a panagkararagna ken Jehova, sipsiputan idi ni Eli ti ngiwatna. 13  Agsasao ni Hanna iti un-unegna a ti laeng bibigna ti agkutkuti, ngem saan a mangngeg ti bosesna. Isu nga impagarup ni Eli a nabartek ni Hanna. 14  Kinuna ni Eli kenkuana: “Apay a nabartekka? Isardengmon ti aginum.” 15  Insungbat ni Hanna: “Saan, apo! Maladladingitanak unay; saanak a nakainum iti arak wenno aniaman a naingel. Iyeb-ebkasko laeng ken Jehova ti pakadagsenan daytoy kararuak.*+ 16  Dimo koma ipagarup nga awan serserbi daytoy adipenmo a babai, ta agkarkararagak agingga ita gapu iti nakaro a pannakaburibor ken pannakaparparigatko.” 17  Kinuna ni Eli: “Inkan, dikan agdanag. Sapay koma ta patgan ti Dios ti Israel ti kiniddawmo kenkuana.”+ 18  Kinuna ni Hanna: “Sapay koma ta itultuloymo a paraburan daytoy adipenmo.” Kalpasanna, pimmanaw ni Hanna ket nangan ken saanen a naliday ti rupana. 19  Kabigatanna, nasapa a bimmangon ti sangapamiliaan ket nagdaydayawda ken Jehova. Kalpasanna, nagawidda iti balayda idiay Rama.+ Nakidenna ni Elkana ken ni Hanna nga asawana, ket linagip ni Jehova ni Hanna.+ 20  Iti uneg ti makatawen,* nagsikog ni Hanna ken nangipasngay iti lalaki a pinanagananna+ iti Samuel,* gapu ta kas kinunana, “isu ket kiniddawko ken Jehova.” 21  Idi agangay, napan ni Elkana ken ti intero a sangakabbalayanna idiay Shilo tapno idatagna ti tinawen a daton ken Jehova+ ken ti daton a pangtungpal iti karina. 22  Ngem nagbati ni Hanna+ ta kinunana ken lakayna: “Apaman a mapusot* ti ubing, ikuyogkonto; ket agparangto iti sango ni Jehova ken manipud iti dayta nga aldaw, agyanton sadiay.”+ 23  Kinuna ti asawana a ni Elkana: “Aramidem ti ammom a kasayaatan.* Agtalinaedka ditoy balay agingga a pusotem ti ubing. Sapay koma ta itungpal ni Jehova ti imbagam.” Isu a nagtalinaed iti balayda ket tinagibina ti anakna agingga a napusot. 24  Idi napusotna ni Samuel, inkuyogna idiay Shilo. Nangitugot met iti kalakian a baka a tallo ti tawenna, maysa nga efa* nga arina, ken dakkel a karamba a napno iti arak,+ ket simrekda nga agina iti balay ni Jehova idiay Shilo.+ 25  Kalpasanna, pinartida ti baka ket impanda ti ubing ken Eli. 26  Kinuna ni Hanna: “Apo, dispensarennak! Kinaagpaysuanna, siak daydi babai a nakitam nga agtaktakder idi ditoy tapno agkararag ken Jehova.+ 27  Inkararagko idi a maaddaanak iti anak a lalaki, ket pinatgan ni Jehova ti kiddawko.+ 28  Itedkon* ken Jehova. Isu ket kukuan ni Jehova iti unos ti panagbiagna.” Ket nagruknoy* sadiay ken Jehova.

Footnotes

Wenno “idiay Rama, maysa a Zufita.”
Wenno “agruknoy.”
Lit., “sinerraanna ti aanakan ni Hanna.”
Wenno “apay a malmalday ta pusom?”
Kayatna a sawen, ti tabernakulo.
Kitaem ti Glosario.
Wenno mabalin nga, “Idi dimteng ti tiempo.”
Kaipapananna, “Nagan ti Dios.”
Wenno “mapusing.”
Lit., “ti naimbag kadagita matam.”
Agarup 22 L. Kitaem ti App. B14.
Lit., “Ipabulodkon.”
Nalawag a tumukoy ken Elkana.