Ti Umuna a Samuel 2:1-36

  • Ti kararag ni Hanna (1-11)

  • Dagiti basol ti dua nga annak a lallaki ni Eli (12-26)

  • Ukomen ni Jehova ti pamilia ni Eli (27-36)

2  Inkararag ni Hanna: “Naragsak ti pusok gapu ken Jehova;+Pinapigsanak ni Jehova.* Inungapko ti ngiwatko a mangsungbat kadagiti kabusorko,Ta pakaragsakak dagiti panangisalakanmo.   Awan ti asinoman a nasantuan a kas ken Jehova,Awan ti sabali malaksid kenka;+Ken awan ti dakkel a bato a kas iti Diostayo.+   Isardengyon ti natangsit a panagsasaoyo,Awan koma ti kinapangas a rummuar iti ngiwatyo,Ta ni Jehova ket Dios ti pannakaammo,+Ken umiso ti panangtingitingna kadagiti aramid ti tattao.   Madadael dagiti pana ti nabileg a lallaki,Ngem mapapigsa dagidiay nakapuy.+   Dagidi adu ti makanda ket agtrabahodan tapno adda kanenda,Ngem saanen nga agbisin dagiti agkirkiraos idi ti tianna.+ Pito ti inyanak ti lupes,*+Ngem saanen a makaanak* daydiay adu ti annakna.   Mangpapatay ni Jehova ken mangtaginayon iti biag;*Ipanna ti tao iti Tanem* ken aonenna ida.+   Ni Jehova ket mangpapanglaw ken mangpabaknang;+Mangipababa ken mangitan-ok.+   Mangbangon kadagiti nanumo manipud iti tapok;Mangaon kadagiti napanglaw manipud iti nabunton a dapo,*+Tapno pagtugawenna ida iti abay dagiti prinsipe;Ken ipaayanna ida iti nadayaw a pagtugawan. Ta tengtenglen ni Jehova dagiti pundasion ti daga,+Ken iparabawna kadagita ti nabunga a daga.   Saluadanna ti pannagna dagiti napudno kenkuana,+Ngem madadaelto dagiti managdakdakes iti nasipnget a tanem,+Ta saan nga agballigi ti tao iti bukodna a bileg.+ 10  Dadaelento ni Jehova dagiti bumusbusor kenkuana;*+Paggurruodennanto ti langit maibusor kadakuada.+ Ukomento ni Jehova ti intero a daga,+Ikkannanto iti pannakabalin ti ari a pinilina+Ken papigsaenna* daydiay dinutokanna.”*+ 11  Kalpasanna, nagawid ni Elkana idiay Rama, ngem ti ubing ket nagserbi ken Jehova+ babaen ti panangiwanwan ti padi a ni Eli. 12  Dakes dagiti annak a lallaki ni Eli;+ awan panagraemda ken Jehova. 13  Kastoy ti ar-aramidenda no alaenda ti maiparbeng a bingay ti papadi manipud iti idaton dagiti tattao:+ No adda agdaton, umasideg ti maysa a katulongan ti padi a nakaiggem iti tinidor a tallo ti tudokna bayat a malutluto ti karne, 14  ket idugsolna dayta iti palanggana, iti dua ti pagiggamanna a paglutuan, iti kaldero, wenno iti maysa ti pagiggamanna a paglutuan. Aniaman a matudok ti tinidor, kukua daytan ti padi. Kasta ti aramidenda idiay Shilo iti amin nga Israelita a mapan sadiay. 15  Maysa pay, sakbay a puoran ti agidatdaton ti taba,+ asitgan ti maysa a katulongan ti padi sana ibaga: “Ikkam ti padi iti karne nga itunona. Dina kayat a ti naluto ti itedmo no di ket daydiay saan pay a naluto.” 16  No kuna ti agidatdaton: “Urayem a pagasukenda nga umuna ti taba+ sakbay nga alaem ti kayatmo,”* ibaga ti katulongan ti padi: “Saan, itedmo kaniak itan; no dimo kayat, siakon ti mangala!” 17  Isu a kimmaro ti basol dagiti katulongan ti padi iti imatang ni Jehova+ gapu ta awan ti panagraemda kadagiti maidaton ken Jehova. 18  Agserserbi idi ni Samuel+ ken Jehova, a nakasuot* iti lienso nga efod+ uray no ubing pay. 19  Iyar-aramidan met ni nanangna iti bassit nga awan manggasna a bado, ket tinawen nga itedna dayta kenkuana no mapan idiay Shilo a kaduana ni lakayna tapno idatagda ti tinawen a datonda.+ 20  Binendisionan ni Eli ni Elkana ken ti asawana ket kinunana: “Sapay koma ta ikkannakayo ni Jehova iti sabali pay nga anak a kasukat ti naited ken Jehova.”+ Kalpasanna, nagawiddan. 21  Kinaasian ni Jehova ni Hanna isu a nagsikog+ ken nangyanak iti tallo pay a lallaki ken dua a babbai. Ket nagtultuloy a dimmakkel ti ubing a ni Samuel iti sanguanan ni Jehova.+ 22  Lakay unayen ni Eli ngem nangngegna ti amin nga ar-aramiden dagiti annakna a lallaki+ iti intero nga Israel, ken ti pannakikakaiddada kadagiti babbai nga agserserbi iti ruangan ti tolda a pagkonsultaan.+ 23  Ket sangkaibagana idi kadakuada: “Apay nga itultuloyyo ti kasta nga ar-aramidenyo? Ta dakes ti mangmangngegko nga ibagbaga ti amin a tattao maipapan kadakayo. 24  Isardengyon, annakko, ta saan a nasayaat ti damag nga agwarwaras iti ili ni Jehova. 25  No agbasol ti maysa iti padana a tao, adda sabali a tao a mabalin nga agpakaasi ken Jehova para kenkuana;* ngem no makabasol ti maysa a tao ken Jehova,+ siasino ti makaikararag kenkuana?” Ngem dida inkaskaso ni amada, ta inkeddengen ni Jehova a papatayen ida.+ 26  Kabayatanna, dimmakkel ti ubing a ni Samuel ken nagbalin nga ad-adda a makaay-ayo ken Jehova ken kadagiti tattao.+ 27  Adda lalaki nga imbaon ti Dios a mapan ken Eli ket kinunana: “Daytoy ti kuna ni Jehova, ‘Saan kadi a nalawag nga impakaammok ti bagik iti kapuonan ni amam bayat nga addada idi idiay Egipto kas ad-adipen iti balay ni Faraon?+ 28  Ket isu ti napili iti amin a tribu iti Israel+ nga agserbi kaniak kas padi ken umuli iti altarko+ tapno agdaton, agpuor iti insienso,* ken agkawes iti efod iti sanguanak. Inikkak isuna ken ti kaputotanna iti kalintegan a makibingay iti amin a napuoran a daton dagiti Israelita.*+ 29  Apay nga awan panagraemyo* kadagiti imbilinko a maidaton ken maisagut kaniak iti balayko?+ Apay nga ad-adda a padpadayawam dagiti annakmo ngem siak, ta agpalpalukmegkayo manipud kadagiti kasayaatan a paset iti amin nga idaton ti ilik nga Israel?+ 30  “‘Isu a daytoy ti ibaga ni Jehova a Dios ti Israel: “Pudno a kinunak idi a ti pamiliam ken ti pamilia ni amam ket kanayonto nga agserbi kaniak.”+ Ngem kuna itan ni Jehova: “Saanen a mapasamak dayta gapu ta padayawak dagiti mangpadpadayaw kaniak,+ ngem umsiek dagiti mangum-umsi kaniak.” 31  Kitaem! Dumtengto ti tiempo a pukawek ti bilegmo* ken ti bileg ti pamilia ni amam, tapno awan ti malakayan a miembro iti pamiliam.+ 32  Ket addanto makitam a kabusor iti balayko uray no nasayaat ti maar-aramid iti Israel,+ ken awanton a pulos ti malakayan iti pamiliam. 33  Ti lalaki iti pamiliam a saanko nga ikkaten iti panagserbina iti altarko ti makagapu a kumapuyto ti panagkitam ken agladingitka,* ngem ad-adunto iti pamiliam ti matay iti espada dagiti tattao.+ 34  Ti mapasamak iti dua nga annakmo a da Hofni ken Finehas ti agbalinto a pagilasinan kenka: Aggiddandanto a matay iti maysa nga aldaw.+ 35  Ket mangpiliakto iti matalek a padi nga agserbi kaniak.+ Tungpalennanto ti pagayatan ti pusok;* ibangonakto iti manayon a balay, ket kanayonto a pagserbianna daydiay dinutokak. 36  Asinoman a mabati iti pamiliam ket mapanto agruknoy kenkuana tapno matangdanan iti kuarta ken maaddaan iti tinapay ken ibagananto: “Pangngaasim ta palubosannak nga agserbi a kas padi tapno adda kanek a tinapay.”’”+

Footnotes

Lit., “Ti sarak ket intan-ok ni Jehova.” Kitaem ti Glosario, “Sara.”
Saan nga agsikog.
Lit., “nagango.”
Wenno “mangpabiag.”
Wenno “Sheol,” kayatna a sawen, simboliko a pagtungpalan dagiti natay. Kitaem ti Glosario.
Wenno mabalin a, “nabunton a basura.”
Wenno mabalin a, “Mapabutnganto dagidiay bumusbusor ken Jehova.”
Lit., “itan-okna ti sara.” Kitaem ti Glosario, “Sara.”
Wenno “pinulotanna.”
Wenno “tarigagayan ti kararuam.”
Lit., “nakabarikes.”
Wenno mabalin a, “bumallaet ti Dios para kenkuana.”
Wenno mabalin nga, “agpaasuk iti daton.”
Lit., “annak ni Israel.”
Lit., “a kugtaranyo.”
Lit., “takiagmo.”
Wenno “makagapu a kumapsut ti kararuam.”
Wenno “ti adda iti pusok ken kararuak.”