Ti Umuna a Samuel 20:1-42

  • Napudno ni Jonatan ken David (1-42)

20  Pimmanaw ni David idiay Naiot sadi Rama ngem napan ken Jonatan ket kinunana: “Ania ti inaramidko?+ Ania ti basolko, ken kasano koma a nakabasolak ken ni amam, ken apay a kayatnak a patayen?”  Kinuna ni Jonatan: “Saanto a mapasamak dayta!+ Saankanto a matay. Sigurado nga ibaga kaniak ni amak ti aniaman nga aramidenna, dakkel man wenno bassit. Apay koma nga ilimedna dayta kaniak? Saanto a mapasamak dayta.”  Ngem kinuna pay ni David: “Sigurado nga ammo ni amam a naimbagka kaniak+ isu nga ibagananto, ‘Diyo ibagbaga daytoy ken Jonatan ta amangan no agsakit ti nakemna.’ Ngem isapatak kenka ken iti nagan ti sibibiag a Dios a ni Jehova a masiguradok a maysa laengen nga askaw ti baetmi ken patay!”+  Kinuna ni Jonatan ken David: “Aramidek ti aniaman nga ibagam.”  Kinuna ni David ken Jonatan: “Baro a bulan inton bigat,+ ket sigurado a mainanama a makipanganak iti ari. Masapul a papanawennak tapno mapanak aglemmeng iti away agingga iti rabii ti maikatlo nga aldaw.  No bilang birokennakto ni amam, ibagamto, ‘Impakpakaasi ni David a palubosak nga agawid a dagus idiay Betlehem a siudadna,+ gapu ta kayatna a makadua ti intero a pamiliana iti tinawen a panagdatonda sadiay.’+  No ibagana a ‘Nasayaat no kasta,’ awan ti pagbutngan daytoy adipenmo. Ngem no makapungtot, ammomon a talaga a kayatnak a patayen ni amam.  Ipakitam koma iti adipenmo ti napudno nga ayatmo+ ta nakitulagka kaniak nga adipenmo iti imatang ni Jehova.+ Ngem no adda basolko,+ sikan a mismo ti mangpatay kaniak. Apay pay la koma nga iyawatnak ken ni amam?”  Kinuna ni Jonatan: “Diak pulos maaramid dayta kenka! No maammuak a porsegido ni amak a mangpatay kenka, sigurado nga ibagakto kenka.”+ 10  Kinuna ni David ken Jonatan: “Kasanokto ngarud a maammuan no makapungtot kenka ni amam?” 11  Kinuna ni Jonatan ken David: “Inta idiay away,” isu a napanda idiay away. 12  Kinuna ni Jonatan ken David: “Ni Jehova a Dios ti Israel ti saksi nga ammuekto ken amak iti agarup kastoy nga oras inton bigat wenno iti maikatlo nga aldaw. No nasayaat ti riknana kenka, pakaammuankanto. 13  Ngem no talaga a kayatnaka a dangran ni amak, nakarkaro pay koma ti aramiden kaniak ni Jehova no saanka a pakdaaran ken paglemmengen. Sapay koma ta adda kenka ni Jehova,+ a kas iti kaaddana idi ken amak.+ 14  Ket saanmonto kadi nga ipakita kaniak ti napudno nga ayat ni Jehova bayat a sibibiagak ken uray pay inton matayak?+ 15  Sapay koma ta itultuloymo nga ipakita ti napudno nga ayat iti sangakabbalayak+ uray no dadaelen ni Jehova ti amin a kabusor ni David iti rabaw ti daga.” 16  Nakitulag ni Jonatan ken David a dida baybay-an ti pamilia ti tunggal maysa kadakuada ket kinunana: “Dusaento ni Jehova dagiti kabusor ni David.” 17  Isu a pinagkari manen ni Jonatan ni David a taginayonenna ti panangipategna kenkuana, ta ipatpateg ni Jonatan ni David a kas iti panangipategna iti bagina.*+ 18  Kinuna kenkuana ni Jonatan: “Baro a bulan inton bigat,+ ket birokennakanto ni amak, ta bakante ti tugawmo. 19  Ket iti maikatlo nga aldaw, sigurado a damagennanto no ayanmo, isu a mapankanto iti naglemmengam iti napalabas nga aldaw,* ket agyanka ditoy, iti asideg ti bato. 20  Mangibiatakto iti tallo a pana iti maysa a sikigan ti bato, a kasla adda puntaak. 21  Inton ibaonko ti katulongak, ibagak, ‘Birokem dagiti pana.’ No ibagak iti katulongak, ‘Kitaem! Adda dita sikigam dagiti pana, alaem,’ umaykanto ngarud, ta isapatak iti nagan ti sibibiag a Dios a ni Jehova a saanka a maan-ano ken awan ti peggad. 22  Ngem no ibagakto iti katulongak, ‘Kitaem! Adayo ti ayan dagiti pana,’ pumanawkanto ngaruden, ta kayat ni Jehova nga agtalawkan. 23  No maipapan iti karita a dua,+ agnanayon koma a ni Jehova ti saksita.”+ 24  Isu a naglemmeng ni David iti away. Idi dimteng ti baro a bulan, nagtugaw ti ari iti panganan.+ 25  Nagtugaw ti ari iti kanayon a pagtugtugawanna iti asideg ti diding. Adda iti sangona ni Jonatan. Nakatugaw ni Abner+ iti abay ni Saul, ngem bakante ti tugaw ni David. 26  Saan a nagtagtagari ni Saul iti dayta nga aldaw, ta kinunana iti un-unegna: ‘Adda la ketdi napasamak kenkuana isu a saan a nadalus.+ Wen, saan pay a nadalus.’ 27  Iti simmaruno nga aldaw kalpasan ti baro a bulan, iti maikadua nga aldaw, bakante latta ti tugaw ni David, isu a dinamag ni Saul ken Jonatan nga anakna: “Apay nga awan ditoy panganan idi kalman ken uray ita ti anak ni Jesse?”+ 28  Insungbat ni Jonatan ken Saul: “Impakpakaasi ni David a palubosak nga agawid idiay Betlehem.+ 29  Kinunana kaniak, ‘Pangngaasim ta palubosannak nga agawid ta agdaton ti pamiliami iti siudadmi, ket papaayabannak ni manongko. Isu a no naimbagka kaniak, palubosannak koma a mapan mangkita kadagiti kakabsatko.’ Isu a saan nga immay ita iti lamisaan ti ari.” 30  Nakapungtot ni Saul ken Jonatan ket kinunana: “Sika nga anak ti rebelioso a babai. Apay, ti kunam diak ammo a kaykayatmo a kanunongan ti anak ni Jesse, a pakaibabainam ken pakaibabainan ni inam?* 31  Agingga a sibibiag dayta nga anak ni Jesse ditoy daga, dimonto pulos masublat ti trono ken saan nga agpaut ti pagariam.+ Mangibaonka iti mangipan kenkuana ditoy, ta maikari a matay.”*+ 32  Ngem kinuna ni Jonatan ken Saul nga amana: “Apay a masapul a mapapatay?+ Ania aya ti inaramidna?” 33  Gapu iti dayta, inggayang ni Saul ken Jonatan ti pika tapno patayenna,+ isu nga ammona a determinado ni amana a mangpapatay ken David.+ 34  Nakapungtot ni Jonatan ket pimmanaw a dagus iti lamisaan, ken saan a nangnangan iti maikadua nga aldaw kalpasan ti baro a bulan, ta nasaktan ti riknana gapu ken David+ ken imbabain ti mismo nga amana. 35  Kabigatanna, napan ni Jonatan iti away tapno makipagkita ken David, a kaduana ti maysa nga agtutubo a katulonganna.+ 36  Kinunana iti katulonganna: “Agtarayka ken birokem dagiti pana nga ibiatko.” Nagtaray ti katulongan, ket imbiat ni Jonatan ti pana iti labesna. 37  Idi nakadanon ti katulongan iti nagdissuan ti pana nga imbiat ni Jonatan, impukkaw ni Jonatan iti katulonganna: “Saan kadi nga iti labesmo ti ayan ti pana?” 38  Impukkaw ni Jonatan iti katulonganna: “Darasem! Alistuam a piduten! Alaem a dagus!” Ket pinidut ti katulongan ni Jonatan dagiti pana sa nagsubli iti ayan ni Jonatan. 39  Saan nga ammo ti katulongan ti aniaman maipapan iti daytoy; da laeng Jonatan ken David ti makaammo. 40  Kalpasanna, inted ni Jonatan dagiti armasna iti katulonganna sana imbilin: “Inkan, iyawidmo dagitoy iti siudad.” 41  Idi nakapanawen ti katulongan, rimmuar ni David manipud iti asideg, iti abagatan. Namitlo a nagruknoy ni David, sada naginnagep ken nagsinnangit, ngem nakarkaro ti sangit ni David. 42  Kinuna ni Jonatan ken David: “Inkan, dika agdanag, ta nagkarita a dua+ iti nagan ni Jehova, ‘Agnanayon koma nga adda ni Jehova kadata kasta met iti kaputotam* ken iti kaputotak.’”*+ Timmakder ni David sa pimmanaw, ket nagawid met ni Jonatan iti siudad.

Footnotes

Wenno “kararuana.”
Lit., “aldaw ti panagtrabaho.”
Lit., “pakaibabainan ti kinalamolamo ni inam?”
Lit., “ta isu ket anak ni patay.”
Lit., “bin-im.”
Lit., “bin-ik.”