Ti Umuna a Samuel 22:1-23

  • Ni David idiay Adulam ken Mizpe (1-5)

  • Impapatay ni Saul dagiti papadi idiay Nob (6-19)

  • Makalibas ni Abiatar (20-23)

22  Manipud sadiay, naglibas ni David+ ket naglemmeng iti kueba ti Adulam.+ Idi nadamag dayta dagiti kakabsatna ken ti intero a pamilia ni amana, napanda sinurot sadiay.  Nakitipon kenkuana ti amin a problemado ken nakautang ken adda saksakiten ti nakemna ket isu ti nagbalin a panguluenda. Agarup 400 a lallaki ti nakikadua kenkuana.  Idi agangay, pimmanaw sadiay ni David ken napan idiay Mizpe iti Moab ket kinunana iti ari ti Moab:+ “Pangngaasim ta palubosam a makipagnaed kadakayo da amak ken inak agingga a maammuak ti kayat ti Dios nga aramiden kaniak.”  Imbati ngarud ni David dagiti nagannakna iti ari ti Moab, ket nakipagnaedda sadiay bayat nga aglemlemmeng iti kabambantayan.+  Idi agangay, kinuna ni propeta Gad+ ken David: “Saan a ditoy ti pagyanam. Mapanka idiay Juda.”+ Isu a pimmanaw ni David ket napan iti kabakiran ti Heret.  Nadamag ni Saul a naammuanen ti ayan ni David ken dagiti tattaona. Agtugtugaw idi ni Saul idiay Gibea+ a nakaiggem iti pika iti sirok ti kayo a tamarisko iti turod ken adda iti aglawlawna ti amin nga adipenna.  Kinuna ni Saul kadagiti adipenna nga adda iti aglawlawna: “Denggendak koma, dakayo a Benjaminita. Maikkannakayto met ngata ti anak ni Jesse+ kadagiti talon ken kaubasan? Mapilinakayto ngata amin nga agbalin a panguluen ti rinibu ken panguluen ti ginasut?+  Nagkukumplotkayo amin maibusor kaniak! Awan man la ti nangibaga kaniak a nakitulag ti mismo nga anakko iti anak ni Jesse!+ Awan kadakayo ti nangisakit kaniak ken nangibaga a ti mismo nga anakko ti nangsugsog iti maysa nga adipenko nga agplano maibusor kaniak, a kas iti mapaspasamak ita.”  Nakatakder idi iti ayan dagiti adipen ni Saul ni Doeg+ nga Edomita ket kinunana:+ “Nakitak ti anak ni Jesse a napan idiay Nob ken nakisarita ken Ahimelec nga anak ni Ahitub.+ 10  Nagpabalakad ken Jehova ket inikkanna ni David kadagiti abasto. Intedna pay ketdi ti espada ni Goliat a Filisteo.”+ 11  Dagus a pinaayaban ti ari ni Ahimelec nga anak ni Ahitub a padi ken ti amin a papadi iti pamilia ni amana nga adda idiay Nob isu a napanda amin iti ari. 12  Kinuna ni Saul: “Denggennak man, sika nga anak ni Ahitub!” ket kinunana: “Wen, apo.” 13  Kinuna kenkuana ni Saul: “Apay a nakikumplotka iti anak ni Jesse maibusor kaniak? Apay nga inikkam iti tinapay ken espada ken nagpabalakadka iti Dios para kenkuana? Busbusorennak ni David ken agplamplano maibusor kaniak a kas iti mapaspasamak ita.” 14  Simmungbat ni Ahimelec iti ari: “Asino kadagiti amin nga adipenmo ti mapagtalkan* a kas ken David?+ Isu ket manugangmo, O ari,+ ken panguluen dagiti guardiam ken mararaem iti balaymo.+ 15  Ita la kadi nga aldaw a nagpabalakadak iti Dios para kenkuana?+ Imposible a maaramidko ti ibagbagam! Saan koma a pabasolen ti ari ti adipenna ken ti intero a pamilia ni amak, ta awan a pulos ti ammo ti adipenmo maipapan iti daytoy.”+ 16  Ngem kinuna ti ari: “Masapul a matayka,+ Ahimelec, sika ken ti intero a pamilia ni amam.”+ 17  Isu a kinuna ti ari kadagiti guardia* nga agtaktakder iti aglawlawna: “Patayenyo dagiti papadi ni Jehova, ta kimmanunongda ken David! Ammoda nga aglemlemmeng ngem saanda nga impakaammo kaniak!” Ngem saan idi a kayat dagiti adipen ti ari a patayen dagiti papadi ni Jehova. 18  Isu a kinuna ti ari ken Doeg:+ “Sika ti mangpatay kadagiti papadi!” Dagus a napan ni Doeg nga Edomita+ ket pinatayna dagiti papadi. Iti dayta nga aldaw, 85 a tattao a nakasuot iti lienso nga efod ti pinatayna.+ 19  Ti Nob+ a siudad dagiti papadi ket rinautna met iti espada; inusarna ti espada a nangpapatay kadagiti lallaki agraman babbai, ubbing agraman kadagiti agsussuso, kalakian a baka, asno, ken karnero. 20  Ngem nakalibas ti maysa nga anak ni Ahimelec nga anak ni Ahitub, nga agnagan iti Abiatar,+ ket nagtartaray a napan ken David. 21  Impulong ni Abiatar ken David: “Pinatay ni Saul dagiti papadi ni Jehova.” 22  Kinuna ni David ken Abiatar: “Idi nakitak sadiay ni Doeg nga Edomita, ammok lattan+ nga agipulong ken Saul. Siak ti nakaigapuan ti pannakapapatay ti amin a miembro ti pamilia ni amam. 23  Makikaduaka kaniak. Dika agbuteng, ta asinoman nga agpanggep a mangpatay kenka, siak pay nga umuna ti patayenna. Ngem salaknibanka.”+

Footnotes

Wenno “matalek.”
Lit., “tumataray.”