Ti Umuna a Samuel 30:1-31
30 Idi nakadanon ni David ken dagiti tattaona idiay Ziklag+ iti maikatlo nga aldaw, nalpasen a rinaut dagiti Amalekita+ ti abagatan* ken ti Ziklag, ket pinuoranda ti Ziklag.
2 Impanawda dagiti babbai+ ken amin nga adda iti dayta, manipud ubbing agingga kadagiti nataengan. Awan ti pinatayda ngem inkuyogda ida a pimmanaw.
3 Idi makadanon ni David ken dagiti tattaona iti siudad, nasangpetanda a napuoranen dayta, ken naipanawen dagiti assawada ken annakda a lallaki ken babbai.
4 Isu a nagsangit ni David ken dagiti tattaona iti nakapigpigsa agingga nga awanen ti nabati a pigsada nga agsangit.
5 Naipanaw met ti dua nga assawa ni David a da Ahinoam a Jezreelita ken ni Abigail nga asawa daydi Nabal a Carmelita.+
6 Nariribukan unay ni David ta kayat nga uboren dagiti tattao. Nasakit ti nakem ti amin a tattao ta naawananda iti annak a lallaki ken babbai. Ngem ni David ket pinapigsa ni Jehova a Diosna.+
7 Kinuna ngarud ni David ken Abiatar+ a padi, ti anak ni Ahimelec: “Pangngaasim ta iyegmo ditoy ti efod.”+ Isu nga inted ni Abiatar ti efod ken David.
8 Dinamag ni David ken Jehova:+ “Kamatek kadi dagiti rimmaut? Makamakamko ngata ida?” Kinuna kenkuana ti Dios: “Wen, kamatem ida, ta sigurado a makamakammo ida, ket makaisalakanka.”+
9 Dagus a napan ni David ken ti 600 a tattaona,+ ket nakadanonda iti Karayan* Besor a nagbatian ti dadduma kadagiti tattaona.
10 Intultuloy ni David ti kimmamat a kaduana ti 400 a tattaona, ngem nagbati ti 200 ta nabannogda unayen ken saandan a kabaelan ti bumallasiw iti Karayan Besor.+
11 Nakasarakda iti maysa a lalaki nga Egipcio iti away ket impanda ken David. Inikkanda iti kanenna ken danum nga inumenna
12 ken sangaiwa a bibingka ti pinitpit a higos ken dua a bibingka a pasas. Idi nakapanganen, nagsubli ti pigsana,* ta saan a nangnangan wenno immin-inum iti tallo nga aldaw ken tallo a rabii.
13 Dinamag ni David kenkuana: “Makin-adipen kenka ken tagaanoka?” Insungbatna: “Maysaak nga Egipcio, adipennak ti maysa nga Amalekita, ngem pinanawannak ti amok ta nagsakitak, tallo nga aldaw ti napalabasen.
14 Dakami ti nangraut iti abagatan* dagiti Kereteo+ ken iti teritoria ti Juda ken iti abagatan* ti Caleb,+ ken pinuoranmi ti Ziklag.”
15 Kinuna kenkuana ni David: “Mabalin kadi nga isurom kaniak ti ayan dagiti rimmaut?” Insungbatna: “No isapatam kaniak iti nagan ti Dios a saannakto a patayen, ken no saannakto nga isubli iti amok, isurokto kenka ti ayan dagiti rimmaut.”
16 Insurona ngarud kenkuana ti ayan dagiti rimmaut a nagwawaras ken madama a mangmangan, umin-inum, ken agpiespiesta gapu iti amin a naalada iti daga dagiti Filisteo ken iti daga ti Juda.
17 Pinatay ida ni David manipud iti parbangon agingga iti rabii. Awan ti nakatalaw malaksid iti 400 a lallaki a naglibas+ a nagsakay kadagiti kamelio.
18 Napasubli ni David ti amin nga innala dagiti Amalekita+ ket naisalakanna ti dua nga assawana.
19 Napasublina ti amin, manipud ubbing agingga kadagiti nataengan, agraman dagiti annakda a lallaki ken babbai ken amin nga innala dagiti rimmaut;+ napasubli ni David ti amin nga innalada.
20 Isu nga innala ni David ti amin a karnero, kalding, ken baka dagiti Amalekita, a pakairamanan dagiti napasublida a tarakenda. Kinunada: “Dagitoy ti napasubli ni David.”
21 Kalpasanna, sinublian ni David ti 200 a tattaona a saan a kimmuyog kenkuana gapu ta nabannogda unayen ket nagbatida iti abay ti Karayan Besor.+ Sinabatda ni David ken dagiti tattaona. Idi nakaasidegen ni David, kinomustana ida.
22 Ngem kinuna ti amin a dakes ken awan serserbina a lallaki a kimmuyog ken David: “Gapu ta saanda a kimmuyog kadatayo, ditay ibingbingayan ida kadagiti naalatayo. Mabalindan nga iyawid dagiti assawa ken annakda.”
23 Ngem kinuna ni David: “Kakabsatko, diyo aramiden dayta kadagiti inted kadatayo ni Jehova. Sinalaknibannatayo ken inyawatna kadatayo dagiti rimmaut kadatayo.+
24 Asino kadakayo ti umanamong iti daytoy? Ti bingay daydiay nakigubat ket kapada iti bingay daydiay nagbantay iti gargaret.+ Agpapada ti bingay ti amin.”+
25 Manipud idin, daytan ti regulasion ken pagannurotan iti Israel agingga ita nga aldaw.
26 Idi nagsubli ni David idiay Ziklag, impatulodna kadagiti gagayyemna a panglakayen iti Juda ti dadduma iti naalana kadagiti kabusor. Imbagana: “Itedko daytoy a regalo* kadakayo manipud iti naalak kadagiti kabusor ni Jehova.”
27 Impaipanna dayta kadagiti adda idiay Bethel,+ Ramot iti Negeb,* Jatir,+
28 Aroer, Sifmot, Estemoa,+
29 Racal, siudad dagiti Jerameelita,+ siudad dagiti Keneo,+
30 idiay Horma,+ Borasan, Atak,
31 Hebron,+ ken iti amin a lugar a masansan a papanan idi ni David ken dagiti tattaona.
Footnotes
^ Wenno “Negeb.”
^ Karayan a maaddaan laeng iti danum no panagtutudo.
^ Lit., “nagsubli kenkuana ti espirituna.”
^ Wenno “Negeb.”
^ Wenno “Negeb.”
^ Lit., “bendision.”
^ Wenno “iti abagatan.”
