Ti Umuna a Samuel 24:1-22

  • Saan a patayen ni David ni Saul (1-22)

    • Raemen ni David ti dinutokan ni Jehova (6)

24  Idi makaawid ni Saul manipud iti panangkamatna kadagiti Filisteo, naipadamag kenkuana: “Adda ni David idiay let-ang ti En-gedi.”+  Isu a nangikuyog ni Saul iti 3,000 a napili a lallaki manipud iti intero nga Israel ket napanda binirok ni David ken dagiti tattaona kadagiti derraas nga ayan dagiti kalding ti bantay.  Nakadanon ni Saul iti pagyaponan kadagiti karnero iti igid ti dalan nga ayan ti maysa a kueba isu a simrek ni Saul tapno tumakki,* bayat nga agtugtugaw ni David ken dagiti tattaona iti nauneg a paset ti kueba.+  Kinuna dagiti tattao ni David: “Daytoyen ti aldaw nga ibagbaga kenka ni Jehova, ‘Kitaem! Iyawatko kenkan ti kabusormo,+ ket mabalinmon nga aramiden kenkuana ti aniaman a panagkunam a nasayaat.’” Isu a timmakder ni David ket nagin-inayad a napanna gineppas ti gayadan ti awan manggasna a bado ni Saul.  Ngem kalpasanna, makonkonsiensia ni David+ gapu ta pinutedna ti gayadan ti awan manggasna a bado ni Saul.  Kinunana kadagiti tattaona: “Iti imatang ni Jehova, diak maitured nga aramiden ti kasta iti apok, ti dinutokan ni Jehova. Diak maitured a patayen ta isu ket dinutokan ni Jehova.”+  Gapu kadagita nga imbagana, linapdan* ni David dagiti tattaona, ket dina impalubos a darupenda ni Saul. Timmakder ni Saul iti kueba sa pimmanawen.  Timmakder ni David ket rimmuar iti kueba ket pinukkawanna ni Saul: “Apo ari!”+ Idi timmaliaw ni Saul, nagrukob ni David ket nagruknoy.  Kinuna ni David ken Saul: “Apay a dengdenggem dagiti tattao a mangibagbaga iti, ‘Kayatnaka a dangran ni David’?+ 10  Nakitam a mismo ita nga aldaw no kasano nga inyawatnaka ni Jehova kaniak iti kueba. Ngem idi adda nangibaga a patayenka,+ naasianak kenka ket kinunak, ‘Saanko a patayen ti apok, ta isu ti dinutokan ni Jehova.’+ 11  Ket, kitaem amak, kitaem daytoy ig-iggamak a gayadan ti awan manggasna a badom; ta idi gineppasko ti gayadan ti awan manggasna a badom, saanka a pinatay. Ammom itan ken maamirismon nga awan panggepko a mangdangran wenno agrebelde kenka. Saanak met a nagbasol kenka,+ uray no birbirokennak tapno patayennak.+ 12  Ni Jehova koma ti mangukom kadata;+ ket ni Jehova koma ti mangibales kenka para kaniak,+ ngem saanto nga agdisso ti imak kenka.+ 13  Kas iti kuna ti nagkauna a proverbio, ‘Ti kinadakes ket aggapu kadagiti managdakdakes,’ ngem saanto nga agdisso kenka ti imak. 14  Asino ti sursuroten ti ari ti Israel? Asino ti kamkamatem? Ti maysa a natay nga aso? Ti maymaysa a timel?+ 15  Ni Jehova koma ti agserbi nga ukom, ket isu ti mangukom kadata. Makitananto ken idepensana ti kasok+ isu nga ukomennakto ken isalakannak iti imam.” 16  Idi nalpas a nagsao ni David, kinuna ni Saul: “Sika kadi dayta anakko a David?”+ Ket nagsangit ni Saul iti napigsa. 17  Kinunana ken David: “Nalinlintegka ngem siak, ta nasayaat ti impakitam kaniak ngem dakes ti insubadko kenka.+ 18  Wen, imbagam ita ti nasayaat nga inaramidmo a saannak a pinatay nupay insukonak ni Jehova iti imam.+ 19  Ta asino koma ti tao a no mabirokanna ti kabusorna, palubosanna lattan a dina dangdangran? Gunggonaannakanto ni Jehova iti nasayaat+ gapu iti inaramidmo kaniak ita nga aldaw. 20  Ammok a sigurado nga agturaykanto kas ari,+ ken agtalinaedto kenka ti pagarian ti Israel. 21  Isapatam ngarud kaniak iti nagan ni Jehova+ a saanmonto a patayen ti amin nga annakko* ken annakda ken saanmonto a pukawen ti naganko iti pamilia ni amak.”+ 22  Nagkari ngarud ni David ken Saul. Kalpasanna, nagawiden ni Saul.+ Ngem napan ni David ken dagiti tattaona iti paglemlemmenganda.+

Footnotes

Lit., “abbonganna dagiti sakana.”
Wenno mabalin a, “pinagsisina.”
Lit., “a bin-ik.”