Exodus 9:1-35
9 Cucaah Jehovah nih Moses cu hitin a ti: “Faraoh sinah va kal law Hebru mi hna Pathian Jehovah nih ‘Keimah biak awkah ka mi pawl cu kalter hna.
2 Asinain na kalter duh hna lo i na tlaih peng rih ko hna ahcun,
3 Jehovah kut cu na saṭil cung ah a phan lai. Rang, laa, kalauk, saṭilrun le tuurun hna cung ah ṭih a nungmi rai a tlung lai.
4 Jehovah nih Israel mi hna saṭil le Izipt mi hna saṭil kha a thleidan lai i Israel mi hna saṭil cu pakhat hmanh an thi lai lo’ tiah a ti.”
5 Jehovah nih a caan a khiah cang i “Thaizing ah Jehovah nih hi ram ah cu rai cu ka tlunter lai” tiah a ti.
6 A thaizing ah Jehovah nih cu rai cu a tlunter i Izipt mi hna saṭil vialte cu an thi dih. Asinain Israel mi hna saṭil tu cu pakhat hmanh an thi lo.
7 Faraoh nih a dothlat tikah Israel mi hna saṭil cu pakhat hmanh an thih lomi kha a hngalh. Asinain Faraoh cu a lung a khong ṭhiamṭhiam i mi cu a kalter duh hna lo.
8 Jehovah nih Moses le Aaron kha “Meiphu chung i vutcam cu nan kut khat lak in ṭhuam u law Faraoh hmai i thli lakah Moses nih vorh seh.
9 Vutcam cu Izipt ram pumpi ah leidip bantuk in a zuang lai i ram chung ah a ummi minung le saram cung ah khuaihli hma a tlunter lai” tiah a ti.
10 Cucaah annih nih meiphu chung in vutcam cu an lak i Faraoh hmaiah an dir. Cun Moses nih thli lakah a vorh i minung he, saram he khuaihli hma nih a tlunh hna.
11 Camhthiam pawl cu an khuaihli hma ruang ah Moses hmaiah khan an rak chuak kho lo. Zeicahtiah camhthiam hna le Izipt mi vialte cu khuaihli hma nih a tlunh hna.
12 Asinain Jehovah nih Faraoh cu a lungkhon ding in a awnh caah Jehovah nih Moses sinah a rak chim bantuk te khan an bia cu a ngai duh lo.
13 Cun Jehovah nih Moses cu hitin a ti: “Zingka tein tho law Faraoh sinah va kal law hitin va chim, ‘Hebru mi hna Pathian Jehovah nih “Ka mi pawl cu keimah biak awkah kalter hna.
14 Atu cu keimah bantuk Pathian dang an um lo ti kha na hngalh nakhnga nangmah le na bawile le na mi hna cung ah rai ka tlunter lai.
15 Atu ah nangmah le na mi hna cung ah ka kut samh in ṭih a nungmi rai kha tlunter ning law hi vawleicung hin nan lo dih ko hnga.
16 Asinain na nunnak kaan zuahnak a ruang cu ka ṭhawnnak langhter awk le vawleicung pumpi ah ka min thanter awkah a si.
17 Ka mi pawl kha kalter duh loin porhlawt ruamkai in maw na um rih?
18 Thaizing atu tik caan ah rial nganpipi ka tlakter lai. Cu bantuk rial cu Izipt ram dirh a sika in atu tiang ah a um bal lomi a si.
19 Cucaah nan saṭil vialte le lo ah a ummi, nan ta a simi vialte kha a himnak hmun ah khumhter hna u. Rial a tlak tikah innchung ah i khumh loin ramlak ah a ummi minung le saram vialte cu an thi dih lai” tiah a ti.’”
20 Jehovah a ṭihzahmi Faraoh bawile cheukhat nih an salle le an saṭil hna kha innchung ah an khumh colh hna.
21 Asinain Jehovah bia zei i a rel lomi nih cun an salle le an saṭil kha lo ah an kaltak ko hna.
22 Jehovah nih Moses cu “Vanlei ah na kut kha hler law Izipt ram chung ah a ummi minung, saram le thlaikung vialte cung ah rial a tla lai” tiah a ti.
23 Cucaah Moses nih a ṭhiangṭhunh kha vanlei ah a hler i Jehovah nih khuari le rial kha a thlah i mei kha vawlei ah a tlakter. Cun Jehovah nih rial kha Izipt ram ah a tlakter thluahmah.
24 Rial a tla i rial lakah nimtlau a lek. Cu tluk fak in rial a tlakmi cu Izipt ram tuanbia ah a um bal lo.
25 Izipt ram chung dihlak ah a ummi minung le saṭil cu rial nih a den hna. Cun lo ah a ummi thlaikung le thingkung vialte zong a den dih hna.
26 Israel mi an umnak Goshen ram lawnglawng ah rial cu a tla lo.
27 Cucaah Faraoh nih Moses le Aaron kha a auhter hna i hitin a ti hna: “Atu tan cu keimah ka sual. Jehovah cu a ding i keimah le ka mi pawl cu kan palh.
28 Hi khuari le rial hi an dongh nakhnga Jehovah sinah ka nawlpiak u. Cuticun kaan thlah hna lai i hika ah nan um a hau ti lai lo.”
29 Moses nih “Khua leng ka chuahle cangka Jehovah hmaiah ka kut ka hler lai. Mah tikah khuari cu a dai lai i rial cu a tla ti lai lo. Cuticun vawlei cu Jehovah ta a si ti kha na hngalh lai.
30 Asinain nangmah le na bawile nih Jehovah Pathian cu nan ṭih hlei lai lo ti kha ka hngalh” tiah a ti.
31 Rial nih cun khum kung le barli kung zong a den dih hna. Barli kung cu an hmin cang i khum kung cu an par lio a si.
32 Asinain changvut le fang tu cu an rawk lo. Zeicahtiah annih cu tlai deuh ah a vuimi an si.
33 Moses cu Faraoh sinin khua leng ah a chuak i Jehovah hmaiah a kut a hler. Mah tikah khuari cu a dai, rial cu a tla ti lo i ruah zong a sur ti lo.
34 Ruah le rial le khuari cu an dai cang ti kha Faraoh nih a hmuh tikah a sual ṭhan i amah he, a bawile he an lung a khong ṭhan.
35 Faraoh cu a lung a khong ṭhiamṭhiam rih ko. Moses sinah Jehovah nih a chim bantuk te khan Israel mi cu a kalter duh hna lo.
