Exodus 24:1-18
24 Jehovah nih Moses cu “Nangmah le Aaron, Nadab le Abihu le Israel mi upa 70 cu tlang cung ah rak kai u law lamhla nawn in nan kun lai i nan ka biak lai.
2 Nangmah lawng Jehovah pawng ah na ra lai; midang tu cu ra hna hlah seh, mizapi cu tlang cung ah rak kai hna hlah seh” tiah a ti.
3 Mah hnuah Moses cu a va kal i Jehovah chimmi bia vialte le nawlbia vialte kha a chimh hna, mah tikah mizapi nih awkhat tein “Jehovah chimmi bia vialte cu kan tuah dih lai” tiah an ti.
4 Cun Moses nih Jehovah chimmi bia vialte kha a ṭial dih. Zingka tein a tho i tlanghram ah cun biakṭheng a ser i Israel mi, phun 12 a aiawhmi lungphun 12 kha a bunh.
5 Mah hnuah Israel tlangval pawl kha a thim hna, annih nih khangh thawinak an pek i cawtum kha hawikomhnak thawinak caah Jehovah sinah an pek.
6 Moses nih a thi hnarcheu kha a lak i khengkuar chung ah a chiah, a taangmi a thi hnarcheu kha biakṭheng cung ah a theh.
7 Cun biakamnak cauk* kha aa lak i mizapi cu thangpi in a relpiak hna. Annih nih “Jehovah chimmi bia vialte cu kan tuah dih lai i a nawl cu kan zulh lai” tiah an ti.
8 Moses nih thi kha a lak i mipi cu a theh hna, cun “Hihi biakamnak thisen a si. Hi biakamnak cauk ah aa ṭialmi vialte ning in Jehovah nih nanmah he biakamnak a ser” tiah a ti.
9 Moses le Aaron, Nadab le Abihu le Israel mi upa 70 cu tlang cung ah an kai i,
10 Israel mi Pathian kha an hmuh. A ke tang ah cun safaiar lungvar bantuk in phahmi ṭuang a um i mah cu van bantuk in a thiang.
11 Israel mi hruaitu hna nih an ei, an din lioah a hmaanmi Pathian cu langhnak in an hmuh nain Pathian nih zei harnak hmanh a pe hna lo.
12 Jehovah nih Moses cu “Tlang cung ah ka sinah rak kai law hika ah hin um. Mi pawl cawnpiaknak caah nawlbia le phunglam hna kha lungtlap ah ka ṭial lai i kaan pek lai” tiah a ti.
13 Moses cu amah a bawmtu Joshua he an tho i Moses cu a hmaanmi Pathian tlang ah a hung kai.
14 Moses nih upa pawl cu “Kan rak kir ṭhan hlan tiang hika ah hin rak kan hngak ko u. Aaron le Hur nih an in umpi ko hna lai. Bia a ngeimi paoh cu an sinah va kal u” tiah a ti hna.
15 Tlang cu minmei nih a khuh dih i mah lioah Moses cu tlang ah a va kai.
16 Jehovah sunparnak cu Sinai Tlang cung ah a um i tlang cu ni ruk chung minmei nih a khuh dih. A ni sarihnak ni ah Pathian nih Moses cu minmei lak in a auh.
17 Israel mi nih cun Jehovah sunparnak kha tlangpar ah a alhmi mei bantuk in an hmuh.
18 Moses cu minmei chung ah a lut i tlang cung ah a va kai. Moses cu tlang cung ah ni 40 le zan 40 a um.
Footnotes
^ Dal 20:22–23:33 ah aa telmi nawlbia le phunglam hna aa tel.
