Exodus 31:1-18
31 Jehovah nih Moses cu hitin a ti:
2 “Judah phun chung in Hur fapa, Uri fapa Bezalel kha ka thim cang.
3 Amah cu fimnak, hngalhthiamnak le zungthiamnak he aa tlaimi hngalhnak vialte kha ka pek lai i Pathian thiang thlarau in ka khahter lai.
4 Thilri pungsan dawh tein ser khawhnak, sui le ngun le dar in thilri ser thiamnak,
5 lungvar tannak le ṭamhnak, thing in thil a phunphun ser thiamnak kha ka pek lai.
6 Amah bawmtu ding ah Dan phun chung in Ahisamak fapa Oholiab kha rian ka pek cang. Zungthiammi vialte kha fimnak ka pek hna lai i kaan chimhmi vialte kha an tuah khawh lai.
7 Tonnak thlam, Tehte Khaannak kuang le kuang a chin, thlam chung thilri vialte,
8 cabuai le a thilri vialte, sui thiang in sermi mei vannak tung le a thilri vialte, rimhmui khanghnak biakṭheng,
9 khangh thawinak biakṭheng le a thilri vialte, hmaihum le a tohnak,
10 dawh tein tahmi thilthuam, tlangbawi Aaron caah a thiangmi thilthuam le tlangbawi rian a ṭuan dingmi a fapale caah thilthuam,
11 thuhmi chiti le hmunthiang caah rimhmui kha an ser lai. Annih nih kaan chimhmi vialte ning in an tuah lai.”
12 Jehovah nih Moses cu hitin a ti:
13 “Israel mi kha chim hna, ‘A hleiin sabbath ni kha nan ulh hrimhrim lai. Zeicahtiah mah cu nan tefa hna chan tiang in keimah le nanmah karah hmelchunhnak a si lai i Keimah Jehovah nih nannih cu ka miphun in ka thimmi nan si kha nan hngalh lai.
14 Sabbath ni kha nan ulh lai, zeicahtiah mah cu nan caah a thiangmi a si. Sabbath nawlbia a buarmi cu thihdan pek a si lai. Sabbath ni ah rian a ṭuanmi paoh cu a miphun chung in hloh an si lai.*
15 Ni ruk chung rian nan ṭuan lai, asinain ni sarihnak ni cu sabbath ni, dinhnak ni a si. Mah ni cu Jehovah caah a thiangmi a si. Sabbath ni ah rian a ṭuanmi paoh cu thihdan pek a si lai.
16 Israel mi nih Sabbath ni kha an ulh zungzal lai; an tefa hna chan tiang in Sabbath ni cu an ulh zungzal lai. Mah cu a hmunmi biakamnak a si.
17 Sabbath ni cu Israel mi le keimah karah a hmun zungzalmi hmelchunhnak a si. Zeicahtiah Jehovah nih ni ruk chung van le vawlei kha a ser i ni sarihnak ni ah a rian kha a ngol i aa din.’”
18 Pathian nih Sinai Tlang ah Moses sin bia a chim dihle cangka a kutdong in a ṭialmi Tehte Khaannak lungtlap pahnih kha Moses cu a pek.
Footnotes
^ Asiloah “thihdan pek an si lai.”
