Exodus 29:1-46
29 “Aaron le a fapale cu ka caah tlangbawi rian an ṭuan khawh nakhnga thianter ding in hitin na tuah lai: Cawtum no pakhat le do a tlami tuukawng pahnih kha na lak lai i,
2 thilnu phulh lo changreu, chiti he sermi thilnu phulh lo changhlum le chiti thuhmi thilnu phulh lo changper zong kha la hna. Cun cu chang hna cu changvut dip in na ser hna lai.
3 Cu chang hna cu bawm chung ah na khumh hna lai i cawtum pakhat le tuukawng pahnih he ka sinah na rak put lai.
4 “Aaron le a fapale cu tonnak thlam luhnak ah khan na ratpi hna lai i na kholhter hna lai.
5 Cun Aaron kha angki fual, ban ngei lo angki, tlangbawi angki le ṭangbenh hna kha na hrukter lai i taisawm kha fek tein na sawmh lai.
6 A lu cung ah lupawng na ponh lai i cu lupawng cung ah cun a thiangmi hmelchunhnak* kha na ṭem chih lai.
7 Cun thuh awk chiti kha na lak lai i tlangbawi rian pek awkah a lu ah na toih lai.
8 “Aaron fapale zong na ratpi hna lai i angki fual kha na hruk hna lai.
9 Aaron le a fapale kha taisawm na sawmh hna lai i luchin na chinh hna lai. Zungzal a hmunmi ka nawlbia ning in tlangbawi sinak cu anmah ta a si lai. Cuticun Aaron le a fapale kha tlangbawi rian na pek hna lai.
10 “Cun tonnak thlam hmaiah cawtum cu na ratpi lai i Aaron le a fapale nih cu cawtum lu cung ah cun an kut kha an chuan lai.
11 Tonnak thlam luhnak Jehovah hmaiah cawtum cu na thah lai.
12 Cawtum thi tlawmpal kha na kutdong in na tawh lai i biakṭheng ki ah na neh lai. Cun a taangmi a thi kha biakṭheng kehram ah na thlet lai.
13 A chungril a tuamtu a thau, a thin cung ah a ummi a thau, a kal pahnih le a kal pahnih cung ah a ummi a thau vialte kha na lak lai i biakṭheng cung ah na khangh lai.*
14 Asinain cawtum a sa le a phaw le a ek cu riahhmun a lenglei ah na khangh lai. Mah cu sual thawinak a si.
15 “Cun tuukawng pakhat kha na lak lai i cu tuukawng lu cung ah Aaron le a fapale nih an kut an chuan lai.
16 Tuukawng kha na thah lai. A thi kha na lak lai i biakṭheng velchum ah na theh lai.
17 Tuukawng cu na can dih lai i a chungril le a ke kha na ṭawl hna lai i amahle ningcang tein a lu he na chiah hna lai.
18 Tuukawng cu a ningpi in biakṭheng cung ah na khangh lai. Mah cu Jehovah sinah pekmi rimhmui* khangh thawinak a si. Mah cu Jehovah sinah mei in khanghmi thawinak a si.
19 “Cun a dang tuukawng pakhat kha na lak ṭhan lai i cu tuukawng lu cung ah cun Aaron le a fapale nih an kut an chuan lai.
20 Tuukawng kha na thah lai. A thi kha tlawmpal in na lak lai i Aaron le a fapale orhlei hnakhaw, orhlei kutpi, orhlei kepi ah na neh hna lai. Cun a thi kha biakṭheng velchum ah na theh lai.
21 Biakṭheng cung i thisen tlawmpal le thuhmi chiti tlawmpal kha la law Aaron le a fapale an thilpuan cung ah na theh lai. Cuticun Aaron le a fapale an thilpuan cu a thiang lai.
22 “Cun tuukawng thau, a thaumi a mei, a chungril a tuamtu a thau, a thin cung ah a ummi a thau, a kal pahnih le a kal pahnih cung ah a ummi a thau le a orhlei phei kha na lak lai. Zeicahtiah cu tuukawng cu tlangbawi rian pek lioah raithawimi tuukawng kha a si.
23 Jehovah hmaiah a ummi thilnu phulh lo changreu bawm chung in changpum pakhat, chiti he nawnmi changhlum pakhat le changper tlap khat kha na lak lai.
24 Cu hna cu Aaron le a fapale kut cung ah na chiah lai i Jehovah hmaiah hninh thawinak caah na hninh hna lai.
25 Cun an kut chung in na lak ṭhan lai. Biakṭheng cung i khangh thawinak cung ah na khangh lai. Mah cu Jehovah sin pekmi rimhmui a si. Mah cu Jehovah sinah mei in khanghmi thawinak a si.
26 “Aaron cu tlangbawi in rian pek a si lioah raithawimi tuukawng i a ii sa kha na lak lai i Jehovah hmaiah hninh thawinak caah na hninh lai. Cucu na covo a si lai.
27 Hninh thawinak caah hmanmi a ii sa le a thiangmi covo a simi a phei kha na pekchanh lai. Cu hna cu Aaron le a fapale tlangbawi rian pek an si lioah hninhmi tuukawng sa an si.
28 Mah cu a thiangmi covo a si i Aaron le a fapale ta a si lai. Mah cu Israel mi nih an zulh zungzal dingmi phunglam a si. Mah cu Jehovah caah Israel mi nih an pekmi hawikomhnak thawinak chung in a thiangmi covo a si lai.
29 “Aaron rian a changtu ding a fapale cu tlangbawi rian ṭuan awkah chiti thuh in rian pek an si tikah Aaron thilthuam thiang kha an i hruk lai.
30 Tlangbawi rian a changtu ding a fapa cu hmunthiang chung i rian ṭuan awkah tonnak thlam chung a luh tikah cu thilthuam cu ni sarih chung aa hruk lai.
31 “Tlangbawi rian pek lioah pekchanhmi tuukawng sa kha hmunthiang ah na chuan lai.
32 Aaron le a fapale nih tuukawng sa le bawm chung i changreu kha tonnak thlam innka ah an ei lai.
33 Tlangbawi in rian pek an si i thianter an si lioah sual ngaihthiamnak caah pekmi kha an ei lai. Asinain mah cu a thiangmi a si caah tlangbawi a si lomi* nih cun an ei lai lo.
34 Pekchanhmi sa le changreu cu zinglei tiang a taan ahcun mei in na khangh lai. Mah cu a thiangmi a si caah nan ei lai lo.
35 “Aaron le a fapale cung ah nawl kaan pekmi vialte ning in na tuah lai. Tlangbawi rian na pek hna tikah ni sarih chung a caan na hman lai.
36 Sual ngaihthiamnak caah sual thawinak cawtum kha nifate na thawi lengmang lai. Cuticun biakṭheng cu sualnak in na thianter lai. Cun biakṭheng thianternak caah chiti na toih lai.
37 Biakṭheng ca sual ngaihthiamnak caah ni sarih chung a caan na hman lai. Biakṭheng cu a thiang bikmi a si khawh nakhnga na thianter lai i biakṭheng a tawngtu paoh cu an thiang lai.
38 “Biakṭheng cung ah kum khat a simi tuukawng pahnih kha nifate na thawi lengmang lai.
39 Tuukawng pakhat cu zinglei ah na thawi lai i tuukawng pakhat cu nitlak ah na thawi lai.
40 Tuukawng pakhat he oliv chiti thiang hin khat* i cheuli cheukhat le changvut dip ephah pakhat* i cheuhra cheukhat kha na thawi chih lai. Cun mitsur zu hin khat i cheuli cheukhat zong thlet thawinak caah na thawi chih lai.
41 Tuukawng pahnihnak cu nitlak ah na thawi lai. Zinglei bantuk in changvut thawinak le thlet thawinak he na thawi lai. Mah cu Jehovah duhmi rimhmui mei in khanghmi thawinak a si.
42 Hihi nan tefa chan vialte nih Jehovah hmai tonnak thlam luhnak ah khangh thawinak an pek lengmang dingmi cu a si. Cuka ah kaan ton lai i na sinah bia ka chim lai.
43 “Cuka hmun ah Israel mi cu ka ton hna lai. Ka sunparnak ruang ah cuka hmun cu a thiangmi a si lai.
44 Tonnak thlam le biakṭheng cu ka thianter lai i Aaron le a fapale cu ka caah tlangbawi rian an ṭuan khawh nakhnga ka thianter hna lai.
45 Israel mi lakah khua ka sa lai i keimah cu an Pathian ka si lai.
46 Keimah cu an lakah khua ka sak nakhnga Izipt ram in a chuahpitu an Pathian Jehovah ka si kha an hngalh hrimhrim lai. Keimah cu an Pathian Jehovah ka si.
Footnotes
^ Asiloah “[Aaron nih] Pathian sin aa pekchanhnak a langhtermi a thiangmi hmelchunhnak; a thiangmi bawiluchin.”
^ A hrampi, “meikhu na kaiter lai.”
^ A hrampi, “lungthin a damtermi rim.”
^ A hrampi, “mising,” Aaron chungkhar a si lomi.
^ Hin pakhat cu 3.67 L he aa tluk. Thlaihhlei B14 ah zoh.
^ Ephah pakhat cu 22 L he aa tluk. Thlaihhlei B14 ah zoh.
