Exodus 32:1-35
32 Moses cu tlang cung in a rung ṭum ti lonak a sau tikah mi pawl cu Aaron sinah an kal i “Izipt ram in a kan chuahpitu Moses cu zei a can kan hngal ti lo. Cucaah a kan hruaitu ding ah pathian kan serpiak” tiah an ti.
2 Mah tikah Aaron nih “Nan nupile le nan fapale le nan fanule nih an i tonhmi sui tumbul kha va phoih u law rak pu u” tiah a ti hna.
3 Cucaah mizapi nih cun an sui tumbul kha an phoih i Aaron sinah an rak put.
4 Aaron nih sui cu a lak i a tit, cun sui cawfa pakhat ah a ser. Annih nih “Maw Israel mi hna, mah hihi Izipt ram in aan chuahpitu hna Pathian cu a si” tiah an ti.
5 Mah kha Aaron nih a hmuh tikah sui cawfa hmaiah cun biakṭheng pakhat a ser i “Thaizing ah Jehovah caah puai a um lai” tiah a thanh.
6 Thaizing zingka te ah mizapi nih khangh thawinak le hawikomhnak thawinak an pek. Mah hnuah an ei, an ding i an i nuam.
7 Jehovah nih Moses cu “Khulrang in vung ṭum tuah. Zeicahtiah Izipt ram in na chuahpimi na mi pawl cu an pial cang.
8 Nan zulh lai ka timi lam in khulrang in an pial cang. An caah cawfa lem pakhat an i ser i a hmaiah cun an kun i rai an thawi. Cun ‘Maw Israel mi hna, mah hihi Izipt ram in aan chuahpitu hna Pathian cu a si’ an ti” tiah a ti.
9 Jehovah nih Moses cu “Hi mi hna hi a lung a khong ngaingaimi* an si ti kha ka hngalh.
10 Ka thinhunnak cu a alh in a alh. Cucaah rak ka thlauh hlah. Annih cu ka hrawh hna lai i nangmah tu kha miphun ngan ah kaan ser lai” tiah a ti.
11 Mah tikah Moses nih Jehovah Pathian cu a nawl i “Maw Jehovah, a liangnganmi na ṭhawnnak le a ṭhawngmi na ban in Izipt ram in na chuahpimi na mi hna cung ah zeicah na thin a hun?
12 Izipt mi nih ‘An Pathian nih a ṭhalomi tinhnak he pei a chuahpi ko hna hi. Tlang cung ah thah dih awkah le hi vawlei in hloh dih awkah pei a chuahpi ko hna hi’ tiah an ti lai. Cucaah na thinhunnak cu daihter law na mi hna cung ah harnak tlunter awkah na biakhiahnak cu let ṭhan ko.
13 Na sal Abraham, Isak le Israel sinah ‘Na tefa cu van arfi zat in ka karhter hna lai i ka thimmi hi ram vialte hi na tefa cu ka pek hna lai. Cuticun hi ram cu a zungzal in anmah ta a si lai’ tiah na min chalh in chiatserh in bia naa kammi kha philh sawh hlah” tiah a ti.
14 Cucaah Jehovah nih a miphun cung ah harnak ka tlunter lai tiah a timi kha a let ṭhan.
15 Mah hnuah Moses cu aa mer i a kut ah Tehte Khaannak lungtlap pahnih kha aa put i tlang cung cun a ṭum. Lungtlap cu a hnulei he, a hmailei he a kap hnih in ca aa ṭial.
16 Cu lungtlap cu Pathian kutzung a si i ca cu Pathian ṭialmi a si.
17 Joshua nih mi an au thawng kha a theih tikah Moses cu “Riahhmun ah raldoh thawng ka theih” tiah a ti.
18 Asinain Moses nih:
“Mah cu teinak hla sak thawng zong a si lo,Sunghnak ruang ah fakpi in ṭah thawng zong a si lo;A dang hla sak thawng a si” tiah a ti.
19 Moses cu riahhmun pawng a phanh tikah cawfa lem le an laammi kha a hmuhle cangka a thinhunnak cu a alh in a alh. Cucaah aa putmi lungtlap cu a hlonh i tlanghram ah cun a khuai dih.
20 An sermi cawfa lem kha a lak, mei in a khangh i dip tein a rial. A dip kha ti cung ah a phulh i Israel mi cu a dinter hna.
21 Cun Aaron kha “Hi mi hna nih na cung ah zeidah an tuah i hi tluk in a nganmi sualnak hi na tuahter hna?” tiah a ti.
22 Aaron nih cun “Na thinhung sawh hlah ka bawipa, hi mi hna nih ṭhatlonak tuah kha zeitluk in dah an duh ti cu na hngalh ko cu ta.
23 Annih nih ‘A kan hruaitu ding pathian pakhat in kan serpiak tuah. Zeicahtiah Izipt ram in a kan chuahpitu Moses cu zei a can kan hngal ti lo’ tiah an ka ti.
24 Cucaah kei nih ‘Nan sui pawl kha i phoih u law ka sinah rak pu u’ tiah ka ti hna i cu an sui cu mei chung ah ka hlonh i hi cawfa lem hi a hung chuak ko” tiah a leh.
25 Aaron nih mi cu a thlahdorh hna caah an duhduh in khua an sa i an ral pawl hmaiah ningzak an si ti kha Moses nih a hmuh tikah,
26 Moses cu riahhmun kutka ah a dir i “Jehovah lei ah a ṭangmi paoh ka sinah ra u!” tiah a ti i Levi mi vialte cu a sinah an kal.
27 Moses nih cun “Israel Pathian Jehovah nih ‘Nan vainam kha i lak u. Kutka pakhat hnu pakhat in riahhmun chung ah i chawk u law nan unau, nan innpa le nan hawile kha that hna u’ a ti” tiah a ti hna.
28 Moses nih a chim bang khan Levi mi nih an tuah i cu ni ah cun mi 3,000 hrawng an thah hna.
29 Moses nih cun “Nihin ah Jehovah rian ṭuan awkah i pe u. Nan fale le nan unaule hmanh kha nan doh hna. Cucaah Pathian nih nihin ah thluachuah aan pek hna lai” tiah a ti.
30 A thaizing ah Moses nih “Mizapi cu sualnak nganpi nan tuah cang. Cucaah tlang cung ah ka va kai lai i nan sualnak aan ngaihthiam hna nakhnga Jehovah cu ka va nawl lai” tiah a ti.
31 Cucaah Moses cu Jehovah sinah a va kal ṭhan i “Hi mi hna nih hin sualnak nganpi an tuah cang! Sui pathian kha an i ser!
32 Asinain na duh ahcun zaangfahnak in an sualnak hi ngaithiam ko hna. Cutin a si lo ahcun na cauk chung in ka min kha hlo ko” tiah a nawl.
33 Asinain Jehovah nih Moses cu “Keimah a ka ralchanhtu paoh cu ka cauk in an min ka hloh hna lai.
34 Atu va kal law kaan chimhmi hmun ah mi cu kalpi hna. Ka vancungmi cu nan hmai in a kal lai i biaceihnak ni ah hi mi hna hi an sualnak ruang ah dan ka tat hna lai” tiah a ti.
35 Aaron kha cawfa lem ser ding in an fial caah Jehovah nih mipi cu dan a tat hna.
Footnotes
^ A hrampi, “a hngawng a fekmi.”
