Exodus 3:1-22
3 Moses cu Midian tlangbawi, a nupi pa Jethro i tuukhal a hung si. Tuurun kha ramlak nitlaklei ah a khal i Horeb Tlang tiah auhmi a hmaanmi Pathian tlang kha a phan.
2 Mah tikah Jehovah vancungmi cu burbuk chung in mei alh bantuk in a sinah a rak lang. A zoh tikah burbuk cu a alh nain a kang lo.
3 Cucaah Moses nih “Mah khuaruahhar thil cu ka va kal lai i ka va zoh tuah lai. Zeicah burbuk cu a kangh hnga lo?” tiah a ti.
4 Zoh ding in a ratmi kha Jehovah nih a hmuh tikah burbuk chung in Pathian nih cun “Moses! Moses!” tiah a auh. Anih nih “Hika ah ka um ko” tiah a leh.
5 Pathian nih cun “Rak naih ti hlah. Na phanah kha i phoih, zeicahtiah atu na dirnak hmun cu hmunthiang a si” tiah a ti.
6 Cun Pathian nih “Kei cu na pa Pathian, Abraham Pathian, Isak Pathian, Jakob Pathian ka si” tiah a ti chap. Moses nih a hmaanmi Pathian cu a zoh ngam lo caah a hmai aa huh.
7 Jehovah nih hitin a ti: “Izipt ram ah a ummi ka mi hna nih harnak an inmi kha fiang tein ka hmuh cang. Rian an hnek hna caah an aihramnak kha ka theih cang; fahnak an inmi kha ṭha tein ka hngalh.
8 Izipt mi hna kut chung in khamh awk le hi ram in hin chuahpi awkah ka vung ṭum lai. Cun Kanaan mi, Hit mi, Amor mi, Periz mi, Hiv mi le Jebus mi an umnak ram a ṭha i a kaumi, cawhnuk le khuaihliti a luangmi ram ah ka kalpi hna lai.
9 Atu ah Israel mi an aihram thawng cu ka sinah a phan cang. Cun Izipt mi nih zaangfahnak ngei loin an hremmi hna zong ka hmuh cang.
10 Cucaah atu Faraoh sinah kaan thlah lai i ka mi Israel mi kha Izipt ram in na chuahpi hna lai.”
11 Asinain Moses nih “Faraoh sinah va kal in Israel mi Izipt ram in chuahpi awkah keimah cu ahodah ka si?” tiah a hmaanmi Pathian kha a ti.
12 Pathian nih cun “Keimah nih kaan umpi hrimhrim lai, hi mi hna hi Izipt ram in na chuahpi hna lai i hi tlang ah hin a hmaanmi Pathian keimah cu nan ka biak lai. Mah hihi ka biakamnak a si i nangmah aan thlahtu cu keimah ka si ti kha cuticun na hngalh lai” tiah a ti.
13 Asinain Moses nih “Israel mi sinah ka va kal i ‘Nan pupa hna Pathian nih a ka thlah’ tiah ka ti tikah ‘A min ahodah a si?’ tiah an ka hal ahcun zeitindah ka leh hna lai?” tiah a ti.
14 Cucaah Pathian nih Moses cu “Siter Ka Duhmi Ning In Ka Hung Si Lai. Israel mi kha ‘Ka Hung Si Lai tiah min a ngeitu nih a ka thlah’ na ti hna lai” tiah a ti.
15 Cun Pathian nih hitin a ti chap:
“‘Nan pupa hna Pathian, Abraham Pathian, Isak Pathian, Jakob Pathian Jehovah nih nan sinah a ka thlah’ tiah Israel mi kha na ti hna lai. Hihi a zungzal in ka min a si i chan khat hnu chan khat hi min in hin an ka hngalh lai.
16 Atu va kal law Israel upa pawl kha va pum hna, cun ‘Nan pupa hna Pathian, Abraham Pathian, Isak Pathian, Jakob Pathian Jehovah cu ka sinah a lang i “Kaan veh hna i Izipt mi nih nan cung ah an tuahmi kha fiang tein ka hmuh cang.
17 Harnak nan innak Izipt mi hna kut in kaan khamh hna lai i Kanaan mi, Hit mi, Amor mi, Periz mi, Hiv mi le Jebus mi an umnak ram, cawhnuk le khuaihliti a luannak ram ah kaan kalpi hna lai” tiah bia kaa kam.’
18 “Na bia kha an ngaih hrimhrim lai. Nangmah he, Israel upa hna he Izipt siangpahrang sinah va kal u law ‘Hebru mi hna Pathian Jehovah cu kan sinah a lang. Cucaah nithum lamkal aa hlatnak ramlak ah Jehovah Pathian sin raithawi awkah rak kan kalter ko’ tiah va ti u.
19 Asinain a ṭhawngmi ka kut in ka hnek lo ahcun Izipt siangpahrang nih kalnak nawl aan pe hna lai lo ti kha ṭha tein ka hngalh ko.
20 Cucaah ka kut kha ka samh lai i Izipt ram cu ka tuah laimi khuaruahhar thil hna in dan ka tat lai. Mah hnu lawng ah aan thlah te hna lai.
21 Izipt mi hna hmaiah ka miphun cu mithmai ṭha kaan hmuhter hna lai. Cun nan chuah tikah kut ro in nan chuak lai lo.
22 Nu paohpaoh nih an innpa le an inn ah a ummi ramdang minu hna sinin sui le ngun le hnipuan an hal hna lai i nan fapale le nan fanule kha nan hruk hna lai. Cun Izipt mi hna sinin an thilri kha nan lak lai.”
