Exodus 26:1-37
26 “Puan biakinn cu puanthan pahra in nan ser lai. Mah puanthan pahra cu la hmangṭhia thlurmi, la dum, maimaw tuuhmul le la sen hna in nan tah lai. Puanthan cung ah khan cherubim muisam nan suai chih lai.
2 Puanthan pakhat cio ah a sau cu dong* 28 a si lai i a kauh cu dong 4 a si lai. Puanthan a dihlak in an i ngaw dih lai.
3 Puanthan panga kha nan peh lai i zun khat ah nan ṭhit lai, a dang panga zong nan peh lai i zun khat ah nan ṭhit lai.
4 Aa pehmi puanthan zun khatnak i a tlang donghnak ah la dum in a kual nan sih lai. Cun aa pehmi a dang puanthan zun khat i a tlang donghnak zong ah nan sih ve lai. Cuticun puanthan zun hnih cu an i peh lai.
5 Puanthan zun khat i a donghnak ah a kual 50 in nan sih lai, cu puan he aa tlai dingmi puan i a donghnak zong ah a kual 50 in nan sih ve lai. Cuticun puanthan an i pehnak zawn ah a kual cu hmaitonh in an um lai.
6 Sui in a hrenh 50 nan ser lai i cu a hrenh in cun puanthan kha nan komh lai. Cuticun puan thlam pakhat ah aa cang lai.
7 “Puan biakinn a khuh caah meheh hmul in puanthan 11 nan tah lai.
8 Puanthan pakhat cio ah a sau cu dong 30 a si lai i a kauh cu dong 4 a si lai. Puanthan 11 ning in an i ngaw dih lai.
9 Puanthan panga kha hmunkhat ah nan ṭhit lai i a dang puanthan paruk zong hmunkhat ah nan ṭhit lai. Cun a paruknak puanthan kha puan biakinn a hmailei ah nan bil lai.
10 Aa pehmi puanthan zun khat i a donghnak ah a kual 50 in nan sih lai. Cun a dang puanthan zun khat i a donghnak zong ah a kual 50 in nan sih ve lai, cuticun puanthan zun hnih cu an i peh lai.
11 Dar in a hrenh 50 nan ser lai i cu a hrenh in cun a kual kha nan hrenh lai. Cuticun puanthan cu pakhat ah aa cang lai.
12 Puanthan a hleimi cu puan biakinn i a hnulei ah aa thlai lai.
13 Khatlei ah a hleimi dong khat le a dang khattalei i a hleimi dong khat kha puan biakinn khuhnak ah aa thlai lai.
14 “Cun sii sen buhmi tuukawng phaw kha thlam khuhnak caah nan ser lai i mah cung ah cun rili saihrem phaw kha nan khuh ṭhan lai.
15 “Puan biakinn vanpang caah a tungtlang kha anri thing in nan ser lai.
16 A tungtlang pakhat cio ah a san dong hra, a kauh dong khat le a cheu a si lai.
17 A tungtlang pakhat ah a ke pahnih in a um lai i puan biakinn caah a tungtlang dihlak cu cuticun nan ser lai.
18 Puan biakinn thlanglei vanpang caah a tungtlang 20 in nan ser lai.
19 “A tungtlang 20 tangdanh caah ngun kedanh 40 in nan ser lai. A tungtlang pakhat ah a ke pahnih le kedanh pahnih in an um lai. Cuticun a tungtlang kip ah a ke pahnih le kedanh pahnih cio an um lai.
20 Puan biakinn chaklei vanpang caah a tungtlang 20,
21 a tungtlang pakhat cio i tangdanh caah kedanh pahnih cio in ngun kedanh 40 nan ser lai.
22 Puan biakinn a hnulei vanpang caah a tungtlang paruk in nan ser lai.
23 Puan biakinn hnulei i a kil tung pahnih caah a tungtlang pahnih in nan ser lai.
24 Mah a tungtlang cu a tanglei in a cunglei tiang thingphel pahnih in a kal lai i a cunglei a pakhatnak kual ah an i tong lai. Cuticun a tungtlang pahnih in nan ser lai i a kil tung caah an si lai.
25 A hnulei vanpang caah a tungtlang pariat le tangdanh caah ngun kedanh 16 in nan ser lai. A tungtlang pakhat ah kedanh pahnih a um lai i a tungtlang pakhat cio caah kedanh pahnih cio in nan ser hna lai.
26 “Puan biakinn i a tungtlang pawl tlaihternak caah anri thing in a thingthluan kha nan ser lai. Puan biakinn thlanglei a tungtlang caah panga,
27 chaklei a tungtlang caah panga, a hnulei a tungtlang caah panga in nan ser lai.
28 A laifang thingthluan cu a tungtlang laifang ah a um lai i khatlei deng in khatlei deng tiang aa khaang lai.
29 “A tungtlang kha sui in nan hut lai i a thingthluan hrolhnak a kual zong sui in nan ser lai. Cun a thingthluan kha sui in nan hut lai.
30 Tlang cung ah kaan hmuhsakmi muisam ning tein puan biakinn cu nan sak lai.
31 “La dum, maimaw tuuhmul, la sen le la hmangṭhia thlurmi in puanzar cu nan tah lai. Cu puanzar cung ah cun cherubim muisam kha nan suai lai.
32 Cu puanzar cu sui hutmi anri tung pali cung ah nan thlai lai. A hrenh kha sui in nan ser lai. Cu tung cu ngun kedanh pali cung ah nan bunh lai.
33 Cu puanzar cu a hrenh ah nan thlai lai i nan zar hna lai. Tehte Khaannak kuang cu puanzar a chunglei ah a um lai. Cu puanzar nih cun A Thiangmi Khaan le A Thiang Bikmi Khaan kha a dan hna lai.
34 A Thiang Bikmi Khaan chung ah a ummi Tehte Khaannak kuang kha a chin nan chinh lai.
35 “Puanzar a lenglei ah cabuai nan chiah lai. Mei vannak tung cu puan biakinn i thlanglei kam ah nan chiah lai i chaklei ah nan chiahmi cabuai he hmaitonh in an um lai.
36 Puan biakinn luhnak puanzar caah la dum, maimaw tuuhmul, la sen le la hmangṭhia thlurmi la hna in nan tah lai.
37 Puanzar caah anri tung panga nan ser lai i sui in nan hut lai. A hrenh zong sui in nan ser lai i cu tung hna tangdanh caah dar in kedanh panga nan ser lai.
Footnotes
^ Dong khat cu lehmah 17.5 he aa tluk. Thlaihhlei B14 ah zoh.
