Exodus 35:1-35
35 A hnuah Moses nih Israel mibu kha a pumh hna i “Hihi Jehovah nih a kan pekmi nawlbia cu a si:
2 Ni ruk chung rian nan ṭuan kho. Asinain a ni sarihnak ni cu nan caah a thiangmi ni, Jehovah caah dinhnak sabbath ni a si lai. Mah ni ah rian a ṭuanmi paoh cu thihdan pek an si lai.
3 Sabbath ni ah cun nan inn ah mei nan kau lai lo” tiah a ti hna.
4 Moses nih Israel mibu kha hitin a ti hna: “Hihi Jehovah nih a kan pekmi nawlbia cu a si.
5 ‘Jehovah caah thawhlawm rak pu u. Mah lungtho tein pek a duhmi paoh nih Jehovah caah thawhlawm rak pu u: sui, ngun, dar,
6 la dum, maimaw tuuhmul, la sen, la hmangṭhia, meheh hmul,
7 sii sen buhmi tuukawng phaw, rili saihrem phaw, anri thing,
8 meiinn caah chiti, thuh awk chiti le rimhmui caah balsam chiti,
9 oniks lungvar, tlangbawi angki le ṭangbenh i benh awkah a dang lungvar hna kha nan rak put lai.
10 “‘Nan lakah a ummi zungthiam vialte cu ra hna seh law Jehovah nawl pekmi vialte kha ser hna seh.
11 Mah cu puan biakinn le a khuh, a hrenh, a tungtlang, a thingthluan, a tung le a kedanh;
12 kuang le a zawnhnak laang, kuang a chin le dalnak caah puanzar;
13 cabuai le a zawnhnak laang, cabuai cung thilri vialte le Pathian hmai hunhmi changreu;
14 mei vannak tung le a thilri, meiinn le meiinn caah chiti;
15 rimhmui khanghnak biakṭheng le a zawnhnak laang; thuh awk chiti le rimhmui; puan biakinn luhnak puanzar;
16 khangh thawinak biakṭheng le biakṭheng ca dar fingrilh; biakṭheng zawnhnak laang le a thilri vialte; hmaihum le a tohnak;
17 tual kulhnak puanzar, a tung le a kedanh; tual luhnak puanzar;
18 puan biakinn khenhnak fung, tual khenhnak fung le a hri;
19 hmunthiang i rianṭuannak caah dawh tein tahmi thilthuam; tlangbawi Aaron caah a thiangmi thilthuam, tlangbawi rian a ṭuan dingmi a fapale caah thilthuam kha an si.’”
20 Israel mi vialte cu Moses hmaika cun an chuak.
21 Anmah lungtho tein pek a duhmi paoh cu an ra i tonnak thlam caah, tonnak thlam rianṭuannak vialte caah le a thiangmi thilthuam caah Jehovah sinah thawhlawm an rak put.
22 Nu he, pa he anmah lungtho tein pek a duhmi paoh cu an ra thluahmah i ṭangtonh, tumbul, kutdonghrolh, a dang hlawn thil hna le sui in sermi hlawn thil a phunphun kha an rak put. An sui hlawn hna kha Jehovah sinah an pekchanh.
23 Cun la dum, maimaw tuuhmul, la sen, la hmangṭhia, meheh hmul, sii sen buhmi tuukawng phaw le rili saihrem phaw a ngeimi paoh zong nih mah kha an rak put.
24 Ngun le dar a pe khomi paoh nih Jehovah caah an rak put. Anri thing a ngeimi paoh zong nih puan biakinn caah an rak put.
25 Zungthiammi nu vialte nih la dum, maimaw tuuhmul, la sen le la hmangṭhia hna kha an thlur i an rak put.
26 A lung a thomi zungthiammi nu vialte nih meheh hmul kha an thlur.
27 Hruaitu hna nih tlangbawi angki le ṭangbenh i benh awk caah oniks lungvar le a dang lungvar hna kha an rak put.
28 Balsam chiti, meiinn caah chiti, thuh awk caah chiti le rimhmui caah chiti zong an rak put.
29 A lung a thomi pa le nu vialte nih Moses sinin Jehovah nawl pekmi rian caah thawhlawm an rak put. Israel mi nih Jehovah sinah siang ngai in thawhlawm an rak put.
30 Cun Moses nih Israel mi kha hitin a ti hna: “Jehovah nih Judah phun chung in Hur fapa, Uri fapa Bezalel kha a thim cang.
31 Pathian nih anih cu Pathian thiang thlarau in a khahter i fimnak, hngalhthiamnak le zungthiamnak he aa tlaimi hngalhnak a phunphun kha a pek.
32 Thilri pungsan dawh tein ser khawhnak, sui le ngun le dar in thilri ser thiamnak,
33 lungvar tannak le ṭamhnak, thing in thilri a phunphun ser thiamnak kha a pek.
34 Bezalel le Dan phun chung in Ahisamak fapa Oholiab cu Pathian nih midang cawnpiak thiamnak zong a pek hna.
35 Annih cu a lam kip in zungthiamnak, pungsan suai thiamnak, la dum, maimaw tuuhmul, la sen le la hmangṭhia hna hmang in puan tah thiamnak le thiam tah thiamnak in a khahter hna. Annih nih rian a phunphun kha an ṭuan khawh lai i pungsan a phunphun kha an suai lai.
