Exodus 33:1-23
33 Jehovah nih Moses cu “Izipt ram in na chuahpimi hi mi hna he hika hmun hin chuak cang u. Abraham, Isak le Jakob sinah ‘Hi ram hi na tefa kha ka pek hna lai’ tiah bia kaa kammi ram ah khan va kal u.
2 Nan hmaiah vancungmi pakhat kha ka thlah lai i Kanaan mi, Amor mi, Hit mi, Periz mi, Hiv mi le Jebus mi kha ka ṭhawl hna lai.
3 Cawhnuk le khuaihliti a luangmi ram ah va kal u. Asinain kei cu nan sinah ka kal lai lo, zeicahtiah nannih cu a lung a khongmi* nan si caah lampi ah kaan hloh dih sual hna lai” tiah a ti.
4 Cu thawngchia cu mi nih an theih tikah an ṭap i ahohmanh nih an hlawn thil cu an i hruk ti lo.
5 Jehovah nih Moses cu “Israel mi kha chim hna, ‘Nannih cu a lung a khongmi nan si. Nan sinah ka ra lai i chikkhat te ah kaan hloh khawh dih ko hna. Asinain zeitindah dan kaan tat hna lai ti ka ruah lioah nan hlawn thil cu i phoih u’” tiah a ti.
6 Cucaah Israel mi nih an hlawn thil cu Horeb Tlang ah an i phoih i mah hnu cun an i hruk ṭhan ti lo.
7 Moses nih a thlam cu a phoih i riahhmun lenglei i lamhla nawn ah khin a va bunh, mah cu tonnak thlam tiah a auh. Jehovah sinah ruahnak hal a duhmi paoh nih riahhmun leng ah a ummi tonnak thlam ah cun an va kal tawn.
8 Moses cu thlamlei a kal fatin mi vialte cu an tho i anmahle an thlam kaa cio ah an dir, cun Moses thlam chung ah a luh tiang an zoh.
9 Moses cu thlam chung i a luhle cangka minmei tung cu a rung ṭum i thlam kaa ah a dir. Cuka in Pathian nih Moses cu a chawnh tawn.
10 Minmei tung cu thlam kaa ah a dir kha mi vialte nih an hmuh tikah anmahle an thlam kaa cio ah an bawk.
11 Jehovah nih Moses cu mi pakhat le pakhat bia an i ruah bantuk in hmaitonh in bia a ruah. Moses cu riahhmunlei a kir tikah a hnu zultu zong a si i amah bawmtu zong a simi Nun fapa Joshua cu thlam ah a taangta.
12 Moses nih Jehovah kha “‘Hi mi hna hi kalpi hna’ tiah na ka ti, asinain ahodah ka sinah na thlah lai ti cu na ka hngalhter lo. ‘Ṭha tein kaan hngalh* i ka mithmai ṭha na hmu’ ti zong in na rak ka ti.
13 Na mithmai ṭha ka hmuh ahcun nangmah kha ṭha tein kaan hngalh i na mithmai ṭha ka hmuh khawh peng nakhnga na lam kha ka hngalhter hram ko. Cun hi miphun cu nangmah na miphun an si ti kha philh sawh hlah” tiah a ti.
14 Mah tikah Pathian nih “Keimah theng te na sinah ka kal lai i daihnak kaan pek lai” tiah a ti.
15 Moses nih cun “Nangmah naa tel lo ahcun hika hmun hin rak kan chuahter hlah.
16 Na mithmai ṭha ka hmuh ti kha keimah le na mi hna nih zeitindah kan hngalh lai? Kan sinah na kal ve lawng ah keimah le na miphun cu vawleicung miphun vialte hna he i lo loin aa thleidangmi kan si ti kha kan hngalh lai” tiah a ti.
17 Jehovah nih Moses cu “Nang cu ka mithmai ṭha a hmumi le ṭha tein ka hngalhmi na si caah na ka halmi ning in ka tuah lai” tiah a ti.
18 Cun Moses nih “Zaangfahnak in na sunparnak cu ka hmuhter ko?” tiah a hal.
19 Pathian nih cun “Ka ṭhatnak vialte kha kaan hmuhter lai, Jehovah timi ka min kong kha kaan chimh lai; mithmai ṭha pek ka duhmi kha mithmai ṭha ka pek hna lai, zaangfah ka duhmi kha ka zaangfah hna lai.
20 Asinain ka hmai tu cu na hmu kho lai lo, zeicahtiah ka hmai a hmumi cu an nung kho lo” tiah a ti.
21 Jehovah nih hitin a ti chap: “Ka pawng ah a ummi lungpi cung ah hin dir tuah.
22 Ka sunparnak in ka lanh tikah lungkua chung ah kaan chiah lai i ka lanh dih hlan tiang ka kut in kaan huh lai.
23 Ka kut ka lak ṭhan tikah ka hnulei kha na hmuh lai. Asinain ka hmai tu cu na hmu lai lo.”
