Exodus 30:1-38
30 “Rimhmui khanghnak caah biakṭheng pakhat in na ser lai; mah biakṭheng cu anri thing in na ser lai.
2 Tungvang palh a si lai i a sau dong khat,* a kauh dong khat le a san dong hnih a si lai. A ki cu biakṭheng he an i tlai lai.
3 Biakṭheng cu a cunglei, a sirlei velchum le a ki hna kha sui thiang in na hut lai; a cunglei a tlang velchum kha sui in na kamh lai.
4 Biakṭheng i a tlangkamh tang ah sui kual pahnih in na ser lai i a kap hnih in na bunh lai, mah cu biakṭheng i zawnhnak laang hrolhnak caah an si lai.
5 Laang cu anri thing in na ser lai i sui in na hut lai.
6 Biakṭheng cu nangmah kaan ton lainak hmun, Tehte Khaannak kuang a chin le kuang pawng ah a ummi puanzar hmaiah na chiah lai.
7 “Aaron nih zing fatin meiinn a timhtuah tikah biakṭheng cung ah rimhmui kha a khangh lai.
8 Aaron nih ni a tlak i meiinn a van tikah rimhmui kha a khangh lai. Nan tefa chan tiang in Jehovah hmaiah rimhmui kha nan khangh zungzal lai.
9 Biakṭheng cung ah cun khammi rimhmui, khangh thawinak, changvut thawinak le thlet thawinak hna kha nan pe lai lo.
10 Aaron nih sual ngaihthiamnak caah pekchanhmi thi kha a lak lai i biakṭheng a ki ah a thuh lai. Cuticun biakṭheng kha kum khat ah voi khat a thianter lai, cun nan tefa hna chan tiang in kum khat ah voi khat in cuticun nan tuah lai. Mah cu Jehovah caah a thiang bikmi a si.”
11 Cun Jehovah nih Moses cu hitin a ti:
12 “Israel mi kha milu na rel hna tik le cazin na lak hna tikah pakhat cio nih an nunnak caah tlanhnak man kha Jehovah sinah an pek lai. Mah cu min cazin an pek tikah an cung ah rai a tlun nakhnga lo caah a si.
13 Min cazin khumh a simi hna nih hmunthiang i shekel* tahnak ning in shekel a cheu kha Jehovah caah thawhlawm an pek lai. Shekel pakhat cu gerah* pakul he aa tluk.
14 Min khumh a simi kum 20 le kum 20 cung a simi hna nih Jehovah caah thawhlawm an pek lai.
15 Nan nunnak ca sual ngaihthiamnak caah Jehovah sin thawhlawm nan pek tikah mirum zong nih shekel a cheu nak tam nan pe lai lo i misifak zong nih shekel a cheu nak tlawm nan pe lai lo.
16 Israel mi sinin sual ngaihthiamnak caah ngun tangka kha na lak lai i tonnak thlam rianṭuannak caah na pek lai. Mah cu Jehovah nih Israel mi philhlonak caah le an nunnak ca i sual ngaihthiamnak caah a si lai.”
17 Jehovah nih Moses kha hitin a ti chap:
18 “Kholhṭawlnak caah hmaihum le a tohnak kha dar in na ser lai; mah kha tonnak thlam le biakṭheng karah na chiah lai i a chung ah ti na rawn lai.
19 Cuka ah Aaron le a fapale cu an kut le an ke an i ṭawl lai.
20 Tonnak thlam chung an luh tik le Jehovah sin mei in khangh thawinak pek awkah biakṭheng an fuh tikah an thih nakhnga lo ti in an i ṭawl lai.
21 An thih nakhnga lo an kut le an ke kha an i ṭawl lai, mah cu Aaron le a tefa hna nih an zulh dingmi, a hmunmi phunglam a si.”
22 Cun Jehovah nih Moses kha hitin a ti:
23 “Zihmui phun ṭha bik kha la hna: mura thingthling shekel 500, a rim a hmuimi nakzik shekel 250, a rim a hmuimi fu* shekel 250,
24 kassia shekel 500 le oliv chiti hin khat* kha la hna. Hi vialte hi hmunthiang i shekel tahnak ning in na tah lai.
25 Cu rimhmui vialte cu ṭha tein na cawh lai i thuhmi chiti thiang ah na ser lai. Mah cu rian pek tikah toihmi chiti thiang a si lai.
26 “Tonnak thlam le Tehte Khaannak kuang kha chiti thiang in na toih lai.
27 Cabuai le a cung thilri vialte, mei vannak tung le a thilri vialte, rimhmui khanghnak biakṭheng,
28 khangh thawinak biakṭheng le a thilri vialte, hmaihum le a tohnak hna kha chiti thiang na toih lai.
29 Cu thilri hna cu na thianh lai i a thiang bikmi an hung si lai. Cu thilri a tawngtu paoh cu an thian awk a si.
30 Aaron le a fapale cu chiti na toih hna lai i ka caah tlangbawi rian ṭuan awkah na thianter hna lai.
31 “Israel mi kha hitin na ti hna lai, ‘Hihi nan tefa hna chan tiang in ka rianṭuannak he aa tlaiin chiti thuhnak caah hmanmi chiti thiang a si lai.
32 Hi chiti hi midang nan toih hna lai lo i mah he aa lo in zei chiti hmanh nan ser lai lo. Hi chiti cu a thiangmi a si. Nan caah hi chiti cu a thiangmi a si zungzal lai.
33 Hi chiti he i lo in a sertu le tlangbawi a si lomi* kha hi chiti a toihtu paoh cu a miphun chung in hloh a si lai.’”*
34 Jehovah nih Moses kha hitin a ti: “A hmuimi thingthling, onikha, galbanum zihmui le frankinsen* thiang hna kha aa zat cio in la hna.
35 Cu rimhmui hna kha ṭha tein na cawh lai; cite na phulh lai i a thiangmi rimhmui ah na ser lai.
36 Rimhmui cheukhat kha dip tein na phomh lai, kaan ton lainak tonnak thlam i Tehte Khaannak kuang hmaiah na chiah lai. Cu rimhmui cu nan caah a thiang bikmi a si lai.
37 Hi rimhmui cawhmi hna hi nanmah hman awkah nan i ser lai lo. Zeicahtiah mah cu Jehovah caah a thiangmi a si.
38 Mah ca hnimh awkah hi rimhmui he i lo in a sertu paoh cu a miphun chung in hloh a si lai.”
Footnotes
^ Lehmah 17.5 hrawng. Thlaihhlei B14 ah zoh.
^ Shekel pakhat cu 11.4 g he aa tluk. Thlaihhlei B14 ah zoh.
^ Gerah pakhat cu 0.57 g he aa tluk. Thlaihhlei B14 ah zoh.
^ Mirang holh in calamus.
^ Hin pakhat cu 3.67 L he aa tluk. Thlaihhlei B14 ah zoh.
^ A hrampi, “mising,” Aaron chungkhar a si lomi.
^ Asiloah “thihdan pek a si lai.”
^ Mei in khangh tikah a hmuimi, a raangmi thingthling phun khat.
