Exodus 17:1-16
17 Israel mi cu Jehovah nawl peknak ning in Sin ramcar in an i thawh i hmun khat hnu hmun khat ah an i thawn, cun Refidim ah riahhmun an khuar. Cuka ah din awk ti a um lo.
2 Cucaah Moses cu mi pawl nih an doh i “Din awk ti kan pe” tiah an ti. Moses nih “Zeicah keimah cu nan ka doh? Zeicah Jehovah cu nan hneksak lengmang?” tiah a ti hna.
3 Asinain mi cu an ti a hal tuk i Moses kha an phunzai hnawh lengmang, “Kanmah he, kan fale he, kan saṭil he ti hal in thih awkah Izipt ram in zeicah na kan chuahpi?” tiah an ti.
4 Moses nih “Hi mi hna hi zeitindah ka tuah hna lai? Tlawmpal ah cun lung in an ka cheh cang lai!” tiah a ti i Jehovah sinah bawmhnak a hal.
5 Jehovah nih Moses cu “Israel mi upa cheukhat kha i kalpi hna law zapi hmai in kal, Nile Tiva na tuknak ṭhiangṭhunh kha i put.
6 Horeb Tlang i lungpi cung ah ka dir lai. Lungpi kha na tuk lai i ti a chuak lai, cun mah ti kha mi nih an din lai” tiah a ti. Moses nih Israel mi upa hna hmaiah cutin a tuah.
7 Cucaah cu hmun cu Massah* le Meribah* tiah min a sak, zeicahtiah Israel mi nih Moses kha an doh caah le “Jehovah cu kan sinah a um maw, um lo?” tiah an ti i Jehovah kha an hneksak caah a si.
8 Amalek mi cu an ra i Israel mi kha Refidim ah an doh hna.
9 Mah tikah Moses nih Joshua cu “Pa cheukhat kha thim hna law Amalek mi kha va do hna u. Thaizing ah a hmaanmi Pathian ṭhiangṭhunh kha kaa put lai i tlangpar ah ka dir lai” tiah a ti.
10 Joshua nih Moses a chim ning tein a tuah i Amalek mi cu a doh hna. Cun Moses le Aaron le Hur cu tlangpar ah an kai.
11 Moses nih a kut a hler chung paoh cu Israel mi nih an tei hna i a kut a ṭhumh tik paoh ah Amalek mi nih an tei hna.
12 Moses cu a ban tha a dih tikah Aaron le Hur nih lung pakhat an lak i lung cung ah cun an ṭhutter. Cun khatlei khatlei in a ban cu an domhpiak, cuticun ni a tlak tiang a ban cu a hler khawh.
13 Joshua nih Amalek le a mi pawl kha vainam in a tei hna.
14 Jehovah nih Moses cu “Hi kong hi philhlonak caah cauk ah ṭial, cun ‘Amalek mi cu vawleicung in hloh dih cikcek an si lai i a philh in philh an si lai’ tiah Joshua kha chim” tiah a ti.
15 Cun Moses nih biakṭheng pakhat a ser, Jehovah-nissi* tiah min a sak i,
16 “Amelak nih Jah bawiṭhutdan kha a ralchanh caah Jehovah nih Amalek mi kha chan khat hnu chan khat in a doh hna lai” tiah a ti.
