Exodus 36:1-38
36 “Bazalel le Oholiab cu Jehovah nih a thiangmi rian ṭuan awkah fimnak le hngalhthiamnak a pekmi zungthiammi pa hna he Jehovah nawl pekmi ning in an ṭuanṭi lai.”
2 Moses nih Bazalel le Oholiab le Jehovah nih fimnak a pekmi zungthiam vialte, rian ṭuan awkah a lung a thomi vialte kha a auh hna.
3 Annih nih a thiangmi rianṭuannak caah Israel mi nih an pekmi thawhlawm kha Moses sinah cun an lak. Asinain Israel mi nih zing fatin thawhlawm cu an rak put lengmang rih ko.
4 Cun a thiangmi rian an thawk hnuah zungthiammi vialte cu pakhat hnu pakhat in an ra i,
5 Moses kha “Jehovah nih a kan fialmi rian caah mipi nih an rak putmi cu a herhmi nakin a tam deuh cang” tiah an ti.
6 Cucaah Moses nih riahhmun ah thawng a thanh i “Ahohmanh nih a thiangmi puan biakinn caah thawhlawm rak pu ti hlah u” tiah a ti. Cuticun mipi nih thawhlawm cu an rak pu ti lo.
7 An rak putmi thilri hna cu rian liimnak caah a za cang i a herhmi leng hmanh a si cang.
8 Cucaah zungthiam hna nih puan biakinn puanthan pahra cu la hmangṭhia thlurmi, la dum, maimaw tuuhmul, la sen in an tah; cun Bezalel nih puanthan cung ah cun cherubim zuk a suai.
9 Puanthan pakhat cio ah a sau cu dong* 28 a si i a kauh cu dong 4 a si. Puanthan cu a dihlak in an i ngaw dih.
10 Puanthan panga kha a peh i zun khat ah a ṭhit, a dang puanthan panga zong a peh i zun khat ah a ṭhit.
11 Mah hnuah aa pehmi puanthan zun khatnak i a tlang donghnak ah la dum in a kual kha a sih. Cun aa pehmi a dang puanthan zun khat i a tlang donghnak, puanthan zun hnih an i pehnak zawn ah khan a kual cu a sih ve.
12 Puanthan zun khat ah a kual 50, a dang puanthan zun khat i a tlang donghnak, puanthan zun hnih an i pehnak zawn ah a kual 50 in a sih. Cuticun a kual cu pakhat le pakhat hmaitonh in an um.
13 Sui in a hrenh 50 a ser i cu a hrenh in cun puanthan kha a komh, cuticun puan thlam pakhat ah aa cang.
14 Cun puan biakinn khuh caah meheh hmul in puanthan 11 kha a tah.
15 Puanthan pakhat cio ah a sau cu dong 30 a si i a kauh cu dong 4 a si. Puanthan 11 ning in an i ngaw dih.
16 Puanthan panga kha hmunkhat ah a ṭhit i a dang puanthan paruk zong kha hmunkhat ah a ṭhit.
17 Cun puanthan zun khat i a tlang donghnak ah a kual 50 in a sih, cun a dang puanthan zun khat i a tlang donghnak, puanthan zun hnih an i pehnak zawn zong ah a kual 50 in a sih.
18 Dar in a hrenh 50 a ser i puanthan cu pakhat ah a can nakhnga cu a hrenh in cun a komh.
19 Thlam khuhnak kha sii sen buhmi tuukawng phaw in a ser i mah cung in khuh awkah rili saihrem phaw kha a ser ṭhan.
20 Puan biakinn vanpang caah a tungtlang kha anri thing in a ser.
21 A tungtlang pakhat ah a san dong hra, a kauh dong khat le a cheu a si.
22 A tungtlang pakhat cio ah a dang he pehnak caah a ke pahnih cio an um. Puan biakinn caah a tungtlang dihlak cu cuticun a ser hna.
23 Puan biakinn thlanglei vanpang caah a tungtlang 20 in a ser.
24 A tungtlang 20 tangdanh caah ngun kedanh 40 in a ser. A tungtlang pakhat ah a ke pahnih le kedanh pahnih a um. Cuticun a tungtlang pakhat cio caah a ke pahnih le kedanh pahnih cio an um.
25 Cun puan biakinn chaklei vanpang caah a tungtlang 20 in a ser i,
26 ngun kedanh 40 in a ser, a tungtlang pakhat ah kedanh pahnih in le a dang a tungtlang ca zong ah kedanh pahnih cio in a ser.
27 Puan biakinn a hnulei vanpang caah a tungtlang paruk in a ser.
28 Cun puan biakinn a hnulei a kil tung pahnih caah a tungtlang pahnih in a ser.
29 Mah a tungtlang cu a tanglei in a cunglei tiang thingphel pahnih in a kal i a cunglei a pakhatnak kual ah an i tong, cuticun a kil tung pahnih kha a ser.
30 A hnulei vanpang caah a tungtlang pariat le tangdanh caah ngun kedanh 16 in a ser, a tungtlang pakhat ah kedanh pahnih cio an um.
31 Cun anri thing in thingthluan kha a ser i puan biakinn thlanglei a tungtlang caah panga,
32 chaklei a tungtlang caah panga, a hnulei a tungtlang caah panga in a ser hna.
33 A laifang thingthluan cu khatlei deng in khatlei deng tiang a tungtlang laifang in a khaan.
34 A tungtlang kha sui in a hut i thingthluan zong sui in a hut, cun thingthluan hrolhnak a kual kha sui in a ser.
35 Puanzar cu la dum, maimaw tuuhmul, la sen le la hmangṭhia thlurmi in a tah. Cu puanzar cung ah cun cherubim zuk kha a suai.
36 Puanzar caah anri thing in tung pali a ser i sui in a hut, a hrenh kha sui in a ser hna i tung pali caah ngun kedanh pali a ser.
37 Puan biakinn luhnak puanzar caah la dum, maimaw tuuhmul, la sen le la hmangṭhia thlurmi la hna in a tah,
38 puanzar caah tung panga le a hrenh kha a ser hna. Tung a par le a tlaihnak kha sui in a hut hna, asinain tung kedanh panga kha cu dar in a ser hna.
Footnotes
^ Dong khat cu lehmah 17.5 he aa tluk. Thlaihhlei B14 ah zoh.
