Exodus 13:1-22
13 Jehovah nih Moses cu,
2 “Israel mi fater pa paohpaoh cu keimah nan ka pek lai. Minung an si ah, saram an si ah fater pa paohpaoh cu keimah ta an si” tiah a ti.
3 Moses nih mi pawl cu hitin a ti hna: “Sal nan sinak Izipt ram in nan chuah ni, hi ni hi philh hlah u. Zeicahtiah Jehovah nih a ṭhawngmi a kut in hika in hin aan chuahpi hna. Cucaah thilnu phulhmi changreu kha nan ei lai lo.
4 Abib* thla, nihin ni ah hin nan rak chuak.
5 Jehovah nih nan pupa hna sinah kaan pek hna lai tiah bia aa kammi ram, Kanaan mi, Hit mi, Amor mi, Hiv mi le Jebus mi hna an umnak, cawhnuk le khuaihliti a luannak ram ah aan luhpi hna tikah kum fatin hi thla paoh ah cu puai cu nan tuah lai.
6 Ni sarih chung thilnu phulh lo changreu kha nan ei lai i a ni sarihnak ni cu Jehovah caah puai a si lai.
7 Ni sarih chung thilnu phulh lo changreu kha nan ei lai. Thilnu phulhmi changreu cu nan sinah hmuh si hlah seh. Thilnu cu nan ram chung ah hmuh si hlah seh.
8 Cu ni ah cun nan fale kha ‘Izipt ram in kan rak chuah lioah Jehovah nih kan caah a tuahmi thil ruang ah hi puai hi kan tuahmi a si’ tiah nan chimh hna lai.
9 Jehovah nih a ṭhawngmi a kut in Izipt ram in aan chuahpi hna caah Jehovah nawlbia kong kha nan chim zungzal awk a si. Cutin nan chim khawh zungzal nakhnga cu puai cu nan kut caah hmelchunhnak le nan cal caah philhlonak a si lai.
10 Kum fatin rikhiahmi caan ah cu nawlbia cu nan zulh lai.
11 “Jehovah nih nanmah pek awkah nan sin le nan pupa hna sinah bia a rak i kammi Kanaan ram i aan luhpi hna tikah,
12 minung le saram fater pa paohpaoh cu Jehovah kha nan pek lai. Annih cu Jehovah ta an si.
13 Laa fater paohpaoh cu tuu in nan tlanh hna lai. Nan tlanh lo ahcun laa cu a hngawng nan khiah lai. Nan fater pa paohpaoh cu nan tlanh hna lai.
14 “Hmailei ah nan fale nih ‘Zeicah mah hi kan tuah?’ tiah an in hal hna ahcun ‘Jehovah nih a ṭhawngmi a kut in sal kan sinak Izipt ram in a kan chuahpi.
15 Faraoh nih lungkhong ngai in a kan kalter duh lo tikah Jehovah nih Izipt ram i fater vialte, minung fater thawk in saram fater tiang a thah dih hna. Cucaah fater pa vialte kha Jehovah sinah kan pekchanh hna i kan fapa lakin fater pa paohpaoh cu kan tlanh hna’ tiah nan leh hna lai.
16 Jehovah nih a ṭhawngmi a kut in Izipt ram in a kan chuahpi caah hi puai cu kan kut caah hmelchunhnak le kan cal caah philhlonak an si lai.”
17 Faraoh nih mi pawl cu a kalter hna tikah Pathian nih Filistin ram lei in i nai deuh hmanh seh law cuka ram lei in a hruai hna lo. Zeicahtiah Pathian nih “Raldohnak an ton tikah mi cu an lung aa thleng lai i Izipt ram lei ah an kir sual lai” tiah a ti.
18 Pathian nih Rili Sen pawng ramcar lei in, aa hlatnak in a velpi hna. Israel mi cu Izipt ram in ralkapbu bantuk in ningcang tein an chuak.
19 Moses nih Josef a ruh zong aa kalpi. Zeicahtiah Josef nih Israel fapale kha “Pathian nih aan philh hrimhrim hna lai lo. Mah tikah ka ruh hi hika in hin nan kalpi lai” tiah chiatserh in bia a rak kamter hna caah a si.
20 Sukkoth in an i thawh i ramcar ramri ah a ummi Etham ah an riak.
21 Jehovah cu an hmaiah a kal i chun ah minmei tung in lam a hruai hna i zan ah mei tung in ceunak a pek hna caah chun he, zan he an kal kho.
22 Chun ah minmei tung le zan ah mei tung cu Israel mi hna hmaiah a um peng.
Footnotes
^ Thlaihhlei B15 ah zoh.
