Exodus 19:1-25
19 Israel mi cu Izipt ram in an chuah hnu thla thumnak thla, cu ni* hrimhrim ah cun Sinai ramcar kha an phan.
2 Refidim in an chuak i Sinai ramcar an phanh tikah Israel mi cu Sinai Tlang hmaiah an riak.
3 Moses cu a hmaanmi Pathian ton awkah tlang cung ah a kai. Jehovah nih tlang cung in cun a auh i “Jakob tefa Israel mi kha hihi chim hna,
4 ‘Izipt mi hna cung ah ka tuahmi le mupi nih a fale a thla in a cawi hna bantuk in kaan cawi hna i ka sinah kaan phanhpi hna ning kha nanmah theng te nih nan hmuh cang.
5 Vawlei hi a dihlak in keimah ta a si. Cucaah ka bia hi a dikthliar in nan ngaih i nanmah he ka sermi biakamnak kha nan zulh ahcun nannih cu miphun vialte lakah a hleiin ka thimmi miphun nan si lai.
6 Nannih cu a thiangmi miphun nan si lai i tlangbawi nih ukmi ram nan si lai.’ Hihi Israel mi hna sinah na chim dingmi bia cu a si” tiah a ti.
7 Cucaah Moses cu a va ṭum i Israel mi upa pawl kha a auh hna i Jehovah nih a fialmi vialte kha a chimh hna.
8 Mizapi cu an hna a tla i “Jehovah nih a chimmi vialte cu kan tuah dih lai” tiah an ti. Cucaah mizapi nih an lehnak bia kha Moses nih Jehovah cu a chimh ṭhan colh.
9 Jehovah nih Moses cu “Kaan chawnh tikah mi nih an theih nakhnga le na cung ah zumhnak an ngeih peng nakhnga minmei chahpi in na sinah ka ra lai” tiah a ti. Cun mi nih an lehnak bia kha Moses nih Jehovah cu a chimh.
10 Jehovah nih “Mizapi sinah va kal law nihin le thaizing ah i thianh hna seh. Cun an thil kha su hna seh.
11 Ni thumnak ni caah timhcia tein um hna seh. Zeicahtiah ni thumnak ni ah keimah Jehovah cu mizapi hmaiah Sinai Tlang ah ka rung ṭum lai.
12 Mizapi caah tlang velchum ah ramri na ser lai. Cun ‘Tlang cung ah kai lo ding le tlanghram zong tawngh lo ding in i ralring u. Tlang a tawngmi paoh cu thah an si hrimhrim lai.
13 Amah kha ahohmanh nih nan tawng lai lo. Lung in nan cheh lai asiloah thal in nan kah lai. Saram a si ah, minung a si ah thah an si lai’ tiah chim hna. Asinain tuukawng ki tum a si tik lawnglawng ah tlang pawng ah rat khawh a si lai” tiah a ti.
14 Moses cu tlang cung in a rung ṭum i mizapi cu i thianh awkah a fial hna. Cun an thil kha an suk.
15 Moses nih “Ni thumnak ni caah timhcia tein um u. Nan nupile he nupa sinak hmang hlah u”* tiah a ti hna.
16 Ni thumnak ni zinglei ah khua a ri i nimtlau a lek. Tlang cung ah minmei chahpi a zam. Muko thawng cu a thang tuk i riahhmun ah a ummi vialte cu a ther in an ther dih.
17 Moses nih mizapi cu a hmaanmi Pathian ton awkah riahhmun in a chuahpi hna i tlanghram ah cun an dir.
18 Sinai Tlang cu meikhu nih a zelh dih, zeicahtiah Jehovah cu mei in a rung ṭum. Meikhu cu meiphu i meikhu bantuk khin a kai thluahmah i tlang cu a ningpi in fakpi in aa hnin.
19 Muko thawng cu a thang chin thluahmah i Moses nih bia a chim tikah a hmaanmi Pathian nih a run leh.
20 Jehovah cu Sinai Tlangpar ah a rung ṭum. Cun Jehovah nih Moses cu tlangpar ah kai ding in a auh i Moses cu a hung kai.
21 Jehovah nih Moses cu “Va ṭum law mi cu Jehovah mui hmuh duh ah ramri kha hramhram in lonh awkah an i zuam nakhnga lo ralrin va pe hna. Cu lo ahcun an thi sual lai.
22 Jehovah pawng ah hmaan tein a rami tlangbawi pawl zong i thianh hna seh. Cutin an tuah lo ahcun Jehovah nih dan a tat hna lai” tiah a ti.
23 Moses nih Jehovah kha “Mi pawl cu Sinai Tlang ah an kai kho lai lo. Zeicahtiah ‘Tlang velchum ah ramri ser u law thianter u’ tiah ralrin na kan pek cang cu ta!” tiah a ti.
24 Asinain Jehovah nih “Va ṭum law Aaron he khan rak kai ṭhan u. Asinain tlangbawi pawl le mizapi cu Jehovah mui hmuh duh ah ramri kha hramhram in lonh awkah i zuam hna hlah seh. Cu lo ahcun dan ka tat sual hna lai” tiah a ti.
25 Cucaah Moses cu mizapi sinah a va ṭum i a chimh hna.
