Exodus 10:1-29
10 Mah hnuah Jehovah nih Moses cu “Faraoh sinah va kal, zeicahtiah amah le a bawile cu an lungkhon awkah ka awnh cang. Mah cu a hmaiah khuaruahhar thil hna ka langhter khawh nakhnga caah a si.
2 Izipt ram fakpi in dan ka tatnak kong le ka langhtermi khuaruahhar thil kong hna hi nan fale le nan tule kha nan chimh khawh hna nakhnga caah a si. Keimah cu Jehovah ka si ti kha nan ka hngalh hrimhrim lai” tiah a ti.
3 Cucaah Moses le Aaron cu Faraoh sinah an va kal i hitin an ti: “Hebru mi hna Pathian Jehovah nih ‘Zei can tiang dah ka nawl ngaih loin na um rih lai? Ka mi pawl nih an ka biak khawh nakhnga kalter hna.
4 Ka mi pawl kha na kalter duh hna lo ahcun thaizing ah na ram chung ah khaubawk ka thlah hna lai.
5 Khaubawk nih vawlei cu an khuh dih lai i vawlei cu a langh hmanh a lang kho ti lai lo. Rial nih a hrawh lomi vialte kha an ei dih lai, ramlak i a khomi thingkung vialte zong an ei dih lai.
6 Na inn ah siseh, na bawile inn le Izipt ram i inn vialte ah siseh khaubawk cu an khat dih lai. Nan pupa hna hmanh nih an chan thawk in nihin ni tiang ah cu tluk in a tammi khaubawk cu an hmu bal lo’” tiah a ti. Cun Moses le Aaron cu Faraoh hmai in an chuak.
7 Faraoh bawile nih Faraoh cu “Hi pa nih zei can tiang dah harnak a kan pek rih lai? An Pathian Jehovah an biak khawh nakhnga kalter ko hna. Izipt ram cu a rawk dih cang ti hi na hngal rih lo maw?” tiah an ti.
8 Cucaah Faraoh nih Moses le Aaron cu a auh hna i “Va kal u law nan Pathian Jehovah cu va bia u. Asinain ahote dah a kal lai?” tiah a hal hna.
9 Moses nih cun “Jehovah caah puai kan tuah lai caah kan tar le kan no hna he, kan fapa le kan fanu hna he, kan tuu le kan caw hna he, kan dihlak in kan kal lai” tiah a ti.
10 Faraoh nih cun “Nanmah he, nan fale he kaan thlah hna lai tiah maw nan ruah? Cutin a si ahcun Jehovah cu nan sinah a um taktak tinak a si lai! Thil ṭhalo pakhatkhat tuah nan i tim ti cu a fiang ko.
11 Cuticun a si kho lo! Pa lawng in va kal u law Jehovah cu va bia u. Mah cu nan rak ka halmi kha a si ko” tiah a ti i Faraoh hmai cun an ṭhawl hna.
12 Jehovah nih Moses cu “Izipt ram cung ah na kut kha samh law khaubawk an chuak lai. Khaubawk nih cun rial nih a nganhtakmi vialte, Izipt ram chung i thlaikung vialte kha an ei dih lai” tiah a ti.
13 Moses nih a ṭhiangṭhunh cu Izipt ram cung ah a hlerle cangka Jehovah nih Izipt ram ah cun nichuahlei thli kha chun nitlak, zan khuadei a hranter. A thaizing ah nichuahlei thli nih khaubawk cu an rak chuahpi.
14 Izipt ram ah khaubawk cu an lut ciammam i ram chung ah a khah in an khat. Mah rai cu a fak tuk hringhran; cu tluk in a tammi khaubawk cu hlan zong ah a um bal lo i hmailei zong ah a um bal lai lo.
15 Khaubawk nih ram cu a ningpi in a khuh dih i ram cu a mui dih; rial nih a nganhtakmi thlaikung le thingthei kung vialte zong an ei dih hna. Izipt ram chung ah thinghring le thlaihring pakhat hmanh a taang lo.
16 Cucaah Faraoh nih Moses le Aaron cu khulrang in a auh hna i “Nan Pathian Jehovah cung le nanmah cung ah ka sual cang.
17 Atu voi khat te cu ka sualnak hi ka ngaithiam ko u law hi rai hi hlohpiak awkah nan Pathian Jehovah cu rak ka nawlpiak ko u” tiah a ti hna.
18 Cucaah Moses cu Faraoh sinin a chuak i Jehovah kha a nawl.
19 Mah tikah Jehovah nih thli a hrannak lam kha a thlen i nitlaklei thli kha fakpi in a hranter. Thli nih cun khaubawk cu a choih hna i Rili Sen ah a thlak hna. Izipt ram pumpi ah khaubawk pakhat te hmanh a taang lo.
20 Asinain Jehovah nih Faraoh cu a lungkhon awkah a awnh i Israel mi kha a kalter duh hna lo.
21 Jehovah nih Moses cu “Na kut kha vanlei ah hler law Izipt ram ah a chah taktakmi muihnak a tlung lai” tiah a ti.
22 Moses nih a kut cu vanlei ah a hler colh i Izipt ram chung dihlak cu nithum chung a mui dih cikcek.
23 Pakhat le pakhat an i hmu kho lo i ni thum chung khoika hmanh ah an kal kho lo; asinain Israel mi hna an umnak ah cun ceunak a um.
24 Faraoh nih Moses cu a auh i “Va kal u law Jehovah cu va bia u. Nan fale zong i kalpi hna u. Asinain nan tuu le nan caw tu cu chia ta hna u” tiah a ti.
25 Asinain Moses nih “Kan Pathian Jehovah sinah raithawinak le khangh thawinak kan pek lai caah kan saṭil pawl cu i kalpi ding in rak kan awnh ko.
26 Kan saṭil zong kan i kalpi hna lai. Pakhat hmanh kan kaltak lai lo, zeicahtiah kan Pathian Jehovah biaknak ah cheukhat kha kan hman hna lai. Cuka hmun kan phanh hlan cu Jehovah biaknak ah zei hi dah kan hman lai ti kha kan hngal rih lo” tiah a ti.
27 Jehovah nih Faraoh cu a lungkhon awkah a awnh caah a kalter duh hna lo.
28 Faraoh nih cun “Ka hmaika hin chuak! Ka hmai rak ka hmu ti hlah, na ka hmuh ni cu na thih ni a si lai” tiah a ti.
29 Mah tikah Moses nih “Na chim bang in na hmaiah ka rak chuak ti lai lo” tiah a ti.
