Exodus 8:1-32
8 Cun Jehovah nih Moses cu “Faraoh sinah va kal law hitin va chim, ‘Jehovah nih “Ka mi pawl nih an ka biak khawh nakhnga kalter hna.
2 Na kalter duh hna lo ahcun Izipt ram vialte hi utlak in dan ka tat lai.
3 Nile Tiva cu utlak in a khat lai. Utlak cu an rak lut lai i na inn ah, na ihnak khaan le na ihkhun ah, na bawile inn ah le na mi hna lakah an lut lai. Na meiphu le na umkheng chung tiang ah an lut lai.
4 Nangmah le na mi hna le na bawile vialte cung ah utlak nih an in kai hnawh hna lai” tiah a ti.’”
5 Cun Jehovah nih Moses cu “Aaron kha ‘Tiva le Nile kahcham le cerhti hna cung ah na ṭhiangṭhunh kha hler law Izipt ram pumpi ah utlak chuak hna seh’ tiah hei chim” tiah a ti.
6 Cucaah Aaron nih Izipt ram chung ti cung ah a kut cu a hler tikah utlak cu an hung chuak i ram chung ah a khah in an khat.
7 Asinain camhthiam pawl nih an camhthiamnak kha hmang in cutin an tuah ve i Izipt ram pumpi ah utlak cu an chuahter ve.
8 Cun Faraoh nih Moses le Aaron cu a auh hna i “Keimah sinin le ka mi hna sinin utlak hlohpiak awkah Jehovah cu kan nawlpiak u. Cuticun Jehovah sin raithawi awkah nan mi pawl cu ka kalter hna lai” tiah a ti hna.
9 Cun Moses nih Faraoh cu “Nangmah le na bawile, na mi hna le nan inn hna in utlak hlohpiak ding in le Nile Tiva lawng ah um ding in zeitik ah dah kaan nawlpiak lai?” tiah a ti.
10 Faraoh nih cun “Thaizing ah” tiah a ti. Cucaah Moses nih “Kan Pathian Jehovah bantuk Pathian dang ahohmanh an um lo ti kha na hngalh nakhnga na chim ning in ka tuah lai.
11 Utlak cu nangmah le na inn in siseh, na bawile le na mi hna sinin siseh an lo dih lai i Nile Tiva lawnglawng ah an um lai” tiah a ti.
12 Moses le Aaron cu Faraoh sinin an chuak i utlak cu Faraoh sinin an loh nakhnga Moses nih Jehovah cu a nawl.
13 Moses nih a nawl bantuk khan Jehovah nih a tuah i inn ah siseh, tual ah siseh, lo ah siseh a ummi utlak vialte cu an thi dih.
14 Utlak a thimi kha a pon in an pon hna i ram cu a thut in a thu.
15 Utlak an um ti lomi kha a hmuh tikah Faraoh cu a lung a hung khong ṭhan i Jehovah nih a chim bantuk te khan an bia cu a ngai duh lo.
16 Jehovah nih Moses cu “Aaron kha ‘Na ṭhiangṭhunh in leidip kha tu law Izipt ram pumpi ah fikfa* an hung chuak lai’ tiah hei chim” tiah a ti.
17 Annih nih cutin an tuah. Aaron nih a ṭhiangṭhunh cu a hler i leidip kha a tuk tikah Izipt ram i leidip vialte cu fikfa ah an i cang dih i minung le saram kha an seh hna.
18 Camhthiam pawl nih an camhthiamnak kha hmang in fikfa chuahter awkah an i zuam ve nain an tuah kho lo. Fikfa nih cun minung he, saram he a seh hna.
19 Camhthiam pawl nih Faraoh cu “Hihi cu Pathian ṭhawnnak a si!”* tiah an ti. Asinain Faraoh cu a lung a khong ṭhiamṭhiam rih i Jehovah nih a chim bantuk te khan an bia cu a ngai duh lo.
20 Cun Jehovah nih Moses cu hitin a ti: “Thaizing zingka te ah Faraoh cu Nile Tiva i a rat tikah va tong law hitin va chim. ‘Jehovah nih “An ka biak nakhnga ka mi pawl cu kalter hna.
21 Asinain ka mi kha na kalter hna lo ahcun nangmah le na bawile le na mi hna cung ah siseh, nan innchung ah siseh tlep* kha ka thlah hna lai. Izipt mi hna inn le an tlonlennak vawlei cu tlep in ka khahter lai.
22 Cu ni ah cun ka mi hna an umnak Goshen ram cu ka zuah lai i cuka ah tlep pakhat hmanh an um lai lo. Cuticun hi ram ah keimah Jehovah cu ka um ti kha na hngalh lai.
23 Ka mi le na mi cu ka thleidan hna lai. Thaizing ah hi khuaruahhar thil hi a um lai” tiah a ti.’”
24 Jehovah nih cutin a tuah caah tlep cu Faraoh inn, a bawile inn le Izipt ram pumpi ah a bubu le a tomtom in an lut i ram cu an hrawh dih.
25 A donghnak ah Faraoh nih Moses le Aaron cu a auh hna i “Hi ram ah hin nan Pathian sinah raithawinak cu tuah ko u” tiah a ti hna.
26 Moses nih cun “Cuticun a ṭha lai lo. Zeicahtiah kan Pathian Jehovah sinah rai kan thawimi cu Izipt mi nih an fih lai. Izipt mi nih an fihmi thil kha an mithmuh ah rai kan thawi ahcun lung in an kan cheh lai.
27 Ni thum lamkal aa hlatnak ramlak ah kan va kal lai i kan Pathian Jehovah nih a kan fial bantuk in a sinah rai kan thawi lai” tiah a ti.
28 Faraoh nih cun “Ramlak ah nan Pathian Jehovah sin raithawi awkah kaan thlah hna lai. Asinain lamhlatpi ah cun kal hlah u. Ka caah rak ka nawlpiak u” tiah a ti hna.
29 Moses nih cun “Atu na sinin ka chuak lai i Jehovah cu ka va nawl lai. Thaizing ah tlep cu nangmah Faraoh sinin siseh, na bawile le na mi hna sinin siseh an lo dih lai. Asinain rak kan hleng ti hlah law kan mi pawl kha Jehovah sin raithawi awkah thlah duh loin um ti hlah” tiah a ti.
30 Moses cu Faraoh sinin a chuak i Jehovah cu a va nawl.
31 Jehovah nih Moses bia ning in a tuah caah tlep cu Faraoh sinin siseh, a bawile le a mi hna sinin siseh an lo dih i pakhat te hmanh an taang lo.
32 Asinain Faraoh cu a lung a khong ṭhan i Israel mi cu a kalter duh hna lo.
