Exodus 6:1-30
6 Cucaah Jehovah nih Moses cu “Atu Faraoh cung ah ka tuah dingmi kha na hmuh cang lai. Israel mi cu a thlah hna nakhnga a ṭhawngmi ka kut in ka hnek lai, a ram in a chuahter hna nakhnga a ṭhawngmi ka kut in ka hnek lai” tiah a ti.
2 Cun Pathian nih Moses cu hitin a ti: “Keimah cu Jehovah ka si.
3 Abraham, Isak le Jakob sinah A Ṭhawng Bik Pathian in ka rak i langh tawn. Asinain Jehovah timi ka min he aa tlaiin cun an sinah tling tein ka rak i hngalhter hna lo.
4 Cun ramdang mi in an rak umnak Kanaan ram kha pek awkah anmah he biakamnak ka ser.
5 Izipt mi nih sal ah an hmanmi hna, Israel mi an aihramnak kha ka theih i ka biakamnak zong ka philh lo.
6 “Cucaah Israel mi cu hitin va chim hna: ‘Keimah cu Jehovah ka si. Izipt mi hna khinhmi thilrit in kaan chuah hna lai i an sal sinak in kaan khamh hna lai. Izipt mi cu fakpi in dan ka tat hna lai i a ṭhawngmi ka ban in kaan khamh hna lai.
7 Nannih cu ka miphun ah kaan lak hna lai. Keimah cu nan Pathian ka si lai. Izipt mi hna khinhmi thilrit in aan chuahtu hna Pathian cu keimah Jehovah ka si ti kha nan hngalh hrimhrim lai.
8 Abraham, Isak le Jakob sinah kaan pek hna lai tiah chiatserh in bia ka rak i kammi ram ah kaan kalpi hna lai. Cu ram cu kaan pek hna lai i nanmah ta a si lai. Keimah cu Jehovah ka si.’”
9 Moses nih cu bia cu Israel mi kha a chimh hna. Asinain an lung a dongh ruang ah le sal an sinak cu a fah tuk hringhran caah Moses bia kha an ngai duh lo.
10 Cucaah Jehovah nih Moses cu,
11 “Va kal law Israel mi kha a ram in chuahter awkah Faraoh cu va chim” tiah a ti.
12 Asinain Moses nih Jehovah cu “Israel mi hmanh nih ka bia an ngaih lo ahcun Faraoh chinchin nih cun zeitindah a ngaih duh lai? Zeicahtiah kei cu biachim holhrel a thiam lomi ka si” tiah a ti.
13 Asinain Jehovah nih Israel mi kha Izipt ram in nan chuahpi hna lai tiah nawl a pekmi hna kha Israel mi le Faraoh va chimh ding in Moses le Aaron cu a fial ṭhan hna.
14 Hi hna hi Israel innchungkhar lu hna i min cazin a si: Israel fater Reuben fapale cu Hanok, Pallu, Hezron le Karmi an si. Annih cu Reuben tefa an si.
15 Simeon fapale cu Jemuel, Jamin, Ohad, Jakhin, Zohar le Kanaan minu fapa Shaul an si. Annih cu Simeon tefa an si.
16 Levi fapale min cu Gershon, Kohath le Merari an si. Annih cu Levi hrinsor an si. Levi cu kum 137 a nung.
17 Gershon fapale cu Libni le Shimei an si. Annih cu Gershon chungkhar an si.
18 Kohath fapale cu Amram, Izhar, Hebron le Uzziel an si. Kohath cu kum 133 a nung.
19 Merari fapale cu Mahli le Mushi an si.
Hi hna hi an tefa hna ning in Levi hrinsor an si.
20 Amram nih a pa far Jokhebed kha nupi ah a ṭhit i Aaron le Moses kha a hrin hna. Amram cu kum 137 a nung.
21 Izhar fapale cu Korah, Nefeg le Zikhri an si.
22 Uzziel fapale cu Mishael, Elzafan le Sithri an si.
23 Aaron nih Amminadab fanu Nahshon far Elisheba kha nupi ah a ṭhit i Nadab, Abihu, Eleazar le Ithamar kha a hrin hna.
24 Korah fapale cu Assir, Elkanah le Abiasaf an si. Annih cu Korah chungkhar an si.
25 Aaron fapa Eleazar nih Putiel fanu pakhat kha nupi ah a ṭhit i Finehas kha a hrin.
Hi hna hi an chungkhar ning cio in Levi phun hruaitu an si.
26 Jehovah nih Aaron le Moses kha “Israel mi cu Izipt ram in an bu ning cio in chuahpi hna u” tiah a rak ti hna.
27 Israel mi Izipt ram in chuahter awkah Izipt siangpahrang Faraoh sin a chimtu cu Moses le Aaron hi an si.
28 Izipt ram ah Jehovah nih Moses sin bia a chim ni ah,
29 Jehovah nih “Keimah cu Jehovah ka si. Kaan chimhmi vialte hi Izipt siangpahrang Faraoh kha va chim” tiah a ti.
30 Mah tikah Moses nih Jehovah sinah “Kei cu biachim holhrel a thiam lomi ka si. Zeitindah Faraoh nih ka bia cu a ngaih duh lai?” tiah a ti.
